تاۋەلسىزدىك سارايىندا ەلوردالىق وقۋشىلار اراسىندا روبوتوتەحنيكادان چەمپيونات ءوتىپ جاتىر, دەپ حابارلايدى قالا اكىمدىگىنىڭ رەسمي سايتى.
جارىسقا قاتىسۋشىلار 3 سانات بويىنشا ءوزارا باق سىناسادى: «سىزىق بويىنداعى جارىس», «تاپسىرمانى ورىنداۋ» جانە «روبوسۋما».
شارا مەملەكەت باسشىسىنىڭ قازاقستان حالقىنا جولداۋىن جۇزەگە اسىرۋ, جاستار مەن بالالاردىڭ يننوۆاتسيالارعا جانە جوعارى تەحنولوگيالارعا قىزىعۋشىلىعىن ارتتىرۋ ماقساتىندا قولعا الىنعان. ونى استانا قالاسىنىڭ ءبىلىم باسقارماسى «استانا دارىنى» وڭىرلىك عىلىمي-پراكتيكالىق ورتالىعى «ءبىلىم يننوۆاتسيا» حالىقارالىق قوعامدىق قورىمەن بىرلەسە ۇيىمداستىرىپ وتىر.
چەمپيوناتتا ەلوردانىڭ 31 مەكتەبى مەن ليتسەيلەرىنەن بارلىعى 82 كوماندا تىركەلدى. قالالىق كەزەڭگە 23 ءبىلىم بەرۋ مەكەمەسىنەن 46 كوماندا جولداما الدى. جارىسقا 10-19 جاس ارالىعىنداعى بالالار قاتىسادى. ءاربىر كوماندا قۇرامىنا ەكى سپورتشى جانە ءبىر روبوت كىرەدى.
استانا قالاسىنىڭ ءبىلىم باسقارماسى باسشىسىنىڭ ورىنباسارى ءانۋار جانعوزين بۇل چەمپيونات العاش رەت وتكىزىلىپ وتىرعانىن ايتتى.