مۇعالىمدەر مۇڭايۋلى, شاكىرتتەر شاراسىز

ايماق باسشىسىنا پەداگوگتاردىڭ ءبىرىنشى سىنىپقا ارنالعان جاڭا جۇيەدەگى جۇمىسى كورسەتىلدى. ەڭ باستى پروبلەما – قاعاز جەتىسپەۋشىلىگى. مۇعالىمدەر باقىلاۋ مەن وزىندىك جۇمىستاردى وقۋشىلارعا وزدەرى شىعارىپ بەرەدى. ءبىر توقساندا قاعاز الۋعا ورتا ەسەپپەن 15 مىڭ تەڭگە قاجەت. ال بيۋدجەتتە وعان ءتيىستى قارجى قاراستىرىلماعان. پەداگوگتار قاعازدى ءوز اقشاسىنا الۋعا نەمەسە اتا-انالاردان كومەك سۇراۋعا ءماجبۇر. اتا-انالاردىڭ «مۇعالىمدەر قيت ەتسە اقشا جينايدى» دەۋىنىڭ ءمانىسى وسىندا جاتقان سىڭايلى.

– ءبىلىم باسقارماسىنىڭ باسشىسى رەتىندە ءسىز وسىنى دۇرىس دەپ سانايسىز با؟ – دەدى وبلىس اكىمى اسحات ايماعامبەتوۆكە. – بۇل مەملەكەتتىك مەكەمە ەمەس پە, مۇعالىمدەردىڭ ەڭبەكاقىسى تومەن, ونىڭ ۇستىنە جەكە شىعىندالادى. بۇل ماسەلەنى شەشۋدى تاپسىرامىن.

ەڭبەك كابينەتىنىڭ ستانوكتارى مەن وقۋ قۇرالدارى توزعان. 2013 جىلى بىرنەشە جاڭا ۆەرستاك پەن ءبىر ستانوك الىنىپتى. قالعان جابدىقتار جاڭارتىلماعان. جالپى, وبلىستا 245 مەكتەپتە «تەحنولوگيا» ءپانى بويىنشا جابدىقتاردى جاڭارتۋ قاجەت ەكەنى انىقتالدى. ءوڭىر باسشىسى جاڭا جابدىقتاردى ساتىپ الۋ ماسەلەسىن شەشۋگە ۋادە بەردى. مەكتەپتىڭ اسحاناسىنداعى پروبلەما – ەسكىرگەن جانە جارتىلاي جۇمىس ىستەمەيتىن جابدىقتار جايى. نەگىزى مەكتەپ جانىنداعى اسحانالاردىڭ ءبارى جالعا بەرىلەدى. زاڭ بويىنشا جالعا الۋشىلارمەن كەلىسىم ءبىر جىلعا جاسالادى. سوندىقتان جابدىقتاردى اۋىستىرۋعا قوماقتى قارجى جۇمساۋ ولار ءۇشىن ءتيىمسىز.

– ءبىز زاڭناماعا اسحانالاردى مەملەكەت-جەكە مەنشىك ارىپتەستىگى نەگىزىنە اۋىستىرۋ جانە جالعا الۋشىلارمەن كەلىسىمدى بەس جىلعا دەيىن بەكىتۋ تۋرالى وزگەرىستەر ەنگىزۋدى ۇسىنباقپىز, – دەدى ءبىلىم باسقارماسىنىڭ باسشىسى ا.ايماعامبەتوۆ.

وبلىس باسشىسى بۇل باستامانى قولدادى. بۇدان باسقا, سپورت زالى مەن توبەسىنەن سۋ اعىپ تۇرعان كابينەتتەردى ارالادى. مۇعالىمدەر مەن اتا-انالار سىنىپتاردى جوندەۋگە قاجەت اقشانى ءوز قالتالارىنان تولەۋگە ءماجبۇر ەكەندىكتەرىن ايتتى. بيۋدجەت قارجىسى عيماراتتى كۇتىپ-ۇستاۋعا عانا جۇمسالادى. كۇردەلى جوندەۋ جۇمىستارى 27 جىلدان بەرى جۇرگىزىلمەگەن. كەيبىر سىنىپتار جابىق. شيرەك عاسىردا شيراق قيمىل جاساماعان مەكتەپ كىنالى مە, الدە...

وبلىس اكىمى عيماراتتا كۇردەلى جوندەۋ جۇمىستارىن قولعا الۋدى تاپسىردى. بۇل ءۇشىن 174 ملن تەڭگە قاجەت. ە.قوشانوۆ پروبلەمالاردى بيۋدجەتتىڭ مۇمكىندىگىن ەسكەرە وتىرىپ, كەزەڭ-كەزەڭىمەن شەشۋگە ۋادە بەردى.

ميراس اسان,

«ەگەمەن قازاقستان»