پايدالى قازبالاردىڭ وندىرىلۋىنە بايلانىستى ۆەسوۆايا, كرەستوۆسكي جانە پەرەۆالكا كەنتتەرىنىڭ تۇرعىندارى جاڭا جەرگە كوشىرىلەدى, دەپ حابارلايدى «قازاقپارات».
ساتباەۆ قالاسىنىڭ كەشەندى دامۋ جوسپارىنا سايكەس, ءۇش كەنتتىڭ تۇرعىندارى «نۇرلى مەكەن» جاڭا مولتەكاۋدانىنا كوشىرىلەدى. ال, ولارعا تيەسىلى جەر تەلىمدەرى پايدالى قازبالار ءوندىرۋ ماقساتىندا مەملەكەتتىڭ قاراماعىنا وتەدى. قاراعاندى وبلىسىنىڭ اكىمى نۇرمۇحامبەت ابدىبەكوۆ حالىققا ەسەپ بەرۋ كەزىندە حابارلاعانداي, اۋىل تۇرعىندارىن كوشىرۋ ءۇشىن بەس قاباتتى 25 تۇرعىن ءۇي تۇرعىزىلادى.
«قازىرگى تاڭدا 859 وتباسىنى تۇرعىن ۇيمەن قامتاماسىز ەتۋ ءۇشىن 39 تۇرعىن ءۇي سالىنىپ, التى پاتەر ساتىپ الىندى. 1150 وتباسى ءۇشىن جالپى اۋماعى 78 مىڭ شارشى مەترلىك بەس قاباتتى 25 ءۇي سالىنۋدا. قۇرىلىس جۇمىستارى 2017 جىلى اياقتالادى», - دەپ مالىمدەدى قاراعاندى وبلىسىنىڭ اكىمى.
«نۇرلى جەر» باعدارلاماسىن جۇزەگە اسىرۋ ءۇشىن ءبىر جارىم ميلليارد تەڭگە ءبولىندى. 19 مىڭ شارشى مەترلىك تۇرعىن ءۇي قۇرىلىسى جوسپارىمىزدا بار. بۇل كەزەكتە تۇرعان 336 جانۇيانى باسپانامەن قامتاماسىز ەتۋگە مۇمكىندىك بەرەدى.
«قازاقستاننىڭ تۇرعىن ءۇي قۇرىلىس جيناق بانكى» اق سالىمشىلارى ءۇشىن, سونىڭ ىشىندە جەرگىلىكتى اتقارۋشى ورگانداردا جۇمىس جاسايتىن كەزەكتە تۇرعاندارعا نەسيەلىك ءۇي قۇرىلىسى جالعاسادى. قازىرگى تاڭدا وسىنداي تۇرعىن ءۇيدىڭ قۇرىلىسىنا ارنالعان 11 جوبا بار», - دەدى نۇرمۇحامبەت ابدىبەكوۆ.