ەۋروپا قايتا قۇرۋ جانە دامۋ بانكى ارقىلى «جايىقجىلۋقۋات» اق ورال جىلۋ-قۋات ورتالىعىنىڭ جىلىتۋ جۇيەسىن جاڭعىرتۋعا جانە بولاشاقتا وبلىس ورتالىعىنداعى اۆتوبۋس پاركىن جاڭارتۋعا 7 ملرد. تەڭگە تارتۋ كوزدەلۋدە, دەپ حابارلايدى قازاقپارات.
وبلىس اكىمى التاي كولگىنوۆتىڭ ايتۋىنشا, اتالمىش بانك جەڭىلدىكپەن نەسيە بەرمەكشى.
سونىمەن قاتار, ينۆەستيتسيا تارتۋ ماقساتىندا باسقا دا جۇمىستار اتقارىلادى. مىسالى, «Lammin» فين كومپانياسىمەن قۇرىلىس يندۋسترياسى, شۆەيتساريالىق «اۆۆ» كومپانياسىمەن ەلەكتر جابدىقتارىن ءوندىرۋ, يراندىق «Falizan» كومپانياسىمەن مۇنايحيميا سالاسىندا قۇرىلعان بىرلەسكەن كاسىپورىندار جوعارى تەحنولوگياعا نەگىزدەلگەن ءوندىرىستى دامىتۋعا مۇمكىندىك بەرەدى.
ەلباسىنىڭ بيزنەس ورتانى كەڭەيتۋ جونىندەگى تاپسىرماسىنا سايكەس وڭىردە ناقتى جۇمىستار اتقارىلۋدا. وبلىستا شاعىن بيزنەستە 100 مىڭداي ادام نەمەسە ەكونوميكالىق بەلسەندى حالىقتىڭ ۇشتەن ءبىر بولىگى ەڭبەك ەتۋدە. مەملەكەتتىك بيۋدجەتكە بارلىق ءتۇسىمنىڭ بەستەن ءبىر بولىگى (53 ملرد. تەڭگە) شاعىن جانە ورتا بيزنەستەن تۇسەدى. ونىڭ ۇلەسى 11 ملرد. تەڭگەگە كوبەيدى, بۇل قارقىن الداعى ۋاقىتتا دا تومەندەمەيدى.
«بيىل قارجىلاندىرۋدىڭ بارلىق كوزدەرى ەسەبىنەن جەكە بيزنەستى 4,5 ملرد. تەڭگە كولەمىندە قولداۋ كوزدەلۋدە. قازىردىڭ وزىندە جۇزەگە اسىرىلۋعا دايىن 1 ملرد. استام تەڭگەنى قۇرايتىن 115 جوبا بار», – دەدى ءوڭىر باسشىسى.