ەرتەڭ 18 اقپاندا ساعات 10.00-دە تاۋەلسىزدىك سارايىندا روبوتوتەحنيكادان چەمپيونات وتەدى. جارىستا ەلوردالىق وقۋشىلار 3 سانات بويىنشا ءوزارا باق سىناسادى: «سىزىق بويىنداعى جارىس», «تاپسىرمانى ورىنداۋ» جانە «روبوسۋما». جارىسقا 10-19 جاس ارالىعىنداعى بالالار قاتىسا الادى. ءاربىر كوماندا قۇرامىنا ەكى سپورتشى جانە ءبىر روبوت كىرەدى.
زياتكەرلىك قابىلەتتى دامىتاتىن شارا قر پرەزيدەنتى ن.نازارباەۆتىڭ قازاقستان حالقىنا ارنالعان جولداۋىن جۇزەگە اسىرۋ, جاستار مەن بالالاردىڭ يننوۆاتسيالارعا جانە جوعارى تەحنولوگيالارعا قىزىعۋشىلىعىن ارتتىرۋ ماقساتىندا قولعا الىنعان. ونى استانا ق. ءبىلىم باسقارماسى «استانا دارىنى» وڭىرلىك عىلىمي-پراكتيكالىق ورتالىعى «ءبىلىم يننوۆاتسيا» حالىقارالىق قوعامدىق قورىمەن بىرلەسە ۇيىمداستىرىپ وتىر.
چەمپيوناتتىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى 19 اقپان كۇنى ساعات 10.00-دە «نۇر وردا» قازاق-تۇرىك ليتسەيىندە (قوشقارباەۆ كوش., 34) وتەدى. جۇلدەلى ورىنداردى يەلەنگەن قۇرامالاردىڭ جاتتىقتىرۋشىلارىنا باعالى سىيلىقتار تابىستالادى.
روبوتەحنيكادان چەمپيونات – تارتىستى جارىس. ونىڭ بارىسىندا جاس دارىندار ءتۇرلى تاپسىرمالاردى ءمىنسىز ورىندايتىن روبوتتاردى قۇراستىرادى. شىعارماشىلىق سايىس بالالاردى اقپاراتتىق-تەلەكوممۋنيكاتسيالىق تەحنولوگيالارعا جانە عىلىمي- تەحنيكالىق شىعارماشىلىق جۇمىستار تارتۋعا باعىتتالعان.