اقپارات جانە كوممۋنيكاتسيالار مينيسترلىگى شەتەلدىك اۆتورلاردىڭ جۋرناليستيكا مەن PR سالاسىنداعى ىرگەلى ەڭبەكتەرىن تۇپنۇسقادان قازاق تىلىنە اۋدارۋ جوباسىن باستادى. بۇل تۋرالى اتالعان ۆەدومستۆو باسشىسى داۋرەن اباەۆ ءوزىنىڭ فەيسبۋكتەگى پاراقشاسىندا جازدى.
"جالپى, ەلىمىزدە مۇنداي جيناقتارعا سۇرانىس ۇلكەن بولعانىمەن, كوپشىلىگى ورىس تىلىندە ەكەنى جاسىرىن ەمەس. ال, قازاق تىلىندەگى وقۋلىق از.
مىنە, سوندىقتان ءبىز وسى ءىستى قولعا الدىق. ارينە, بۇل ءبىرشاما ۋاقىت پەن ەڭبەكتى تالاپ ەتەدى. بىرىنشىدەن, ول سۇرانىسقا يە, ۋاقىت وتسە دە وزەكتىلىگىن جوعالتپايتىن كىتاپ بولۋى شارت. ەكىنشىدەن, اۆتورلىق قۇقىق يەسىنەن رۇقسات الۋ, ساپالى اۋدارۋ ءىسى دە وڭاي ەمەس. دەگەنمەن ءبىز العاشقى جيناقتى قىركۇيەكتىڭ 1-دە ستۋدەنتتەردىڭ قولىنا تيگىزۋدى جوسپارلاپ وتىرمىز.
وسى ماقساتتا ءبىز الدىمەن ۋنيۆەرسيتەتتەر وقىتۋشىلارىنىڭ كەڭەسىمەن كىتاپتار ءتىزىمىن جاسادىق. بۇگىن مىنە, سولاردىڭ ىشىنەن قازاقشاعا اۋدارىلاتىن ءبىرىنشى كىتاپ تا انىقتالدى.
سونىمەن, العاشقىسى وسى سالانىڭ بىلىكتى ماماندارى - لي ەنن پەك پەن گاي س. ءريلدىڭ قىزمەت بارىسىنداعى باق ەتيكاسىنا ارنالعان «Media Ethics at Work» جيناعى بولماق. بۇل – شەتەلدەردە ستۋدەنتتەردىڭ ۇلكەن سۇرانىسىنا يە ىرگەلى ەڭبەك. ايتا كەتