سەناتتىڭ الەۋمەتتىك-مادەني دامۋ جانە عىلىم كوميتەتىنىڭ ءتورايىمى بىرعانىم ءايتىموۆا تالقىلاۋدى اشىپ, بۇل كەزدەسۋ سەناتتىڭ 2017 جىلعا ارنالعان جوسپارىنا سايكەس ءوتىپ وتىرعانىن ايتتى. ونىڭ ماقساتى «قازاقستان رەسپۋبليكاسى پرەزيدەنتىنىڭ 2015 جىلعى 30 قاراشاداعى جولداۋى اياسىنداعى «جۇمىسپەن قامتۋدىڭ جول كارتاسىن» قۇقىقتىق قامتاماسىز ەتۋ شارالارى تۋرالى» تاقىرىبى بويىنشا دوڭگەلەك ۇستەلدىڭ (2016 جىلعى 19 قازانداعى) ۇسىنىمدارىن ورىنداۋ بارىسى تۋرالى مەملەكەتتىك ورگاندار مەن ۇيىمداردى تىڭداۋ بولىپ تابىلادى.
كەزدەسۋدە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا حالىقتى جۇمىسپەن قامتۋ بويىنشا ناقتى ۇسىنىمدارىنىڭ ورىندالۋى مەن جەكەلەگەن ماسەلەلەرى بويىنشا جاڭا ءادىس-تاسىلدەر ازىرلەۋ تۋرالى حاباردار ەتتى.
2016 جىلعى 29 جەلتوقساندا ەڭبەك نارىعىندا قاجەت بولاتىن كاسىبي تاجىريبە مەن ماشىقتاردى يگەرۋدىڭ ءتيىمدى جۇيەسىن قالىپتاستىرۋعا, جاپپاي كاسىپكەرلىكتى دامىتۋعا, حالىقتىڭ الەۋمەتتىك ءالسىز توپتارىن قولداۋمەن بىرگە, ەڭبەك دەلدالىنىڭ ءتيىمدى ۇلگىسىن جاساۋعا باعىتتالعان 2017-2021 جىلدارعا ارنالعان جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى قابىلداندى.
كەزدەسۋدە ەڭبەك جانە حالىقتى الەۋمەتتىك قورعاۋ, اۋىل شارۋاشىلىعى مينيسترلىكتەرىنىڭ ناتيجەلى جۇمىستارى, ۇسىنىمداردىڭ بارلىق تارماقتارىنىڭ ورىندالعانى, سونداي-اق, حالىقتى جۇمىسپەن قامتۋ سالاسىنداعى جوسپارلار مەن كەلەشەكتەگى جۇمىستار تۋرالى تولىق جانە ءبارىن قامتيتىن اقپاراتتار بەرىلگەندىگى اتالىپ ءوتىلدى.
سەناتورلار اقان بيجانوۆ, سەرىك بەكتۇرعانوۆ, ءالي بەكتاەۆ جانە باسقا دا كەزدەسۋگە قاتىسۋشىلار تالقىلانىپ وتىرعان تاقىرىپ بويىنشا ءوز ويلارىن ورتاعا سالدى.
كەزدەسۋدى قورىتىندىلاي كەلىپ, بىرعانىم ءايتىموۆا پايدالى ءارى ناتيجەلى اڭگىمە بولعانىن, جۇمىسپەن قامتۋ جونىندەگى مەملەكەتتىك ساياساتتى ىسكە اسىرۋعا بايلانىستى جانە ونداعى جەتىلدىرۋدى تالاپ ەتەتىن جەكەلەگەن ماسەلەلەر بويىنشا بىرقاتار ماڭىزدى ماسەلەلەر قوزعالعانىن اتاپ كورسەتتى.