كەزدەسۋ بارىسىندا مەملەكەتتىك حاتشى قازاقستان بىرىككەن اراب امىرلىكتەرىن تاياۋ شىعىستاعى ءوزىنىڭ جەتەكشى سەرىكتەسى رەتىندە قاراستىراتىنىن جانە ءوزارا قارىم-قاتىناستى دامىتۋعا باسا ءمان بەرەتىندىگىن اتاپ ءوتتى. 2017 جىلدىڭ قازان ايىندا ەكى ەل اراسىنداعى ديپلوماتيالىق قاتىناستاردىڭ ورناعانىنا 25 جىل تولاتىنىنا, وسى كەزەڭ ىشىندە بىرلەسىپ اتقارعان جۇمىستىڭ وراسان زور تاجىريبەسى جيناقتالىپ, ءارتۇرلى سالالاردا تابىستارعا قول جەتكىزىلگەنىنە توقتالدى.
ابدىقالىقوۆا قازاقستان تاياۋداعى ونجىلدىقتا ءوزىنىڭ يندۋستريالدىق ساياساتىنىڭ باستى قۇرامداسى سانالىپ وتىرعان جاسىل ەكونوميكانى ەنگىزۋدىڭ بەلسەندى جاقتاۋشىسى بولاتىندىعىن ايتتى.
«قازاقستان ءباا-ءنىڭ جاڭارتىلعان قۋات كوزدەرى بويىنشا ساياساتىنا نيەتتەستىك ءبىلدىرىپ, تولىقتاي قولدايدى. امىرلىكتەردىڭ «تازا» ەنەرگيانى ىلگەرىلەتۋ ارقىلى ەكونوميكالىق دامۋعا ىقپال ەتۋ تاجىريبەسى وڭ ۇلگى بولادى», - دەدى ول.
مەملەكەتتىك حاتشى ماسدار ينستيتۋتىنىڭ جوعارى تەحنولوگيالىق ءبىلىم بەرۋ مەكەمەلەرىنىڭ ءبىرى رەتىندە جاسىل تەحنولوگيالاردى ىلگەرىلەتۋ ءۇشىن زور ۇلەس قوساتىنىنا سەنىم ءبىلدىردى.
«ەكسپو-2017» حالىقارالىق كورمەسى اياسىندا اعىمداعى جىلدىڭ 31 تامىزى مەن 1 قىركۇيەگى ارالىعىندا «ايەلدەر بولاشاق ەنەرگياسىن قولدايدى» حالىقارالىق فورۋمى وتكىزىلەدى. فورۋمدا بالامالى ەنەرگەتيكا جانە جاسىل ەكونوميكا سالاسىنداعى يننوۆاتسيالىق يدەيالاردى ىلگەرىلەتۋدەگى ايەلدەردىڭ ءرولى مەن ۇلەسى تاقىلانادى. مەن ءسىزدى اتالعان فورۋمعا شاقىرامىن», - دەدى گۇلشارا ابدىقالىقوۆا.
كەزدەسۋ بارىسىندا تاراپتار قازاقستان مەن ءباا اراسىندا عىلىمي جانە ءبىلىم بەرۋ ىنتىماقتاستى كەڭەيتۋ, ونىڭ ىشىندە بىرلەسكەن كونفەرەنتسيالار, ترەنينگتەر, سەمينارلار, اراب وڭىرىندەگى ايەلدەر ىستەرى جانە تەحنولوگيالار ورتالىعىمەن (CWTAR) بىرگە ءىس-شارالار ۇيىمداستىرۋ ماسەلەلەرىن تالقىلادى.