مەملەكەتتىك حاتشى گۇلشارا ابدىقالىقوۆا جامبىل وبلىسىنا جۇمىس ساپارىمەن باردى, دەپ حابارلايدى اقوردانىڭ رەسمي سايتى.
ساپار اياسىندا گ.ابدىقالىقوۆا جامبىل وبلىسى قازاقستان حالقى اسسامبلەياسى قوعامدىق كەلىسىم كەڭەسىنىڭ «قازاقستاننىڭ ءۇشىنشى جاڭعىرۋى – ءوسىمنىڭ جاڭا مودەلى» دەگەن تاقىرىپپەن وتكىزگەن, مەملەكەت باسشىسىنىڭ جولداۋىن تالقىلاۋعا ارنالعان كەڭەيتىلگەن وتىرىسىنا قاتىستى.
سونداي-اق, ءىس-شاراعا جامبىل وبلىسىنىڭ اكىمى, وڭىرلىك اسسامبلەيا توراعاسى ك.كوكىرەكباەۆ, قازاقستان حالقى اسسامبلەياسى توراعاسىنىڭ ورىنباسارى –حاتشىلىق مەڭگەرۋشىسى ە.توعجانوۆ, قازاقستان حالقى اسسامبلەياسى مەن وڭىرلىك اسسامبلەيا مۇشەلەرى, الماتى قالاسى, سونداي-اق الماتى, وڭتۇستىك قازاقستان جانە جامبىل وبلىستارى قوعامدىق كەلىسىم كەڭەستەرىنىڭ مۇشەلەرى, ەتنومادەني بىرلەستىكتەردىڭ جەتەكشىلەرى مەن مۇشەلەرى, مەملەكەتتىك ورگاندار مەن باق وكىلدەرى قاتىستى.
مەملەكەتتىك حاتشى ەلباسىنىڭ جولداۋدا قازاقستاننىڭ ءۇشىنشى جاڭعىرۋىن ىسكە اسىرۋ جونىندەگى باسىمدىعى بار بەس باعىتتى ايقىنداپ بەرگەنىن اتاپ ءوتتى. العا قويعان مىندەتتەردى ىسكە اسىرۋ ءۇشىن بارلىق العىشارتتار مەن مۇمكىندىكتەر بار. سونىڭ قاتارىندا تاۋەلسىزدىكتىڭ 25 جىلىندا قوعام مەن مەملەكەتتىڭ جيناقتالعان بۇكىل جاسامپاز الەۋەتى, جاھاندىق ترانسفورماتسيالانۋ كەزەڭىندە جۇمىستىڭ نەگىزگى باعىتتارىن ايقىندايتىن «100 ناقتى قادام» ۇلت جوسپارى بار. جامبىل وبلىسى قازاقستان حالقى اسسامبلەياسىنىڭ بىلتىر 250-دەن استام ءىس-شارا وتكىزىپ, قوعامدىق كەلىسىمنىڭ نىعايۋىنا قوسقان ۇلەسىن اتاپ ءوتتى. قازاقستان حالقى اسسامبلەياسىنىڭ 2200-دەن استام قوعامدىق كەلىسىم كەڭەستەرى جۇمىسىنىڭ ەرەكشە ماڭىزدىلىعى اتاپ ءوتىلدى.
سونىمەن بىرگە, ساپار اياسىندا مەملەكەتتىك حاتشىنىڭ توراعالىعىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتى بايقاۋ كەڭەسىنىڭ وتىرىسى ءوتىپ, وندا جوعارى وقۋ ورنىن ودان ءارى دامىتۋدىڭ وزەكتى ماسەلەلەرى تالقىلاندى.
گۇلشارا ابدىقالىقوۆا جۇمىس ساپارىنىڭ قورىتىندىسى بويىنشا مەملەكەتتىك ورگاندارعا ناقتى تاپسىرمالار بەردى.