تالقىلاۋ الدىندا سەناتورلار يكرام ادىربەكوۆ, مۇحتار التىنباەۆ, سەرىك جاقسىبەكوۆ, گەورگي كيم, ءلاززات قيىنوۆ سارىاعاش شەكارا جاساعىنىڭ «جىبەك جولى» وتكىزۋ بەكەتى مەن «دارحان» شەكارا زاستاۆاسىندا بولدى. ولار قازاقستاندىق شەكاراشىلاردىڭ جاۋىنگەرلىك قىزمەتىمەن تانىسىپ, ينفراقۇرىلىم نىساندارىن ارالادى.
ەلىمىزدىڭ شەكارا قىزمەتىنىڭ باسشىسى, گەنەرال-مايور دارحان ءدىلمانوۆ وتىرىس بارىسىندا شەكاراداعى قازىرگى جاعداي, اتقارىلعان جۇمىستار, سونداي-اق شەشۋدى تالاپ ەتەتىن وزەكتى ماسەلەلەر تۋرالى جان-جاقتى حاباردار ەتتى. «ۇلتتىق قاۋىپسىزدىككە تونەتىن قاۋىپ-قاتەرلەردى (تەرروريزم, ەكسترەميزم, ەسىرتكى, قارۋ-جاراق كونترابانداسى, زاڭسىز كوشى-قون) ەسكەرە وتىرىپ, شەكارا قىزمەتى شىعىس جانە سولتۇستىك باعىتتارداعى شەكارانى كۇزەتۋ دەڭگەيىن تومەندەتكەن جوق, ءارى باستى نازاردى وڭتۇستىك جانە وڭتۇستىك-باتىس ستراتەگيالىق باعىتتارعا اۋدارۋدا», – دەدى ۇقك توراعاسىنىڭ ورىنباسارى-شەكارا قىزمەتىنىڭ ديرەكتورى د.ءدىلمانوۆ.
قازىرگى تاڭدا قازاقستان-قىرعىزستان جانە قازاقستان-تۇرىكمەنستان مەملەكەتتىك شەكاراسىن شەگەندەۋ پروتسەسى اياقتالدى. قازاقستان-قىرعىزستان شەكاراسىن شەگەندەۋ مەن ءتارتىبى تۋرالى حالىقارالىق شارتتارعا قول قويۋعا دايىندىق جانە كەلىسۋ جۇمىستارى جۇرگىزىلۋدە.
2017 جىلعى قاڭتاردان باستاپ بۇگىنگى كۇنگە دەيىن مەملەكەتتىك شەكارانى كۇزەتۋ كەزىندە شەكارا ايماعىندا 3 545 قۇقىق بۇزۋشىلىقتىڭ جولى كەسىلدى. 75,5 كيلوگرامم ەسىرتكى زاتى (ونىڭ ىشىندە, 50 كيلوگرامنان استامى – گەروين), سونداي-اق 16 قارۋ مەن 523 وق اينالىمنان الىندى.
داريعا نازارباەۆا وڭتۇستىك قازاقستان وبلىسىنا ەكى كۇندىك ساپاردى قورىتىندىلاي كەلىپ, شەكارا قىزمەتىنىڭ تەحنيكالىق جابدىقتالۋىنىڭ جوعارى دەڭگەيىن اتاپ ءوتتى. «بۇل سالانىڭ باسىمدىققا يە ەكەنى بارشاعا بەلگىلى, اسكەري قىزمەتشىلەرگە الەۋمەتتىك جاعىنان قورعالۋى ءۇشىن بارلىق جاعداي جاسالادى. ماجىلىستە اسكەري قىزمەت تۋرالى زاڭناماعا اسكەري قىزمەتشىلەردى تۇرعىن ۇيمەن قامتاماسىز ەتۋ ماسەلەلەرىن ەلەۋلى تۇردە جەڭىلدەتەتىن تۇزەتۋلەر ەنگىزىلدى. ول – وتە اۋقىمدى جۇمىس, ونى دەپۋتاتتاردىڭ ەڭبەگى دەپ سانايمىن», – دەدى سەناتور رەسپۋبليكالىق جانە ايماقتىق بۇقارالىق اقپارات قۇرالدارى وكىلدەرىنە بەرگەن سۇحباتىندا.
كوميتەت ءتورايىمى د.نازارباەۆا بيۋدجەت قارجىسىن ەلەۋلى تۇردە وڭتايلاندىراتىن بىرىڭعاي اۆياتسيا قىزمەتىن قۇرۋ كەرەك دەپ سانايدى. «جالپى العاندا, قيىندىقتارعا قاراماستان, ادال قىزمەت ەتەتىن ءبىزدىڭ اسكەريلەرگە ريزاشىلىعىمدى بىلدىرەمىن. ءبىز وسى ماماندىقتى تاڭداعان ادامدارعا زور قۇرمەتپەن قاراپ, ولاردىڭ اماندىعىنا تىلەكشى بولۋىمىز كەرەك. الدا قازاقستان قارۋلى كۇشتەرىنىڭ 25 جىلدىعى كەلە جاتىر, سوندىقتان ءبىزدىڭ اسكەريلەرگە جۋرناليستەردىڭ نازار اۋدارۋىن وتىنەمىن. ولار ءبىزدىڭ بەيبىتشىلىگىمىزدى قامتاماسىز ەتىپ كەلەدى. قوعامدى وسى ماماندىققا قۇرمەت كورسەتۋگە تاربيەلەۋ كەرەك», – دەدى سەناتور.
سەناتورلار سونداي-اق رەسپۋبليكالىق «جاس ۇلان» اسكەر مەكتەبىندە بولدى. ولار وتانىمىزدىڭ جاس قورعاۋشىلارى – مەكتەپ تاربيەلەنۋشىلەرىمەن كەزدەسىپ, اسكەري مەكتەپكە كومپيۋتەرلىك سىنىپ جانە دارىگەرلىك جابدىقتار تارتۋ ەتتى.
باقتيار تايجان,
«ەگەمەن قازاقستان»