«ەگەمەن قازاقستان» رەداكتسياسى مەن قازاقستان رەسپۋبليكاسىنىڭ ۇلتتىق كىتاپحاناسى ارىپتەستىك مەمەراندۋمعا قول قويدى
ايتۋلى شارا ەل گازەتى – «ەگەمەن قازاقستاننىڭ» جارىققا شىعۋىنىڭ 100 جىلدىعى مەن ۇلتتىق كىتاپحانانىڭ شاڭىراق كوتەرۋىنىڭ 90 جىلدىعى قارساڭىندا جاسالىنىپ وتىر. وسى ورايدا گازەتتىڭ تاريحي قۇجاتتارىن تۇزەۋدە اقپاراتتىق-بيبليوگرافيالىق قىزمەت كورسەتۋ مەن اقپاراتتىق قولداۋ جاساۋدىڭ ۇلتتىق كىتاپحانانىڭ اقپاراتتىق رەسۋرسىندا جيناقتالعان قۇجاتتىق مالىمەتتەرى ارقىلى جۇزەگە اسىرىلاتىنى تۋرالى كەلەلى اڭگىمە قوزعالدى.
الماتىعا ارنايى ات باسىن بۇرىپ كەلگەن «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ توراعاسى دارحان قىدىرالى ەڭ
الدىمەن رۋحاني مۇددەلەس ەكى ۇيىمدى جاقىنداستىراتىن جاعىمدى جاڭالىقتى جەتكىزدى.
«تاۋەلسىزدىگىمىزدىڭ 25 جىلدىعىنا وراي باس باسىلىم «ەگەمەن قازاقستان» كىتاپحاناسىنىڭ سەرياسىن شىعارۋدى باستادى. اتى ايتىپ تۇرعانداي اتالعان جيناقتا تاۋەلسىزدىك العان شيرەك عاسىر ىشىندەگى قازاق ەلىنىڭ جەڭىستى جولى مەن جەمىستى كەزەڭدەرى تۋرالى باياندالادى», – دەگەن توراعا ۇلتتىق كىتاپحانىڭ ديرەكتورى جانات سەيدۋمانوۆقا باسىلىم كىتاپحاناسىنىڭ جاڭا شىققان العاشقى ءۇش كىتابىن سىيعا تارتتى.
بۇدان تىس بولاشاقتا بىرلەسىپ جاسايتىن بارلىق ءىس-شارالارعا ۇيىتقى بولۋ ارقىلى گازەت كىتاپحاناعا ارىپتەستىك كومەك كورسەتەتىنىن, ۇلتتىق كىتاپحانادا وتەتىن ماڭىزدى شارالاردىڭ باسىلىم بەتىندە جاريالانۋىنا ارقاشان دا بەيىلدى ەكەنىن ايتتى.
ءوز كەزەگىندە قازاقستان رەسپۋبليكاسىنىڭ ۇلتتىق كىتاپحاناسىنىڭ ديرەكتورى جانات سەيدۋمانوۆ باس باسىلىمنىڭ 100 جىلدىق مەرەيتويى قارساڭىندا كىتاپحانا قورىنان تاريحي قۇجاتتار, دەرەكتەر مەن كورنەكتى قۇرالدار نەگىزىندە توپتامالار دايىنداۋعا ات سالىساتىنىن ايتا كەلىپ, ول ءۇشىن ۇلتتىق كىتاپحانادا بارلىق جاعداي جاسالىنعانىن ورتاعا سالدى. باسىلىمداردى تسيفرلىق جۇيەگە ەنگىزۋدىڭ جاڭا تەحنولوگيانىڭ كۇشىمەن جۇرگىزىلىپ جاتقانى, مۇنداي جاڭا تەحنولوگيا تمد مەملەكەتتەرى اۋماعىندا 6 رەسپۋبليكادا عانا بارى اتاپ كورسەتىلدى. باس باسىلىمنىڭ كىتاپحانا قورىندا جاتقان پاراعى سارعايعان گازەتتەرىنەن تىس «ەڭبەكشى قازاقتىڭ» وتكەن عاسىردىڭ 40-شى جىلدارى ماسكەۋگە جىبەرىلگەن سيرەك ساندارىنا قول جەتكىزۋدىڭ دە ەش قيىندىعى جوق ەكەنى تۋرالى باسىلىم باسشىسىن حاباردار ەتتى.
جىلى شىرايلى جۇزدەسۋدە ەكى جاق تاريحي كەزەڭ قارساڭىندا ءوزارا ىنتىماقتاسا جۇمىس ىستەيتىندەرى تۋرالى ارىپتەستىك مەموراندۋمىنا قول قويدى.
ال جاناشىر وقىرماندار ءۇشىن تاعى ءبىر قوسىپ ايتار بۇگىنگى ءبىزدىڭ جاڭالىعىمىز – «ەگەمەننىڭ» تاريحي بەتتەرىن سD-ديسك تۇرىندە قابىلدايتىن كۇننىڭ دە الىس ەمەستىگى تۋرالى كوزايىم حابار دەر ەدىك.
تالعات ءسۇيىنباي,
«ەگەمەن قازاقستان»
الماتى