قازاق حالقى قاشاننان جاۋىنگەر حالىق قوي. سوندىقتان, جەكپە-جەك ونەرى ءبىزدىڭ قانىمىزعا ابدەن ءسىڭىپ كەتكەن. XX عاسىردىڭ ورتا تۇسىندا قازاق دالاسىنا شوقىر بولتەك ۇلى بوكس دەگەن ۇلى ونەردىڭ شىبىعىن قادادى. سول شىبىق بۇگىندە ماۋەلى بايتەرەككە اينالدى. كەڭەس وداعى كەزىنىڭ وزىندە تالاي دارىندار شىقتى. ال تاۋەلسىزدىك جىلدارى تىپتەن كوبەيدى. بىراق, سول بوكستىڭ ءوزى ەكىگە بولىنەدى. بىرەۋى – اۋەسقوي, ەكىنشىسى – كاسىپقوي بوكس. العاشقىسىنان الەمدەگى دەرجاۆالاردىڭ ءبىرىمىز. وليمپيا ويىندارىنان التىنسىز قايتقان ەمەسپىز. ال ەكىنشىسى ەندى-ەندى قانات جايىپ كەلەدى. توقسانىنشى جىلداردىڭ سوڭىندا جەرلەسىمىز ۆاسيلي جيروۆ شىعىپ, دۇنيەنى ءدۇر سىلكىنتكەن ەدى. ودان كەيىنگى بۋىننىڭ اراسىندا گەننادي گولوۆكين, بەيبىت شۇمەنوۆ, قانات يسلام سەكىلدى جىگىتتەردىڭ جۇلدىزى جارقىرادى. قازىر كاسىپقوي بوكسقا اۋىسىپ جاتقان قازاق جىگىتتەرىنىڭ سانى كوپ. دەگەنمەن, الەمدىك دەڭگەيدە اتاعى الىسقا كەتكەن ەشكىم بولماي تۇر. ويتكەنى, كاسىپقوي بوكس دەگەن تازا بيزنەس. بۇل جەردە سپورتتىق پرينتسيپتەن گورى مول اقشا ءبىرىنشى ورىندا تۇرادى. سوندىقتان, ءاربىر جەكپە-جەگى ءۇشىن گونوراردى كوپ الاتىندار مەن جارناماسى جاقسىلاردىڭ تانىمالدىلىعى جوعارى. سونداي-اق, الەمنىڭ كىلەڭ ۇزدىكتەرىمەن جۇدىرىقتاسىپ, ولاردى جەڭسەڭ عانا مەرەيىڭ اسقاقتايدى. كەيبىر جىگىتتەر وزدەرىنەن دەڭگەيى وتە تومەن افريكا, كولۋمبيا ەلدەرىنىڭ بوكسشىلارىن ۇتىپ, جەڭىستەرىنىڭ سانىن كوبەيتۋمەن شەكتەلىپ ءجۇر. بۇل جاعداي بوكسشىعا ابىروي اپەرمەيدى.
وسى تۇرعىدان كەلگەندە, قازىرگى كاسىپقوي بوكستا باستى جۇلدىزىمىز گەننادي گولوۆكيننىڭ 160 فۋنت سالماق دارەجەسىندەگى ساۋل الۆارەس (كانەلو), بيللي دجو سوندەرس سەكىلدى مىقتىلاردى ۇتىپ, ءابسوليۋتتى چەمپيون بولعانىن قالايمىز. سونان سوڭ, باسقا سالماققا اۋىسسا دەگەن تىلەگىمىز بار. اتاقتى كاسىپقوي بوكسشىلاردىڭ كوبىسى بىرنەشە سالماق دارەجەسىندە چەمپيون بولىپ, جانكۇيەرلەر مەن مامانداردى ەرىكسىز مويىنداتقان. ونداي دارەجەگە جەتۋگە گولوۆكيننىڭ تولىق قاۋقارى بار. باستىسى, پروموۋتەرى ساۋاتتى جۇمىس ىستەي ءبىلۋى قاجەت.
ەندى, گەنناديدىڭ دەنيەل دجەيكوبسپەن ءوتكىزگەن سوڭعى جەكپە-جەگىنە توقتالىپ وتسەك.
جەرلەسىمىز شارشى الاڭدا العاش رەت 12 راۋندتىق جەكپە-جەكتى تولىعىمەن وتكىزدى. سوڭعى جىلدارى بارلىق قارسىلاستارىن نوكاۋتپەن ۇتىپ, جانكۇيەرلەرىن سوعان ابدەن ۇيرەتىپ العان ەدى. بۇل جولى قارسىلاسىن ۇرىپ قۇلاتپاعانى ماماندار مەن كورەرمەندەردى تاڭعالدىرعانى راس.
