قازىرگى ۋاقىتتا ەلوردا اۋماعىندا جاۋاپكەرشىلىكتىڭ 1-2 دەڭگەيىندەگى تەحنيكالىق جانە تەحنولوگيالىق كۇردەلى وبەكتىلەردە تەحنيكالىق قاداعالاۋ بويىنشا ينجينيرينگتىك قىزمەتتەر كورسەتۋمەن اككرەديتتەلگەن 101 ۇيىم اينالىسادى, ولاردىڭ قۇرامىندا اككرەديتتەلگەن 442 مامان بار. بۇل تۋرالى استانا قالاسىنىڭ اكىمدىگىندەگى كەڭەيتىلگەن وتىرىستا استانا ق. مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى تولەگەن ق ۇلىشەۆ حابارلادى.
ۆەدومستۆو باسشىسىنىڭ مالىمەتتەرىنە سايكەس, ۇستىمىزدەگى جىلدىڭ العاشقى التى ايىنىڭ جانە 2016 جىلدىڭ قورىتىندىسى بويىنشا, باسقارما تەحنولوگيالىق قاداعالاۋ بويىنشا 31 ساراپشىنى اكىمشىلىك جاۋاپكەرشىلىككە تارتىپ, ولارعا 6 اي مەرزىمگە تەحنيكالىق قاداعالاۋ جۇرگىزۋ قۇقىعىنا ساراپشى اتتەستاتىنىڭ كۇشىن ۋاقىتشا توقتاتۋمەن 200 اەك كولەمىندە ايىپپۇل سالىندى.
وتىرىستىڭ جۇمىسىنا استانا ق. اكىمىنىڭ ءبىرىنشى ورىنباسارى سەرگەي حوروشۋن, جانە قۇرىلىس وبەكتىلەرىن تەحنيكالىق قاداعالۋ جانە باقىلاۋ جونىندەگى تاۋەلسىز ساراپشىلار قاتىستى.
«تەحنيكالىق قاداعالاۋ جونىندەگى ساراپشىلار قۇرىلىس ۇيىمدارىنىڭ ساۋلەت, قالا قۇرىلىسى سالاسىندا جانە قۇرىلىس قىزمەتىندە بەكىتىلگەن بارلىق قۇرىلىس تالاپتارىن ساقتاۋىن قامتاماسىز ەتەدى, سونىڭ ىشىندە, ورىندالعان جۇمىستاردىڭ ساپاسى, مەرزىمى, قۇنى, ولاردى قابىلداۋ جانە نىسانداردى پايدالانۋعا تاپسىرۋ كىرەدى. الايدا بۇگىنگى كۇنى بۇل مىندەتتەردى ساراپشىلاردىڭ بارلىعى ءتيىستى دەڭگەيدە ورىنداپ وتىرعان جوق», - دەپ ءمالىم ەتتى سەرگەي حوروشۋن.
حوروشۋننىڭ پىكىرىنشە, تاجىريبە كورسەتىپ وتىرعانداي, تەحنيكالىق قاداعالاۋدا كەزدەسەتىن نەگىزگى بۇزۋشىلىقتار جوبانى ىسكە اسىرۋدىڭ بارلىق كەزەڭدەرىندە قۇرىلىس-مونتاج جۇمىستارىنىڭ بارىسىنا ءتيىستى باقىلاۋدىڭ جوقتىعى, تەحنيكالىق قاداعالاۋ جۋرنالىن دۇرىس جۇرگىزبەۋ جانە نىسان قۇرىلىسىنىڭ جاعدايى مەن بارىسى تۋرالى ەسەپتى اي سايىن تاپسىرماۋ بولىپ تابىلادى. سونىمەن بىرگە, قۇرىلىس نىسانى اياقتالعان كەزدە تاپسىرىس بەرۋشىگە (قۇرىلىس سالۋشىعا) ساۋلەت-قۇرىلىس نورمالارىنا سايكەس كەلمەيتىن قۇرىلىس-مونتاج جۇمىستارىنىڭ ساپاسى تۋرالى وڭ قورىتىندى شىعارىپ بەرۋ فاكتىلەرى بار. وسىنىڭ ناتيجەسىندە اتالعان بۇزۋشىلىقتار ساپاسىز كوتەرىلگەن نىسانداردى پايدالانۋ كەزىندە الەۋەتتى تۇردە قاۋىپ توندىرەدى. اتاپ ايتقاندا, سوڭعى ۋاقىتتا قۇرىلىس-مونتاج جۇمىستارىن جۇرگىزۋ بارىسىندا كونسترۋكتسيالاردىڭ قۇلاۋى جانە بەكىتپە قالىپتاردىڭ ءۇزىلۋى سياقتى وقيعالار جيىلەپ كەتتى.
