ستۋدەنتتەر سايىسىن جوعارى دەڭگەيدە وتكىزۋدىڭ بار امالىن قاراستىرعان ۋنيۆەريسادا-2017 ديرەكتسياسىنىڭ مالىمدەۋىنشى, بۇل جارىستا 236 744 بيلەت ساتىلىپ, جالپى ۋنيۆەريسادا تاريحىندا ەڭ كوپ ادام قىزىقتاعان سپورتتىق شارانىڭ ءبىرى بولعان. «ۋنيۆەرسيادا تاريحىندا ەڭ جوعارى دەڭگەيدە ۇيىمداستىرىلعان جارىس – قازاقستاندا وتكەن ستۋدەنتتەر سايىسى», – دەپ الەمدىك اقپارات قۇرالدارىنىڭ جارىسا جازۋى دا ەلىمىز ءۇشىن ۇلكەن ماقتانىش بولعانى راس.
راسىندا, وڭتۇستىك استانامىزدا قىسقى سپورت تۇرلەرىنە ارنالعان سۋ جاڭا نىساندار بوي كوتەردى. قازىر سول ءزاۋلىم سپورت سارايلارىنىڭ ىشىندە سپورتتىڭ بىرنەشە تۇرىنەن ۇيىرمەلەر اشىلىپ, جاس ورەندەرىمىزدىڭ سپورتقا دەگەن قىزىعۋشىلىعى كۇن ساناپ ارتىپ كەلەدى. «قىستىڭ قامىن جاز ويلا» دەگەندەي, قىسقى سپورتتىڭ جايىن جازدا ويلاعاننىڭ زيانى جوق. مىسالى, قىسقى سپورت تۇرلەرىنەن الەمدە كوش باستاعان اقش, نورۆەگيا, نيدەرلاند, شۆەتسيا, كانادا سەكىلدى مەملەكەتتەردىڭ تاۋلى ايماقتارىندا قىسقى سپورت تۇرلەرىنەن بايراقتى جارىستار تۇراقتى وتكىزىلىپ تۇرادى. ەۋروپا حالىقتارى قىسقى سپورتتى دامىتۋ اياسىندا ءتۇرلى جوبالاردى جىل بويى ىسكە اسىرىپ جاتادى ەكەن.
سوندىقتان بولار, ەۋروپا ەلدەرىنىڭ وكىلدەرى قىسقى سپورت تۇرلەرىنەن الەمدىك جارىستاردا توپ جارىپ, جەڭىس تۇعىرىنان كورىنىپ جاتادى. ءبىز ولاردىڭ ونەرىنە قىزىعا دا قىزعانا قاراپ جاتامىز. دەگەنمەن, وزىمىزدە بار قانشاما مۇمكىندىكتى ءتيىمدى قولدانا المايمىز. قازاقستان حالقىنا جاراتۋشىنىڭ ءوزى تاۋ دەسە تاۋ, سۋ دەسە سۋ, دالا دەسە دالانى بەرىپ قويعان. قىس ۋاقىتىمەن كەلىپ, ۋاقىتىمەن كەتەدى. تەك العا ۇمتىل, سپورتپەن اينالىس. تابيعات بار بايلىعىن قازاقتىڭ كەڭپەيىل كوڭىلىنە تارتۋ ەتكەن. سول بارىمىزدى ۇقساتا بىلەيىك. قازىرگى تاڭدا قىسقى سپورت تۇرلەرىنەن قازاقستاننىڭ الەم ارەناسىنداعى اياق الىسى جامان ەمەس. اسىرەسە, وتكەن ۋنيۆەرسيادا, ازيا ويىندارى مەن الەم چەمپيوناتتارىندا ەل قورجىنىنا التىن-كۇمىستەن ولجا سالعان يۋليا گالىشەۆا مەن دميتري رەيحەردتەردىڭ تاماشا جەتىستىكتەرى الەم ەلدەرىنىڭ قازاقستانعا دەگەن قۇرمەتىن ەسەلەي ءتۇستى. جانبوتا الدابەرگەنوۆا سەكىلدى قاراكوزدەرىمىزدىڭ دە تابىستى جولى قازاق قىزدارىنا ۇلگى بولدى. دەگەنمەن, وسەم دەگەن ەلگە جان-جاقتى جۇمىستى توقتاتپاعان ءلازىم. قىسقى سپورتتى دامىتۋ ءىسىن اۋىل-ايماقتان باستاعان ءجون. ارينە, قالاداعى سپورت عيماراتتارى ەل يگىلىگىنە قىزمەت ەتەرى ھاق. ال ەلىمىزدىڭ قارلى وڭىرلەرىندە قىسقى سپورتقا دۇرىس كوڭىل بولىنبەۋى ءجون ەمەس, ارينە. بالا كەزىمىزدە كوشەدە حوككەي ويناۋشى ەدىك. سوندا قولعا تۇسكەن يمەك تاياقتى الىپ ويناي بەرەتىنبىز. قازىر سپورت دۇكەنىنىڭ ەسىگىن اشساڭ, نە كەرەكتىڭ ءبارى بار. ءبىر عانا ماسەلە, جاستاردىڭ وسى قىسقى سپورت تۇرلەرىنە دەگەن قىزىعۋشىلىعىن وياتاتىن شارالاردى كوبەيتە ءتۇسۋ قاجەت. بۇل ماسەلە وتباسىلىق تاربيەنىڭ دە نەگىزىنە كىرگەنى ابزال.
اقىن ورداباي ۇلى