ۇلتتىق ەكونوميكا مينيسترلىگىنىڭ مالىمەتتەرىنە قاراساق, ايەلدەردىڭ باسقارۋىنداعى ورتا ءجانە شاعىن كاسىپكەرلىك سانى 2016 جىلدىڭ 1 قاڭتارىندا 647,082 ادامدى قۇراعان, ال جالپى ەلىمىز بويىنشا 1,530,258 شاعىن جانە ورتا بيزنەس سۋبەكتىسى قىزمەت ەتەدى. الەمنىڭ 20 ەلىندە وتكىزىلگەن 87 زەرتتەۋدىڭ ءناتيجەلەرىنە ءسايكەس ايەلدەر باسقاراتىن كاسىپورىندار ەڭ تابىستى بولاتىنى انىقتالعان. زەرتتەۋشىلەر بيزنەسپەن اينالىساتىن ايەلدەر قولاستىنداعى قىزمەتكەرلەرى, قوعام جانە قورشاعان ورتانىڭ قامىن كوبىرەك ويلايتىنىن مويىنداۋدا.
ماسەلەن, كوپكە دەيىن ەلىمىزدە «ايەلدەر كاسىپكەرلىگى» دەگەن ۇعىمنىڭ وزىنە كۇمانمەن قاراعان كەزەڭدەر بولدى. ال بۇگىندە ايەلدەردىڭ ىسكەرلىك كەڭەستەرى قۇرىلىپ, كاسىپكەر ايەلدەرگە ارنالعان ارنايى بانك ونىمدەرى مەن باعدارلامالارى پايدا بولۋدا.
الماتىدا قازاقستانداعى ايەلدەر كاسىپكەرلىگىن دامىتۋ جانە قولداۋعا ارنالعان ءباسپاسوز ءماجىلىسى ءوتىپ, وندا وسى باعىتتاعى ناقتى ماسەلەلەر ءسوز بولدى. بۇل ءماسليحاتتىڭ باستى جاڭالىعى – استانا بانكى وتاندىق بانك قىزمەتتەرى نارىعىندا بۇرىن بولماعان «قىزعىلت جاعا» اتتى الەۋمەتتىك جوبانى جاريا ەتتى.
«ايەلدەر كوشباسشىلىعى قورى» قق جوبا جونىندەگى ديرەكتورى سۆەتلانا بوگاتىرەۆا, ورتالىق ازياداعى «بۇۇ – ايەلدەر» قۇرىلىمىنىڭ وكىلى يلەين م.كونكيەۆيچ, دامۋ قورى باسقارماسى ءتوراعاسىنىڭ ورىنباسارى نۇرلان اقشانوۆ قاتىسقان شاراعا ەلىمىزدەگى بىرقاتار كاسىپكەرلەر مۇددەلىلىك تانىتتى.
«ايەلدەر كاسىپكەرلىگىنىڭ بۇكىل ماڭىزدىلىعى مەن وزەكتىلىگىن ءتۇسىنە وتىرىپ, «قىزعىلت جاعا» اتتى ءبىرەگەي جوبانى ىسكە قوسىپ وتىرمىز. وسىدان ءبىر جىل بۇرىن ايەلدەرگە ءتيىمدى مۇمكىندىكتەر ۇسىناتىن تۇڭعىش كارتالاردى ىسكە قوسقان ەدىك. ول ءبىزدىڭ كليەنتتەرىمىز اراسىندا ۇلكەن سۇرانىسقا يە بولدى. ەندى ءساۋىر ايىنان باستاپ ايەلدەرگە تيەسىلى كارتالار ارقىلى تاۋارلار مەن قىزمەتتەر قولما-قول اقشاسىز ءتولەنگەن جاعدايدا بانك ايەلدەر اراسىنداعى كاسىپكەرلىكتى دامىتۋ جانە قولداۋ ءۇشىن كليەنتتىڭ جۇمساعان سوماسىنىڭ 0,7 پايى-
زىن ايەلدەر كوشباسشىلىعى قورىنا اۋدارىپ وتىراتىن بولادى. بۇل سومانى بانك تولىعىمەن ءوز قارجىسى ەسەبىنەن تولەمەك. ناتيجەسىندە كليەنت تولەم جاساۋ ارقىلى ايەلدەر بيزنەسىن دامىتۋعا ءوز ۇلەسىن قوسادى. سونداي-اق, وعان ادەپكى مولشەردە كەشبەك سوماسى قايتارىلادى. قورعا كومەك كورسەتۋ ءۇشىن, ەڭ باستىسى, ءتولەم ايەلدەرگە تيەسىلى كارتادان جاسالۋ كەرەكتىگىن ەسكەرۋ قاجەت. وسىلايشا يگى ىسكە كليەنت تە, بانك تە اتسالىسپاق», دەدى استانا بانكى باسقارماسىنىڭ ءتوراعاسى ەسكەندىر مايلىباەۆ.
