سپورت-شەجىرەنى اقتارىپ وتىرىپ, مىنا ءبىر قىزىققا كۋا بولعانىم بار. تاۋەلسىزدىك العان 25 جىلدىڭ ىشىندە قازاقستان التى جازعى, التى قىسقى وليمپيا ويىندارىنا قاتىستى. دوپينگ داۋىنا ىلىگىپ, ءتورت جىلدىقتىڭ باستى دوداسىنان ەنشىلەگەن بەس التىنىمىزدان ايىرىلىپ قالدىق. دەگەنمەن بىزدە قازىر تاۋەلسىزدىك جىلدارى توپجارعان 16 وليمپيادا چەمپيونى بار ەكەن. سونىڭ ىشىندە ءۇش چەمپيون ءبىر كۇندە دۇنيەگە كەلگەن. مۇنداي قىزىق بولادى. بارلىعىنان باسىنان تارقاتىپ ايتساق.
1996 جىلى قازاقستان ەڭ العاش رەت قاتىسقان جازعى وليمپيا ويىندارىندا بوكسشى ۆاسيلي جيروۆكە 81 كيلودا تەڭ كەلەر ەشكىم بولمادى. «بالقاشتىڭ جولبارىسى» سول جىلى ۇزدىك بوكسشىعا بەرىلەتىن ۆەل باركەر كۋبوگىن دا ەنشىلەدى. جيروۆ 1974 جىلى 4 ساۋىردە دۇنيەگە كەلگەن.
ارادا 4 جىل وتكەندە جيروۆتان كەيىن بوكستان ەكىنشى التىندى تۇركىستاندىق جاس قىران بەكزات ساتتارحانوۆ سىيلادى. مارقۇم بەكزات تا 4 ءساۋىر (1980 جىلعى) كۇنى دۇنيە ەسىگىن اشقان ەكەن.
ال بىلتىر برازيليا جەرىندە ەشكىم كۇتپەگەن جەردەن سۋدا جۇزۋدەن 200 مەتر قاشىقتىقتا چەمپيون اتانعان دميتري بالاندين دە ۆاسيلي مەن بەكزات سەكىلدى ءساۋىر ايىنىڭ ءتورتىنشى جۇلدىزىندا ومىرگە كەلىپتى.
ءبىر كۇندە ءۇش چەمپيوننىڭ ومىرگە كەلۋى سيرەك قۇبىلىس دەپ باعالاۋعا بولادى.
جالپى, ناۋرىز بەن ءساۋىر ايلارىندا قازاقتىڭ بىرنەشە تالانتتى بوكسشىلارى ءوز تۋعان كۇندەرىن اتاپ وتەدى. مىسالى, ۆاسيلي مەن مارقۇم بەكزاتتان بولەك, الەم چەمپيونى جانىبەك ءالىمحان ۇلى مەن كاسىپقوي بوكستاعى جۇلدىزىمىز گەننادي گولوۆكين دە وسى ايدىڭ تۋمالارى. جانىبەك 1 ساۋىردە, گەننادي 8 ءساۋىر كۇنى دۇنيەگە كەلگەن.
ال 69 كيلودا قازاقتىڭ ءانۇرانىن قالىقتاتىپ, كوك تۋىن جەلبىرەتكەن ءتورت چەمپيونىمىز بولسا, ونىڭ ەكەۋى ناۋرىزدا, ەكەۋى قاراشادا دۇنيەگە كەلگەن. باقتيار ارتاەۆ (14 ناۋرىز) پەن دانيار ەلەۋسىنوۆ (13 ناۋرىز) ناۋرىزدا تۋعان بولسا, سەرىك ساپيەۆ (16 قاراشا) پەن باقىت سارسەكباەۆ (29 قاراشا) قاراشادا شىر ەتىپ ومىرگە كەلىپتى.
بەك تولەۋوۆ, جۋرناليست استانا