وڭتۇستىك قازاقستان وبلىسىندا 2017-2020 جىلدارى ىشىندە 90 مىڭ جەكە شارۋا قوجالىقتارىنان قۇرالعان 600-دەن استام كووپەراتيۆتەر ناقتى ىسكە كىرىسەدى. بۇل تۋرالى وبلىس اكىمى ج.تۇيمەباەۆ حالىق الدىندا وتكەن ەسەپتى جيىندا الداعى جىلدارى اتقارىلاتىن جۇمىس جوسپارىمەن ءبولىسۋ بارىسىندا ايتتى.
«ەلباسى بيىلعى جىلعى قازاقستان حالقىنا ارنالعان جولداۋىندا اگروونەركاسىپ كەشەنىن ەكونوميكانىڭ جاڭا درايۆەرىنە اينالدىرۋ مىندەتىن قويىپ وتىر. وسى باعىتتا, شارۋا قوجالىقتارى مەن جەكە قوسالقى شارۋاشىلىقتار كىرىستەرىن ارتتىرۋ, ءونىمىن وتكىزۋ, ساقتاۋ كوزدەلۋدە. ءوندىرىس قۇرالدارىمەن جانە ماتەريالدىق-تەحنيكالىق رەسۋرستارمەن جابدىقتاۋ, قارجىلاندىرۋعا قول جەتكiزە الۋ ءۇشىن كووپەراتيۆتەر جۇيەسىن جەتىلدىرىپ, وڭىرلىك باسىمدىلىعىنا قاراي اگرو ايماقتار قۇراتىن بولامىز. ەتتى, ءسۇتتى مال شارۋاشىلىعىن وركەندەتۋ مەن قۇس, بالىق شارۋاشالىعىن دامىتۋ قوسا جۇرگىزىلەدى», - دەدى ءوڭىر باسشىسى.
ماسەلەن, 2017 جىلدىڭ وزىندە مال بورداقىلاۋ الاڭدارى بار 30 جەكەلەگەن قوسالقى شارۋاشىلىق بىرىكتىرىلەتىن بولادى. وسىلاردىڭ ءبىرى «قايىپ اتا» مەكەمەسى جانىنان 2000 باس مالدى بورداقىلايتىن «حانشايىم» كووپەراتيۆى قۇرىلىپ, جىلىنا وندىرىلەتىن 1 مىڭ توننا ءونىم تولىعىمەن ەكسپورتقا جونەلتىلەدى. سونىمەن قاتار, وسى جىلى 3000-نان استام وتباسى 30 مىڭنان اسا ءىرى قارا مالدى بورداقىلايتىن الاڭدار مەن 723 جانۇيالىق ءسۇت فەرماسىن اشۋ جوسپارلانۋدا. سونىمەن بىرگە, ءسۇت ونىمدىلىگىن ارتتىرۋ باعىتىندا «قازىنا جەر لتد» مەكەمە جانىنان 2600 باس ءىرى قارا مالدى ۇستايتىن 6 كووپەراتيۆ ۇيىمداستىرىلىپ, جىلىنا 8 مىڭ توننا ءسۇت ءوندىرۋ كوزدەلۋدە. ال, «اتامەكەن» كورپوراتسياسى تولەبي اۋدانىندا 20 شارۋاشىلىقتى بىرىكتىرىپ, 400 باسقا ارنالعان ءسۇت ءوندىرۋ كووپەراتيۆىن قولعا الدى.
ال, قۇس ەتىن ءوندىرۋ ءۇشىن اعىمداعى جىلى 56 مىڭ باستى باعاتىن 14 قۇس فەرماسى اشىلادى. بۇدان بولەك, «شىمكەنت قۇس» مەكەمەسى مەن قارجى ينستيتۋتتارىنىڭ قولداۋىمەن تولەبي اۋدانىنداعى 20-دان استام شارۋا قوجالىق بىرىگەدى.
سونىمەن قاتار, وسى جىلى بالىق شارۋاشىلىعى بويىنشا 7 بالىق ءوندىرۋ كاسىپورنىن قۇرۋ جوسپارلانۋدا. جانە قازىعۇرت, تولەبي, سايرام اۋداندارىندا قارقىندى الما, جاڭعاق باۋلارى مەن شىمكەنت قالاسى جانە سارىاعاش اۋدانىندا جىلىجاي كەشەنى اگرو ايماقتارىن قوسۋ كوزدەلۋدە.
ناتيجەسىندە 90 مىڭ جەكە شارۋا قوجالىقتارىنان قۇرالعان 600-دەن استام كووپەراتيۆتەر ناقتى ىسكە كىرىسەدى. بۇگىنگى كۇنى جاڭادان 17 مىڭنان استام ۇساق شارۋاشىلىقتاردى بىرىكتىرەتىن 242 كووپەراتيۆ قۇرىلدى.