وتىرىستا نەگىزگى ماسەلە بويىنشا بايانداما جاساعان مادەنيەت جانە سپورت ءمينيسترى ارىستانبەك مۇحامەدي ۇلى باعدارلامانىڭ ارقاسىندا ەلىمىزدە مەملەكەتتىك ءتىلدى مەڭگەرگەندەر قاتارى ارتىپ كەلە جاتقانىن ايتتى.
ءمينيستردىڭ ايتۋىنشا, 2016 جىلى قازاقستاندا مەملەكەتتىك ءتىلدى مەڭگەرگەن حالىق ۇلەسى 82 پايىزدى قۇراعان. ماسەلەن, 2014 جىلى مەملەكەتتىك ءتىلدى مەڭگەرگەن حالىق ۇلەسى 72,1 پايىز بولسا, 2015 جىلى 76,3 پايىزعا جەتكەن.
سونداي-اق باعدارلاما اياسىندا تەرمينولوگيا, اۋدارما جايىنداعى ماسەلەلەرگە دە بارىنشا ءمان بەرىلىپ, بۇل باعىتتا دا بىرقاتار جۇمىستار اتقارالىپ جاتقانىن العا تارتقان مينيستر, ونوماستيكاعا دا ايرىقشا كوڭىل بولىنەتىنىن ايتتى. بۇل رەتتە ا.مۇحامەدي ۇلى «ەگەمەن قازاقستان» گازەتىندە كوشە اتاۋلارى جايىندا جارىق كورگەن سىني ماقالالارعا قاتىستى ەلباسىنان تاپسىرما العانىن جەتكىزدى. (ايگۇل احانبايقىزى. «الماتىدا 34 اۋەزوۆ, 24 اباي كوشەسى بار» 19.01.2017. «ەگەمەن قازاقستان». عالىم ومارحان. «اتاۋعا اباي بولعان ابزال» 04.02.2017). ماقالادا كوتەرىلگەن ماسەلەنىڭ ءمان-جايى قارالىپ, ءتيىستى شەشىمدەر شىعارىلىپ جاتقانىن اتاپ ءوتتى.