«بيىلعى جىل, ەلىمىز ءۇشىن وتە جاۋاپتى دا, ماڭىزدى وقيعالارعا تولى جىل. ءبىز بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ءوز قىزمەتىمىزدى باستادىق, ماۋسىم ايىندا استانا مەيماندارى ەكسپو-2017 حالىقارالىق كورمەسىندە جينالادى, ەلوردامىزدا يسلام ىنتىماقتاستىق ۇيىمىنىڭ ءسامميتى وتەدى. ال جىلدىڭ باسىندا مەملەكەت باسشىسى نۇرسۇلتان نازارباەۆ كونستيتۋتسيالىق رەفورمالاردى جاريالاپ, قازاقستان حالقىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ۇسىندى. وسىنىڭ بارلىعى مەملەكەتىمىزدىڭ دامۋىن جانە بۇكىل قازاقستان حالقىنىڭ مۇددەلەرىن تولىقتاي قامتاماسىز ەتىپ, ەلىمىزدى دامىعان 30 مەملەكەتتىڭ قاتارىنا قوساتىنىنا نىق سەنەمىز. اتاپ ايقاندا, جاڭعىرۋدىڭ ءۇشىنشى كەزەڭىن جۇزەگە اسىرا كەلە, ءبىز ۇلتتىق ەكونوميكانىڭ باسەكەگە قابىلەتتىلىگىن كۇشەيتۋدى, كولىك-لوگيستيكا جانە اگروونەركاسىپ كەشەنىن دامىتۋدى جوسپارلاپ وتىرمىز. سونىمەن قاتار, جولداۋدا ادامي كاپيتالدىڭ دامۋىنا ەرەكشە كوڭىل بولىنەدى, ياعني ءبىلىم سالاسىن, دەنساۋلىق ساقتاۋ سالاسىن دامىتا كەلە, حالىقتىڭ ءال-اۋقاتىن كوتەرۋ جوسپارلانىپ وتىر. وسى باعىتتاردى جۇزەگە اسىرۋ ماقساتىندا, قوستاناي وبلىسىندا بەلسەندى جۇمىس جۇرگىزىلىپ, الدىمىزعا قويىلعان تاپسىرمالاردى ىسكە اسىرۋعا باعىتتالعان ءىس-شارالار كەشەنى ورىندالۋدا. 2016 جىلدىڭ قورىتىندىسى بويىنشا وبلىس ەكونوميكاسىنىڭ ۇدەمەلى دامۋ سەرپىنى, بىزدە مەملەكەت باسشىسى العا قويعان بارلىق مىندەتتەردى ءىس جۇزىندە ويداعىداي ورىنداۋ ءۇشىن جەتكىلىكتى نەگىز قالاندى دەپ ايتۋعا مۇمكىندىك بەرەدى. وڭىردەگى ونەركاسىپ تە وركەندەپ كەلەدى. ول ناقتى كولەم يندەكسى بويىنشا 100,3 پايىزدى قۇراسا, اۋىل شارۋاشىلىعىندا 102,3 پايىز, بولشەك ساۋدادا 101,7 پايىزدى كورسەتىپ, وڭ ناتيجەلەر بايقالادى. نەگىزگى كاپيتالعا سالىنعان ينۆەستيتسيالار 6 پايىزعا ۇلعايتىلدى. 2017 جىلدىڭ باسىنان بەرى سول سەرپىن ساقتالۋدا. ونەركاسىپتە ناقتى كولەم يندەكسى 104,3 پايىزدى قۇرايدى, بولشەك ساۋدا – 101,6 پايىز. وبلىس ەكونوميكاسىنا شامامەن 15 ملرد تەڭگە ينۆەستيتسيا تارتىلدى» دەدى ءوڭىر باسشىسى ا.مۇحامبەتوۆ.
قوستاناي وبلىسى رەسپۋبليكانىڭ جەتەكشى اگروونەركاسىپ ءوڭىرى بولىپ تابىلادى جانە استىق وندىرۋدە ەلىمىزدە ءوزىنىڭ لايىقتى ۇلەسىن قوسىپ وتىر. مۇنىڭ دالەلى, وبلىستاعى ورتاشا جىلدىق استىق ءوندىرىسى 5 ملن توننادان اسادى. بۇل رەتتە ايتا كەتەتىن تاعى ءبىر جايت, تەك قانا 2016 جىلى وندىرىلگەن 1 ملن 107 مىڭ توننا ۇننىڭ شامامەن 965 مىڭ تونناسى وبلىستان تىس جونەلتىلگەن, ونىڭ ىشىندە 860 مىڭ تونناسى نەمەسە 90 پايىزى ەكسپورتقا شىعارىلعان.
سونىمەن بىرگە, وبلىس باسشىسى لوگيستيكالىق ينفراقۇرىلىمدى دامىتۋدا, «نۇرلى جەر» تۇرعىن ءۇي باعدارلاماسىن ىسكە اسىرۋدا, شاعىن جانە ورتا بيزنەستى دامىتۋدا, ادامي كاپيتال ساپاسىن جاقسارتۋدا, ونىڭ ىشىندە, ءبىلىم, دەنساۋلىق سالاسىنا باسا نازار اۋدارىلعانىن العا تارتىپ, اۋقىمدى جۇمىستار اتقارىلىپ جاتقانىن باياندادى.
جاقىندا ۇكىمەت وتىرىسىندا Iشكi iستەر مينيسترi قالمۇحانبەت قاسىموۆ قوستاناي جانە سولتۇستiك قازاقستان وبلىستارىن سۋ باسۋ قاۋپi جوعارى ەكەنىن مالىمدەگەن بولاتىن. وسىعان بايلانىستى قويىلعان ساۋالعا وراي ءوڭىر باسشىسى جان-جاقتى ازىرلىك جۇمىستارىن جوسپارلاپ, الدىن-الۋ شارالارىن قامداپ جاتقانىن جەتكىزدى.
راۋان قايدار,
«ەگەمەن قازاقستان»