بۇل تۋرالى بۇگىن ماقتاارال اۋدانىنىڭ اكىمى عالىمجان يسمايلوۆ وقو ايماقتىق كوممۋنيكاتسيالار قىزمەتىندە وتكەن ءباسپاسوز جيىنىندا مالىمدەدى.
جۋرناليستەرمەن بولعان وتىرىستا اۋدان باسشىسى اعىمداعى جىلى بولجامدىق ەگىس قۇرىلىمىنا سايكەس, ءداندى جانە بۇرشاقتى داقىلدار 13884 گا, تەحنيكالىق داقىلدار 80513,8 گا (بىلتىر 83609,8 گا-عا ماقتا ەگىلگەن), كارتوپ, كوكونىس جانە باقشا داقىلدارى 34020,9 گا, مال ازىقتىق داقىلدارى 9535,9 گا ەگىلەدى دەپ كۇتىلىپ, بۇگىندە اۋدان شارۋالارى 890,2 گا جەرگە ءتۇرلى كوكونىس داقىلدارىن, 4562,2 گا جەرگە باقشا, 890,3 گا جەرگە جاڭا جوڭىشقا, 41 گا جەرگە باۋ جانە ءجۇزىم ەكپەلەرىن وتىرعىزىپ ۇلگەرگەنىن حابارلادى.
مۇنان بولەك, اۋدان كولەمىندە 947 گا جەرگە جەمىس-جيدەك جانە ءجۇزىم داقىلدارى ءوسىرىلىپ جاتىر. ونىڭ ىشىندە 105,4 گا قارقىندى باۋ جانە بيىل وعان قوسىمشا 70 گا جەرگە قارقىندى باۋ ورنالاستىرۋ جوسپارلانۋدا.
سونىمەن بىرگە, اۋدان باسشىسى وتكەن 2016 جىلى ماقتاارالدا اۋىل شارۋاشىلىعى سالاسىندا جالپى وندىرىلگەن ءونىمنىڭ كولەمى 64 ملرد. 489,7 ملن. تەڭگەنى قۇراپ 2015 جىلمەن سالىستىرعاندا 4,8 ملرد تەڭگەگە ارتقانىن ايتتى. وندىرىلگەن ءونىم كولەمىن 2021 جىلعا دەيىن 90,4 ملرد. تەڭگەگە جەتكىزۋ جوسپارلانىپ وتىرعانىن جەتكىزگەن ع.يسمايلوۆ ەگىس قۇرىلىمىن ءارتاراپتاندىرۋ ارقىلى اۋىسپالى ەگىستى ەنگىزۋ ناتيجەسىندە مول ءونىم الۋ كوزدەلىپ وتىرعانىن حابارلادى.
«اۋداندا ماقتا داقىلى نەگىزگى داقىل بولىپ سانالاتىن بارىمىزگە بەلگىلى. سوندىقتان ماقتا داقىلىنان مول ونىمگە قول جەتكىزۋ ءۇشىن بىرىنشىدەن تۇقىمدىق شيتكە كوڭىل ءبولۋىمىز قاجەت. بىلتىرعى جىلى اۋداندا تۇقىمدىق شيت جەتىسپەۋشىلىگى ورىن العان جاعدايى بولدى. وسى جاعدايدىڭ الدىن الۋ ءۇشىن اۋداندا ارنايى جۇمىسشى توپ قۇرىلىپ, ناتيجەسىندە بيىل اۋداندا 2985 توننا شيت دايىندالادى دەپ جوسپارلاندى. ونىڭ ىشىندە وريگينال – 2 تن, ەليتا – 45 تن, R-1 – 385 تن, R-2 - 100, تەحنيكالىق شيت – 2453. بۇگىنگى تاڭدا اۋدانىمىزدا 2502 توننا شيت دايىن. ودان بولەك اۋداننىڭ كاسىپكەرلەرى تاراپىنان قىتاي, تۇركيا مەلەكەتتەرىنەن قوسىمشا تۇقىمدىق شيت الىپ كەلۋ ءۇشىن جۇمىستار جۇرگىزىلۋدە. بۇل ءشيتتىڭ كولەمى بيىلعى جىلى ەگىلەتىن القاپقا تولىق جەتكىلىكتى بولادى دەپ جوسپارلاپ وتىرمىز», - دەدى اۋدان اكىمى.
ءباسپاسوز جيىنىندا عالىم ىبىراي ۇلى تۇقىم ماسەلەسىن تۇپكىلىكتى شەشۋ ءۇشىن جەر كولەمى اۋقىمدى شارۋاشىلىق باسشىلارىمەن جۇمىستار جۇرگىزىلىپ جاتقانىن دا اتاپ ءوتتى.
سپيكەر, سونداي-اق, اۋىل شارۋاشىلىعى داقىلدارىنان مول ءونىم الۋدىڭ نەگىزگى كەپىلدەرىنىڭ ءبىرى ەگىستىك القاپتاردى دەر كەزىندە جانە قاجەتتى مولشەردە اعىن سۋمەن قاماتاماسىز ەتۋ ەكەنىن اتاپ ءوتىپ, بۇگىنگى تاڭدا اۋداندا ۇزىندىعى 2,7 مىڭ شاقىرىم بولاتىن 1316 سۋ ارناسى بارىن جەتكىزىپ, سۋارۋ جۇمىستارىن ويداعىبداي جۇرگىزۋ جوسپارلانىپ وتىرعانىن ەسكەرتتى.
سونداي-اق, ماقتاارالدىڭ اكىمى اۋىل شارۋاشىلىعى تەحنيكالارىنىڭ قاتارى جىل سايىن جاڭالانىپ وتىراتىنىن مالىمدەپ, بيىل 182 دانا جاڭا تەحنيكانى الۋ بولجانىپ وتىرعانىن جەتكىزدى.