شاراعا مەملەكەت پەن قوعامنىڭ بارلىق ماڭىزدى سالالارىندا تابىستى ەڭبەك ەتىپ جۇرگەن ەر-ازاماتتار مەن داڭقتى ايەلدەر قاتىستى. كىتاپتىڭ مازمۇنى تاۋەلسىز مەملەكەتىمىزدىڭ قالىپتاسۋ جولىندا ايانباي ەڭبەك سىڭىرگەن ازاماتتاردىڭ ومىرباياندىق تاريحى مەن پورترەتتىك گاللەرەياسىمەن تولىققان.
جيىندا ءسوز العان يدەيا اۆتورى گۋليا بابۋلوۆا اتالمىش جوبا ارى قاراي جالعاسىن تابۋى مۇمكىن ەكەنىن ايتا كەلىپ:
– 2014 جىلى «جاڭا ءداۋىر. تابىس كودى» جوباسىن باستاعان بولاتىنبىز. بۇگىن ەكىنشى, ءۇشىنشى كىتابىن جارىققا شىعارىپ وتىرمىز. پرەزيدەنتىمىز ن.نازارباەۆتىڭ «ءبىز جاڭا قاھارمانداردى جاساۋىمىز كەرەك» دەگەن ءسوزىن ەستىگەن بويدا, وسىنداي جوبا جاساسام قايتەدى دەپ ويلانىپ قالدىم. اقىرى يدەيانى جۇزەگە اسىرىپ, قوعامنىڭ ءار سالاسىندا قىزمەت ەتەتىن ءتۇرلى ادامدار تۋرالى ەستەلىكتەردى ءبىر توپتاماعا جينادىق. ولاردىڭ ارقايسىسى ءوز ەڭبەكتەرىمەن بيىككە كوتەرىلگەن, ەل مۇددەسىنە قىزمەت ەتىپ جۇرگەن جاندار. شىن مانىندە, ونداي ۇزدىكتەر وتە كوپ. جوبانى جاساۋ كەزىندە قانشاما جايساڭ جاندارمەن تانىسىپ, تابىسىپ كەتتىك, – دەدى.
ۇلتتىق مۋزەيگە جينالعان بۇگىنگى قاھارماندار ەرلىگى مەن ەڭبەگىنە توقتالىپ وتكەن ول, كوپشىلىككە ۇسىنىلىپ وتىرعان ەنتسيكلوپەديالىق جيناقتىڭ ماڭىزى مەن ماقساتى تۋرالى ايتىپ ءوتتى:
−«قازاق ەلىنىڭ كورنەكتى ايەلدەرى: ارمان العا جەتەلەپ. ۆىدايۋششيەسيا جەنششينى كازاحستانا: سوزيدايا مەچتۋ» كىتابىن شىعارۋداعى باستى ماقسات – قازاقستاندىق ايەلدەردىڭ ەلىمىزدىڭ تاۋەلسىزدىك الۋى مەن مەملمەكەتىگىمىزدى قالىپتاستىرۋعا قوسقان ۇلەسى جايلى قۇجاتتىق كۋالىك قالدىرۋ. باسىلىمعا ساياسات پەن بيزنەستە, قوعامدىق ومىردە, ءبىلىم مەن سپورتتا, ونەر سالاسىندا, ءبىلىم بەرۋ جانە مەديتسينا سالاسىندا جەتىستىكتەرگە جەتكەن ايەلدەر تۋرالى وچەركتەر ەنگىزىلگەن, – دەدى ول.
كىتاپقا ەنگەن كەيىپكەرلەردىڭ ءبىرى سيازبەك داليەۆ پاراليمپيادا ويىندارىنىڭ چەمپيونى, جۇزۋدەن حالىقارالىق دارەجەدەگى سپورت شەبەرى. ءوزىنىڭ ايتۋىنشا, 12 جاسىندا اۋىر جاراقات الىپ, ەكى قولىنان ايىرىلعان.
«باسىندا وتە قيىن بولدى, – دەپ ەسكە الادى سيازبەك, – جاتتىقتىرۋشىم مەنى ۇيرەتۋ ءۇشىن, الدىمەن ءوزىنىڭ قولىن بايلاپ تاستاپ, ءجۇزىپ كورسەتتى. مەن سۋعا باتىپ كەتەم دەپ قاتتى قورقاتىن ەدىم. دەگەنمەن ءبىر اپتا ىشىندە ءجۇزۋدى ۇيرەنىپ الدىم».
جارتى جىلعا جەتپەي جۇزۋگە ابدەن توسەلىپ العان سيازبەك قالاارالىق تۋرنيرلەردە باق سىناپ ءجۇرىپ, جەڭىستى جولىن ارى قاراي جالعاستىردى. 2011 جىلى اراب امىرلىگىندە وتكەن I دۇنيەجۇزىلىك پاراليمپيادا كەزىندە التىن مەدالعا قول جەتكىزەدى. باسىلىمدا سيازبەك سياقتى قوعام ومىرىندە بەلسەندىلىگىمەن كوزگە تۇسكەن, وتباسى مەن بالالار يگىلىگى ءۇشىن ۇلەس قوسىپ جۇرگەن قاراپايىم ەل ازاماتتارى ەسكەرۋسىز قالماعان. مىسالى, قوستانايلىق نۇرلان سادىقوۆ پەن جۇبايى قارلىعا ەكەۋى – كوپ بالالى وتباسى. بالالار ۇيىندەگى ون بالانى باۋىرىنا باسىپ, اسىراپ-جەتكىزگەن ەكەۋى, بۇگىندە جاپىراعىن كەڭگە جايعان ماۋەلى بايتەرەككە اينالدى.
3 مىڭ دانامەن جارىق كورگەن كىتاپ قازاقستاننىڭ بارلىق كىتاپحانالار جۇيەسىنە تاراتىلعان.
ايا ءومىرتاي,
«ەگەمەن قازاقستان»