دەپۋتاتتار الدىمەن اۋە كەڭىستىگىن پايدالانۋ جانە اۆياتسيا قىزمەتى ماسەلەلەرى تۋرالى زاڭناماعا ەنگىزىلگەن تۇزەتۋلەردى ءبىرىنشى وقىلىمدا ماقۇلدادى. قۇجاتتى ينۆەستيتسيالار جانە دامۋ ءمينيسترى ج.قاسىمبەك تانىستىردى. زاڭ جوباسى اياسىندا شەتەلدىك تاسىمالداۋشىلاردى تىركەۋ, كوممەرتسيالىق ەمەس ۇيىمداردى تارتۋ جانە اۋە كەمەلەرىن پايدالانۋشىلاردىڭ, اەروناۆيگاتسيالىق قىزمەت كورسەتۋشىلەردىڭ, اۆياتسيالىق وقۋ ورتالىقتارىنىڭ قىزمەتىن قاداعالاۋ ءجونىندەگى ازاماتتىق اۆياتسيا سالاسىنداعى ۋاكىلەتتى ورگاننىڭ قۇزىرەتى ناقتىلانادى جانە تولىقتىرىلادى.
«سونىمەن قاتار, اۆياتسيا قىزمەتكەرلەرىن مەديتسينالىق كۋالاندىرۋ جۇيەسىن جەتىلدىرۋ مەن اۆياتسيالىق مەديتسينالىق ورتالىقتاردى سەرتيفيكاتتاۋدىڭ جاڭا ءتۇرى ۇسىنىلادى. سونداي-اق, شاعىن اۆياتسيانى دامىتۋ, ۇشقىشسىز ۇشاتىن اپپاراتتاردى ەسەپكە الۋ, ارناۋلى ۇشۋعا رۇقسات الۋ, اۋە كەمەلەرىن پايدالانۋشىلارعا جالعا بەرۋ ىسىندە اكىمشىلىك كەدەرگىلەردى جويۋعا قاتىستى ەرەجەلەر جۇيەسىن ەنگىزۋ دە كوزدەلەدى», – دەدى ج.قاسىمبەك.
سەناتور س.ەڭسەگەنوۆ قۇجات ازاماتتىق اۆياتسيا مەن اۋە كەڭىستىگىن پايدالانۋ سالاسىنداعى زاڭنامانى جەتىلدىرۋدى جانە ونى حالىقارالىق ازاماتتىق اۆياتسيا ۇيىمى (يكاو) ستاندارتتارىنا ءسايكەستەندىرۋدى رەتتەيتىندىگىن اتاپ ءوتتى.
«قازىرگى كەزدە قازاقستانداعى 20 اۋە كومپانياسىنىڭ «ەير استانا» قۇرىلىمىنان باسقا 19-ىنا ەۋرووداق ەلدەرىنىڭ اۋە كەڭىستىگىنە ۇشۋعا تىيىم سالىنعان. زاڭ جوباسىنداعى اۋە قاۋىپسىزدىگىن باسقارۋ جانە باقىلاۋ جۇيەلەرىن جەتىلدىرۋ ەرەجەلەرى وتاندىق اۋە كومپانيالارى ءۇشىن ەنگىزىلگەن شەكتەۋلەردى ازايتۋعا مۇمكىندىك بەرەدى. سونىمەن بىرگە, شاعىن اۆياتسيانى دامىتۋدى قولداۋ ماقساتىندا زاڭ جوباسىندا جەڭىل جانە تىم جەڭىل اۋە كەمەلەرى ۇشۋلار ورىنداعان جاعدايدا ولارعا اەروناۆيگاتسيالىق قىزمەت كورسەتۋدى وتەۋسىز جۇزەگە اسىرۋ جونىندەگى تولىقتىرۋلار ەنگىزىلگەن», – دەدى س.ەڭسەگەنوۆ.
سونىمەن, بۇل اتالعان زاڭ جوباسى ءبىرىنشى وقىلىمدا ماقۇلداندى.
بۇدان كەيىن «كوللەكتورلىق قىزمەت تۋرالى» زاڭ جوباسى مەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوللەكتورلىق قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسى تالقىلاۋعا شىعارىلدى. اتالعان ماسەلەلەرگە بايلانىستى ۇلتتىق بانك توراعاسى دانيار اقىشەۆ بايانداما جاسادى.
