شاراعا مەملەكەت پەن قوعامنىڭ بارلىق ماڭىزدى سالالارىندا تابىستى ەڭبەك ەتىپ جۇرگەن ەر-ازاماتتار مەن داڭقتى ايەلدەر قاتىستى. كىتاپتىڭ مازمۇنى تاۋەلسىز مەملەكەتىمىزدىڭ قالىپتاسۋ جولىندا ايانباي ەڭبەك سىڭىرگەن ازاماتتاردىڭ ءومىرباياندىق تاريحى مەن پورترەتتىك گالەرەياسىمەن تولىققان.
جيىندا ءسوز العان يدەيا اۆتورى گۋليا بابۋلوۆا اتالمىش جوبا ءارى قاراي جالعاسىن تابۋى مۇمكىن ەكەنىن ايتا كەلىپ:
– 2014 جىلى «جاڭا ءداۋىر. تابىس كودى» جوباسىن باستاعان بولاتىنبىز. ءبۇگىن ەكىنشى, ءۇشىنشى كىتابىن جارىققا شىعارىپ وتىرمىز. پرەزيدەنتىمىز ن.نازارباەۆتىڭ «ءبىز جاڭا قاھارمانداردى جاساۋىمىز كەرەك» دەگەن ءسوزىن ەستىگەن بويدا, وسىنداي جوبا جاساسام قايتەدى دەپ ويلانىپ قالدىم. اقىرى يدەيانى جۇزەگە اسىرىپ, قوعامنىڭ ءار سالاسىندا قىزمەت ەتەتىن ءتۇرلى ادامدار تۋرالى ەستەلىكتەردى ءبىر توپتاماعا جينادىق. ولاردىڭ ءارقايسىسى – ءوز ەڭبەكتەرىمەن بيىككە كوتەرىلگەن, ەل مۇددەسىنە قىزمەت ەتىپ جۇرگەن جاندار. شىن مانىندە, ونداي ۇزدىكتەر وتە كوپ. جوبانى جاساۋ كەزىندە قانشاما جايساڭ جاندارمەن تانىسىپ, تابىسىپ كەتتىك, – دەدى.
ۇلتتىق مۋزەيگە جينالعان ءبۇگىنگى قاھارماندار ەرلىگى مەن ەڭبەگىنە توقتالىپ وتكەن ول, كوپشىلىككە ۇسىنىلىپ وتىرعان ەنتسيكلوپەديالىق جيناقتىڭ ماڭىزى مەن ماقساتى تۋرالى ايتىپ ءوتتى.
− قازاق ەلىنىڭ كورنەكتى ايەلدەرى: ارمان العا جەتەلەپ. ۆىدايۋششيەسيا جەنششينى كازاحستانا: سوزيدايا مەچتۋ» كىتابىن شىعارۋداعى باستى ماقسات – قازاقستاندىق ايەلدەردىڭ ەلىمىزدىڭ تاۋەلسىزدىك الۋى مەن مەملەكەتتىگىمىزدى قالىپتاستىرۋعا قوسقان ۇلەسى جايلى قۇجاتتىق كۋالىك قالدىرۋ. باسىلىمعا ساياسات پەن بيز-
نەستە, قوعامدىق ءومىردە, ءبىلىم مەن سپورتتا, ونەر سالاسىندا, ءبىلىم بەرۋ جانە مەديتسينا سالاسىندا جەتىستىكتەرگە جەتكەن ايەلدەر تۋرالى وچەرك-
تەر ەنگىزىلگەن, – دەدى گ.بابۋلوۆا.
كىتاپقا ەنگەن كەيىپكەرلەردىڭ ءبىرى سيازبەك داليەۆ – پاراليمپيادا ويىندارىنىڭ چەمپيونى, ءجۇزۋدەن حالىقارالىق ءدارەجەدەگى سپورت شەبەرى. ءوزىنىڭ ايتۋىنشا, 12 جاسىندا اۋىر جاراقات الىپ, ەكى قولىنان ايىرىلعان.
«باسىندا وتە قيىن بولدى, – دەپ ەسكە الادى سيازبەك, – جاتتىقتىرۋشىم مەنى ۇيرەتۋ ءۇشىن, الدىمەن ءوزىنىڭ قولىن بايلاپ تاستاپ, ءجۇزىپ كورسەتتى. مەن سۋعا باتىپ كەتەم دەپ قاتتى قورقاتىن ەدىم. دەگەنمەن, ءبىر اپتا ىشىندە ءجۇزۋدى ۇيرەنىپ الدىم».
جارتى جىلعا جەتپەي ءجۇزۋگە ءابدەن توسەلىپ العان سيازبەك قالاارالىق تۋرنيرلەردە باق سىناپ ءجۇرىپ, جەڭىستى جولىن ءارى قاراي جالعاستىردى. 2011 جىلى اراب ءامىرلىگىندە وتكەن I دۇنيەجۇزىلىك پاراليمپيادا كەزىندە التىن مەدالعا قول جەتكىزەدى. باسىلىمدا سيازبەك سياقتى قوعام ومىرىندە بەلسەندىلىگىمەن كوزگە تۇسكەن, وتباسى مەن بالالار يگىلىگى ءۇشىن ۇلەس قوسىپ ءجۇرگەن قاراپايىم ەل ازاماتتارى ەسكەرۋسىز قالماعان. مىسالى, قوستانايلىق نۇرلان سادىقوۆ پەن جۇبايى قارلىعا ەكەۋى – كوپ بالالى وتباسى. بالالار ءۇيىندەگى ون بالانى باۋىرىنا باسىپ, اسىراپ-جەتكىزگەن ەكەۋى, ءبۇگىندە جاپىراعىن كەڭگە جايعان ماۋەلى ءبايتەرەككە اينالدى.
ءۇش مىڭ دانامەن جارىق كورگەن كىتاپ قازاقستاننىڭ بارلىق كىتاپحانالار جۇيەسىنە تاراتىلعان.
ايا ءومىرتاي, «ەگەمەن قازاقستان»
سۋرەتتى تۇسىرگەن ورىنباي بالمۇرات, «ەگەمەن قازاقستان»