جەكپە-جەك الدىندا ەكى بوكسشى سالماق ولشەگەن بولاتىن. سوڭعى سالماق ولشەۋ راسىمىندە گەناديدىڭ سالماعى 159,6 فۋنت (72,4 كيلو) بولسا, دەنيەلدىڭ سالماعى 159,8 فۋنت (72,5 كيلو) تارتتى.
العاشقى راۋندتاردا ەكى بوكسشى ءبىر-ءبىرىنىڭ وسال تۇسىن ىزدەپ, زەرتتەۋمەن بولدى. ءتورتىنشى كەزەڭدە گەنانىڭ ءبىر جويقىن سوققىسى قارسىلاسىن ەسەڭگىرەتكەن ەدى. دەگەنمەن, دجەيكوبس تەگەۋرىن تانىتىپ, تىعىرىقتان جول تاۋىپ كەتتى. سوڭعى راۋندتاردا ەكى بوكسشى دا شارشاپ قالدى. بىراق قارسىلاسىنا قاراعاندا گولوۆكيننىڭ كوپ سوققى جاساعانى راس. ناتيجەسىندە, جەرلەسىمىز كەزەكتى جەڭىسىن تويلادى. بىراق, ۇزاققا سوزىلعان نوكاۋتتار سەرياسى وسى جەردە توقتادى. دجەيكوبستىڭ 7-8-9 راۋندتارداعى ەرەكشە بەلسەندىلىگىن ايتا كەتكەن دە ءلازىم.
ءۇش تورەشى تيىسىنشە, ءوز ەسەپتەرىندە 115-112, 114-113, 115-112 دەپ باعالاعان ەكەن. ءسويتىپ, گەننادي ءوزىنىڭ كاسىپقوي بوكستاعى 37-ءشى جەڭىسىنە قول جەتكىزدى. قاراعاندىلىق ورەن ورتا سالماق دارەجەسىندە WBA (Super), IBO جانە WBC نۇسقالارى بويىنشا الەم چەمپيونى اتاعىن ساقتاپ قالدى. ول WBA (Super) بەلبەۋىن 17-ءشى, IBO بەلبەۋىن 15-ءشى جانە WBC بەلبەۋىن 2-ءشى رەت قورعادى.
گولوۆكين وسى جەڭىسى ءۇشىن 2,5 ميلليون دوللار كولەمىندە سىياقى الدى. بۇل ونىڭ اقش جەرىندەگى قوماقتى تابىسى. جالپى, گەننادي سپورتتىق مانسابىنداعى ەڭ ءىرى تابىسىنا وتكەن جىلى ۇلىبريتانيادا كەلل برۋكتى جەڭگەندە قول جەتكىزگەن بولاتىن (4 ميلليون اقش دوللارى). جەرلەسىمىزدەن جەڭىلگەن دەنيەل دجەيكوبس تا سىياقىدان قۇر الاقان قالمادى. وعان 1,75 ميلليون دوللار كولەمىندە گونورار بەرىلدى.
دجەيكوبس ءوزىنىڭ جەڭىسكە جەتكەنىنە سەنىمدى. تورەشىلەردىڭ شەشىمى ادىلەتسىز دەپ وتىر.
– مەن بۇل كەزدەسۋدە جەڭىسكە جەتتىم. جانكۇيەرلەر مەنىڭ بۇل پىكىرىممەن كەلىسەدى دەپ ويلايمىن. تىم قۇرىعاندا ەكى راۋندتا قارسىلاسىمنان ۇزدىك بولدىم. بىراق, بۇل بوكس. البەتتە, ول ماعان قاراعاندا تانىمال. سوندىقتان ادىلەتسىزدىكتىڭ قۇربانى بولدىم. گولوۆكين مەن كانەلونىڭ جەكپە-جەگىنە ۇلكەن كولەمدە قارجى تىگىلىپ وتىر. سوندىقتان, وسى جولى ول جەڭىلگەندە بۇل كەزدەسۋدىڭ وتپەي قالۋ ىقتيمالدىلىعى جوعارى بولۋشى ەدى. بۇل جاعداي ءبىزدىڭ جەكپە-جەككە ءوز اسەرىن تيگىزدى. مەن سوڭىنا دەيىن بارىپ, ونى شەگىنۋگە ءماجبۇر ەتتىم. ءوزىمنىڭ جەڭىلمەگەنىمە سەنىمدىمىن. قارىمتا قايتارعىم كەلەدى. بىراق, وعان گەننادي كەلىسە مە, جوق پا بىلمەيمىن. ءوزىمنىڭ ورتا سالماقتاعى ۇزدىك بوكسشى ەكەنىمە سەنىمدىمىن. مەن گولوۆكيننەن شارشى الاڭدا بۇدان دا جوعارى قاۋقار كۇتكەن ەدىم. الايدا, ولاي بولماي شىقتى, – دەيدى دجەيكوبس.