بۇل زاڭ جوبالارىنا سايكەس كوللەكتورلىق قىزمەت اگەنتتىك پەن بورىشكەر اراسىنداعى بەرەشەكتى ءوندىرىپ الۋ تۋرالى كەلىسىمشارت تاراپتاردىڭ قۇقىقتارى مەن مىندەتتەمەلەرى, بورىشكەردىڭ مالىمەتتەرى, بورىشتىڭ كولەمى مەن قۇرىلىمى, شارت بويىنشا سىياقى مولشەرى مەن باسقا دا ماسەلەلەر جونىندەگى ەلەۋلى شارتتار نەگىزىندە جۇزەگە اسىرىلادى. سونداي-اق, بورىشكەردىڭ بەرەشەگىن بىرنەشە كوللەكتورلىق اگەنتتىككە بەرۋگە دە تىيىم سالۋ كوزدەلىپ وتىر.
زاڭ جوباسى بويىنشا نەگىزگى بايانداما اياقتالعان سوڭ, سەناتورلار اراسىندا قىزۋ پىكىرسايىس ءوربىدى. ءوز كەزەگىندە قاسىم-جومارت توقاەۆ جۇرتشىلىق اراسىندا پىكىرتالاس تۋعىزعان اسا قاجەتتى ماسەلەگە ۇلتتىق بانك باسشىسىنىڭ نازارىن اۋداردى.
«ميلليوننان استام بورىشكەر, ۋاقتىلى قايتارىلماعان ءبىرجارىم تريلليون تەڭگە قارىز قازىرگى بانك جۇيەسىنىڭ جاعدايىن كورسەتىپ وتىر. وتاندىق بانك جۇيەسىن تاياۋدا عانا الەمدەگى ەڭ ۇزدىك بانك جۇيەسىنىڭ ءبىرى دەگەن بولاتىنسىز. ال قازىر وسى بانك جۇيەسىن ءبارىمىز جابىلىپ قۇتقارىپ, ينستيتۋت رەتىندە كوللەكتورلاردى ەنگىزىپ جاتىرمىز», – دەدى ق.توقاەۆ.
تالقىلاۋدا سەناتور و. پەرەپەچينا: «مەملەكەت بىرەسە بانكتى, بىرەسە بورىشكەردى قولداپ, بۇل ۇدەرىسكە قاتىسۋشىنى ۇدايى «شۇڭقىردان» شىعارىپ الا بەرمەيدى. ەلىمىزدىڭ ەكونوميكالىق دامۋى مەن ءبىزدىڭ ازاماتتارىمىزدىڭ ءال-اۋقاتى بانك جۇيەسىنىڭ تۇراقتىلىعىنا بايلانىستى بولعاندىقتان ەكىنشى دەڭگەيدەگى بانكتەرگە تالاپتاردى كۇشەيتۋ كەرەك», – دەدى. سول سياقتى دەپۋتات ە.مۇقاەۆ تا زاڭ جوباسىنىڭ تىكەلەي اسەر ەتەتىن ەرەجەلەرى قارجى قىزمەتىن تۇتىنۋشىلاردىڭ قۇقىقتارىن قورعاۋ مەن كوللەكتورلىق اگەنتتىكتەردىڭ قىزمەتىن قاتاڭ رەتتەۋ كوزدەلەتىندىگىن تىلگە تيەك ەتتى.
زاڭ جوباسىن تالقىلاۋ بارىسىندا بورىشكەردىڭ, نەسيە بەرۋشىنىڭ جانە نەسيە بەرۋشىگە دەلدالدىق قىزمەت كورسەتەتىن كوللەكتورلىق اگەنتتىكتىڭ مۇددەلەر تەپە-تەڭدىگىن بەلگىلەۋ ماقساتىندا كوللەكتورلىق اگەنتتىكتىڭ ءوز باستاماسى بويىنشا جۇمىس كۇندەرى اپتاسىنا ءۇش رەت 8:00-دەن 21:00 ارالىعىندا ءبىر مارتە جەكە بايلانىس كەزەڭىن قاراستىرۋ ۇسىنىلدى.
زاڭ جوباسىنداعى باپتار اراسىنداعى ىشكى قايشىلىقتاردى جويۋ ماقساتىندا بورىشكەر مەن جەكە تۇلعانىڭ قۇقىقتارىن بەلگىلەۋگە قاتىستى بىرنەشە وزگەرىس ەنگىزىلدى. ءسويتىپ, كوللەكتورلىق قىزمەت ماسەلەلەرى جونىندەگى زاڭناماعا تۇزەتۋلەر ەكى وقىلىمدا قارالىپ, تالقىلاۋ ناتيجەسىندە سەنات كوميتەتتەرىنىڭ ەسكەرتپەلەرى مەن ۇسىنىستارى نەگىزگە الىنىپ, زاڭ جوباسىنا تۇزەتۋلەر ەنگىزىلدى. زاڭ جوبالارى ماجىلىسكە جەتىلدىرىلۋگە جىبەرىلدى.
نۇرلىبەك دوسىباي,
«ەگەمەن قازاقستان»