كەشە پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتا بيۋروسىنىڭ كەزەكتى وتىرىسى ءوتتى. وندا ءماجىلىستىڭ جالپى وتىرىسىنا شىعارىلاتىن ماسەلەلەر سارالاندى, دەپ حابارلادى وسى پالاتانىڭ ءباسپاسوز قىزمەتى.
اگرارلىق ماسەلەلەر كوميتەتى كەيبىر زاڭنامالىق اكتىلەرگە ورمان شارۋاشىلىعى, جانۋارلار دۇنيەسى جانە ەرەكشە قورعالاتىن تابيعي اۋماقتار ماسەلەلەرى بويىنشا ءوزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسى ءبىرىنشى وقىلىمعا دايىن ەكەنىن مالىمدەدى.
حالىقارالىق ىستەر, قورعانىس جانە قاۋىپسىزدىك كوميتەتى دەپۋتاتتاردىڭ تالقىسىنا «ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ قۇقىق قورعاۋ ورگاندارى مەن ارنايى قىزمەتتەرىن جاراقتاندىرۋ ءۇشىن ارنايى تەحنيكا مەن ارنايى قۇرالداردى جەتكىزۋدىڭ جەڭىلدىكتى شارتتارى تۋرالى كەلىسىمدى راتيفيكاتسيالاۋ تۋرالى» زاڭ جوباسى شىعارىلاتىنىن حابارلادى.
سونىمەن قاتار, «1992 جىلعى 15 مامىرداعى ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر اراسىنداعى اسكەري-تەحنيكالىق ىنتىماقتاستىقتىڭ نەگىزگى قاعيداتتارى تۋرالى كەلىسىمنىڭ شەڭبەرىندە جەتكىزىلەتىن اسكەري ماقساتتاعى ونىمدەردىڭ نىسانالى پايدالانىلۋىن باقىلاۋدى جۇزەگە اسىرۋ ءتارتىبى تۋرالى حاتتاماعا تولىقتىرۋ ەنگىزۋ تۋرالى ەكىنشى حاتتامانى راتيفيكاتسيالاۋ تۋرالى», «1992 جىلعى 15 مامىرداعى ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر اراسىنداعى اسكەري-تەحنيكالىق ىنتىماقتاستىقتىڭ نەگىزگى قاعيداتتارى تۋرالى كەلىسىمگە تولىقتىرۋلار ەنگىزۋ تۋرالى ەكىنشى حاتتامانى راتيفيكاتسيالاۋ تۋرالى» جانە «مەملەكەتتىك (مۋنيتسيپالدىق) ساتىپ الۋ تۋرالى كەلىسىمدى راتيفيكاتسيالاۋ تۋرالى» جاڭا زاڭ جوبالارى بويىنشا قورىتىندى ءازىرلەۋ ماسەلەلەرى كۇن تارتىبىنە ۇسىنىلاتىن بولدى.