WBC نۇسقاسى بويىنشا ەۋرازيا جانە WBA NABA تۇجىرىمىنىڭ چەمپيونى قازاقستاندىق بوكسشى بەكمان سويلىباەۆتىڭ كەلەسى قارسىلاسى بەلگىلى بولدى. بۇل تۋرالى diamondring.kz حابارلادى.
سويلىباەۆتىڭ كەلەسى قارسىلاسى 31 جاستاعى تاجىريبەلى مەكسيكالىق بوكسشى ماريو انتونيو ماسياس اتاندى. ول شارشى الاڭدا 50 جەكپە-جەك وتكىزىپ, 28-ءىن جەڭىسپەن اياقتاعان. قوس بوكسشىنىڭ اراسىنداعى ايقاس 8 راۋندتىق جۇيە بويىنشا 10 ناۋرىز كۇنى اقش-تىڭ كاليفورنيا شتاتىنداعى تۋستين قالاسىندا وتەدى.
«شارشى الاڭعا شىعاتىنىم ءۇشىن قۋانىشتىمىن. سوڭعى رەت جەكپە-جەگىمدى وتكەن جىلى وتكىزگەندىكتەن, بۇل ءساتتى ۇزاق كۇتتىم. ءبىر وكىنىشتىسى, قولىمنان العان جاراقاتىما بايلانىستى بىرازعا دەيىن جاتتىعۋ جاساي المادىم. ال قازىر جانكۇيەرلەرىمدى جەڭىسپەن قۋانتۋعا دايىنمىن. قارسىلاسىم تاجىريبەلى ەكەنى ايتپاسا دا بەلگىلى. الەم چەمپيونى اتاعىنا ۇمىتكەر بولعان. دەگەنمەن, باپكەرىم ەريك براۋن ەكەۋىمىز ونىڭ وسال تۇستارىن تاۋىپ, جەڭىسكە جەتەمىز دەپ وتىرمىز. قازىر 10 ناۋرىزدى اسىعا كۇتىپ ءجۇرمىن», – دەيدى بەكمان سويلىباەۆ.
ايتا كەتەيىك, 2011 جىلدىڭ جەلتوقسان ايىندا ماريو ماسياس جەڭىل سالماقتا WBA نۇسقاسىنىڭ چەمپيوندىق بەلبەۋى ءۇشىن شارشى الاڭعا شىققان, ال 2014 جىلى WBC تۇجىرىمى بويىنشى چەمپيوندىق اتاققا مىندەتتى قارسىلاس رەتىندە ايقاسقان. الايدا, ەكى كەزدەسۋدە دە مەكسيكالىق بوكسشى جانكۇيەرلەرىن قۋانتا المادى.
قازىرگى ۋاقىتتا بەكمان سويلىباەۆ لوس-اندجەلەس قالاسىندا Wild Card West جاتتىعۋ زالىندا امەريكالىق باپكەر ەريك براۋنمەن بىرگە جاتتىعۋ جاساپ ءجۇر. وتانداسىمىز كاسىپقوي بوكستا 9 كەزدەسۋ وتكىزىپ, بارىندە جەڭىسكە جەتكەن. ونىڭ تورتەۋىن نوكاۋتپەن اياقتاعان. الدىن الا مالىمەت بويىنشا ونىنشى ايقاسى بيىل ءساۋىر ايىنا جوسپارلانىپ وتىر.