الايدا تەحنيكالىق قاداعالاۋ جونىندەگى ساراپشىلار قۇرىلىس الاڭدارىنىڭ جاعدايىنا نازار اۋدارمايدى. اتاپ ايتقاندا, قورشاۋلاردىڭ تالاپقا ساي كەلمەۋى, كولىك قۇرالدارىنىڭ دوڭگەلەكتەرىن جۋاتىن ورىنداردىڭ جوقتىعى, قۇرىلىس الاڭدارىنىڭ اۋماعىندا قۇرىلىس قوقىستارىنىڭ ءۇيىلۋى. وسىلايشا, «قۇرىلىس ءوندىرىسى. كاسىپورىنداردىڭ, عيماراتتاردىڭ جانە قۇرىلىستاردىڭ قۇرىلىسىن ۇيىمداستىرۋ» قر اباتتاندىرۋ ەرەجەلەرى جانە سانيتارلىق نورمالارىنىڭ تالاپتارى ساقتالماي وتىر.
«ساۋلەت, قالا قۇرىلىسى جانە قۇرىلىس قىزمەتى تۋرالى زاڭناماعا سايكەس, اتالعان بۇزۋشىلىقتار ءۇشىن مەردىگەر ۇيىمدار دا, تەحنيكالىق قاداعالاۋ ساراپشىلارى دا جاۋاپتى. مەردىگەردىڭ نەمەسە باس مەردىگەردىڭ تالاپتاردى ورىنداماۋ نەمەسە ءتيىستى ورىنداماۋ جاعدايىندا, بۇل مالىمەتتەردى بىردەن تاپسىرىس بەرۋشىگە جانە باسقارماعا حابارلاۋدى سۇرايمىن», دەپ ءمالىم ەتتى قر ينۆەستيتسيالار جانە دامۋ مينيسترلىگىنىڭ قۇرىلىس ىستەرى جونىندەگى باس ساراپشىسى ارنولد لي .
«ەكسپو-2017 حالىقارالىق كورمەسى قارساڭىندا جانە قيراۋعا ۇشىراۋ جانە ت.ب. وقيعالاردى بولدىرماۋ ماقساتىندا باسقارما تەحنيكالىق قاداعالاۋ ساراپشىلارىنىڭ قىزمەتىن قاتاڭ باقىلاۋعا الادى, ءتىپتى اتتەستاتسياسىنان جانە قۇرىلىس ۇيىمىنىڭ ليتسەنزياسىنان ايىرۋعا دەيىن شارالار قابىلداناتىن بولادى», - دەپ سەندىردى سەرگەي حوروشۋن.
سونداي-اق, تەحنيكالىق قاداعالاۋ ساراپشىلارىنا قۇرىلىسى ءجۇرىپ جاتقان بارلىق نىسانداردا قۇرىلىس نورمالارىنا سايكەستىك بويىنشا تەكسەرۋ جۇرگىزىپ, بەلگىلەنگەن تالاپتاردى بۇزۋ جاعدايلارى انىقتالىپ جاتسا, ولاردى قىسقا مەرزىمدە جويۋ تۋرالى نۇسقاۋ بەرۋ تاپسىرىلدى. وسى رەتتە كورمە قارساڭىندا ەكسپو نىساندارىنا ەرەكشە نازار اۋدارى ماڭىزدىلىعى ايتىلدى.
سونىمەن بىرگە, استانا قالاسى اكىمىنىڭ ءبىرىنشى ورىنباسارى تەحنيكالىق قاداعالاۋ ساراپشىلارىنىڭ بارلىعىنا وزدەرىنە ارتىلعان مىندەتتەردى ءتيىستى ورىنداۋدى جانە قۇرىلىس نىساندارىنا قاتاڭ باقىلاۋ جۇرگىزۋدى تاپسىردى. ساراپشىلاردىڭ ءوز قىزمەتتەرىن دۇرىس ورىنداماۋ فاكتىلەرى انىقتالعان جاعدايدا, قىلمىستىق كودەكس تالاپتارىنا سايكەس شارا قابىلدانادى.
وتىرىستىڭ قورىتىندىسى بويىنشا سەرگەي حوروشۋن تەحقاداعالاۋ ساراپشىلارىمەن ءار توقسان سايىن كەڭەستەر وتكىزىلەتىنىن حابارلادى. ول جيىنداردا ساراپشىلاردىڭ اتالعان باعىتتاعى جۇمىستى جاقسارتۋ بويىنشا ۇسىنىستارى تىڭدالىپ, كوميتەتپەن بىرگە بار ماسەلەلەردى جويۋ بوۋىنشا شارالار قابىلداناتىن بولادى.