وعان قوسا, ايەلدەرگە بيزنەس ءجۇرگىزۋگە قاتىستى پايدالى اقپاراتتى ۇسىنۋ ءۇشىن 1 ءسا-
ۋىردەن ءبىرەگەي ۆەب-الاڭ ىسكە قوسىلماق. سايتتا ايەلدەر كاسىپكەرلىگىن قارجىلاندىرۋ باعدارلامالارىنا قاتىستى بۇكىل اقپارات قامتىلاتىن بولادى. سون-
داي-اق, وسىندا ايەلدەرگە ارنالعان تانىمال سايتتاردى توپتاستىرىپ, جاڭالىقتاردى قاداعالاۋعا ءمۇمكىندىك بەرەتىن جاڭالىقتار اگرەگاتورى دا قىزمەت جاساماق. كاسىپكەر ايەلدەر جەكە بلوگتارىن ءجۇرگىزىپ, تاجىريبەسىمەن, يدەيالارىمەن بولىسۋگە, سەرىكتەستەردى تاۋىپ, قاجەتتى بايلانىستار ورناتۋعا ءمۇمكىندىك الماق. سونىمەن قاتار, سايت ارقىلى قارجىلىق جانە زاڭگەرلىك ماسەلەلەرگە قاتىستى كەڭەس الۋعا دا بولادى. جەكە كاسىپكەرلىكتى, جاۋاپكەرشىلىگى شەكتەۋلى سەرىكتەستىكتى نەمەسە بانكتە شوتتى قالاي اشۋعا بولادى؟ ەلەكتروندى تسيفرلى قولتاڭبانى قالاي الۋعا بولادى نەمەسە سالىق سالۋ ۇلگىسى قالاي تولتىرىلادى؟ وسى جانە باسقا دا كوپتەگەن ساۋالداردى ونلاين-مەنەدجەرلەردەن سۇراپ بىلۋگە بولادى.
ايەلدەر كوشباسشىلىعى قورىنىڭ جوبا جونىندەگى ديرەكتورى سۆەتلانا بوگاتىرەۆانىڭ ايتۋىنشا, وسى جوبا ارقىلى الماتى, استانا, قاراعاندى, ورال جانە شىمكەنت قالالارىندا وقۋ كونفەرەنتسيالارى وتكىزىلمەك. «ءبىز الماتى قالاسىندا 3 جىل ىشىندە جيناقتالعان ءتاجىريبە نەگىزىندە يگەرىلىپ, كاسىپكەر ايەلدەردىڭ قاجەتتىلىكتەرى مەن ۇمىتتەرىن زەرتتەۋگە نەگىزدەلگەن تاسىلدەمەنى قولدانباقپىز. وسى فورمات اياسىندا كاسىبي سپيكەرلەر جانە كاسىپكەر ايەلدەر ءبىزدىڭ ەلىمىزدە جيناقتاعان ءتاجىريبەسىمەن ءبولىسىپ, ءبىر-ءبىرىن وقىتاتىن بولادى. بۇل ءتاسىل ءناتيجەلى ەكەنىن كورسەتتى», دەيدى س.بوگاتىرەۆا.
«ايەلدەر كوشباسشىلىعى قورىمەن بىرگە وسى جوبانى جۇزەگە اسىرۋ كەزىندە ءبىز مەگاپوليستەردەگى ايەلدەردى عانا ەمەس, سونداي-اق, شالعاي ايماقتارداعى ىسكەر حانىمداردى بارىنشا قامتىپ, وسى ىسكە تارتۋدى كوزدەدىك. 5 قالادا كونفەرەنتسيالار وتكىزۋ ارقىلى ءبىز بۇكىل قازاقستاننان كەم دەگەندە 500 ايەلدى وقىتۋدى جوسپارلاپ وتىرمىز. وسى جوبانى ءجۇزەگە اسىرۋ ەلىمىزدە ايەلدەر اراسىنداعى كاسىپكەرلىكتىڭ دامۋىنا جاڭا قوزعاۋ سالاتىنىنا سەنىمدىمىز», دەدى ءباسپاسوز ءماسليحاتىن قورىتىندىلاعان ە.مايلىباەۆ.
ايناش ەسالي,
«ەگەمەن قازاقستان»
الماتى