ال گەنناديدىڭ پىكىرى مۇلدەم باسقا. قازاقستاندىق ءوزىنىڭ كۇشىن تەكسەرىپ كورۋ ماقساتىندا جەكپە-جەكتى سوڭىنا دەيىن سوزعانىن ايتادى.
– بۇل بوكس. ماعان تورەشىلەردىڭ شەشىمىمەن انىقتالاتىن 12 راۋندتىق جەكپە-جەك قاجەت بولدى. ماعان جاقسى, ساپالى جەكپە-جەكتەر كەرەك. ەگەر دەنني قارىمتا كەزدەسۋدى قالاسا, مەن وعان ءمۇمكىندىك بەرەمىن, – دەيدى گولوۆكين.
زادى, دجەيكوبس ءبىر ولىمنەن امان قالعان بوكسشى. 2011 جىلى ۆەلوسيپەد تەۋىپ جۇرگەن جەرىندە قۇلاپ, ەسىنەن تانىپ قالادى. اۋرۋحاناعا جەتكىزىلگەندە ءوزىنىڭ قاتەرلى ىسىكپەن اۋىراتىنىن بىلگەن. بوكسشى سول اتى جامان اۋرۋدى جەڭىپ, كاسىپقوي سپورتقا قايتا ورالدى. سودان كەيىن شارشى الاڭدا ەشكىمنەن ۇتىلمادى. ال ونىڭ الدىندا رەسەيلىك دميتري پيروگتان نوكاۋت الىپ قالعان بولاتىن. بۇل ونىڭ كارەراسىنداعى ەكىنشى جەڭىلىسى. ءبىر قىزىعى, ەكەۋىندە دە تمد بوكسشىلارىنا جول بەرگەن ەكەن.
وتاندىق بوكس جانكۇيەرلەرى گەننادي گولوۆكيننىڭ ەندى ەكسپو-2017 كورمەسى اياسىندا استانادا جەكپە-جەك وتكىزگەنىن قالايدى. جەرلەسىمىز ءوزى دە تۋعان جەرى قازاقستاندا جۇدىرىقتاسۋعا دايىن ەكەنىن بىرنەشە رەت ايتقان بولاتىن. ازىرگە قارسىلاستارىنىڭ اراسىنان بيللي دجو سوندەرستىڭ كانديداتۋراسى سايكەس كەلىپ تۇر. بريتاندىق بوكسشى ورتا سالماقتا WBO تۇجىرىمى بويىنشا الەم چەمپيونى, WBO International, EBU, بريتانيا دوستاستىعىنىڭ, BBBofC چەمپيونى. شارشى الاڭدا جەڭىلمەي كەلە جاتقان جامپوزدىڭ ءبىرى. ەگەر سوندەرسپەن كەزدەسىپ, ونى جەڭسە, گولوۆكين ورتا سالماقتىڭ ءابسوليۋتتى چەمپيونى اتانادى.
– گولوۆكين جاقىن كۇندەرى 35 جاسقا تولادى. ول دجەيكوبسپەن كەزدەسۋىندە ءوزىنىڭ قاراپايىم ادام ەكەنىن كورسەتتى. گولوۆكينمەن جەكپە-جەك وتكىزۋ مەن ءۇشىن ارمان. «تۆيتتەردە» پروموۋتەرى توم لەففلەرمەن سويلەستىم. ول كەلىسىمشارت وتكەن اپتادا دايىن بولعانىن ايتقان ەدى. قازاقستاندا كەزدەسۋ وتكىزۋگە دايىنمىن. مەن ونىمەن 11 اپتادان كەيىن ايقاسۋعا ساقاداي ساي ەكەنىمدى ايتا الامىن. ەگەر ولار 5-6 اپتادان كەيىن جەكپە-جەك ۇيىمداستىرعىسى كەلسە, كەلىسىم بەرمەيمىن. كوبى مەنىڭ نوكاۋتقا قۇلاعانىمدى كۇتەدى. قازىر مەن دايىندالىپ ءجۇرمىن. كەلىسىمشارت وسى اپتانىڭ سوڭىنا دەيىن جاسالسا دەيمىن. بيزنەستىڭ اتى بيزنەس. وسى ايتىلعان مەرزىمدە مەنىمەن جولىققىسى كەلسە, وندا جەكپە-جەكتى بىرگە ۇيىمداستىرايىق. وسىعان دەيىن ولاردىڭ ۇسىنىستارى اقىلعا قونبايتىن ەدى. سول ءۇشىن كەلىسپەي ءجۇردىم. ەگەر قازىرگى ۇسىنىستارى كوڭىلدەن شىعادى. ال تاعى ءبىر اي كۇتكىزىپ قوياتىن بولسا, وندا ءوز جولىممەن كەتەمىن, – دەيدى سوندەرس.
ەندى گولوۆكين مەن ونىڭ كومانداسىنىڭ جاۋابىن كۇتۋ عانا قالدى.
بەك تولەۋوۆ,
جۋرناليست
استانا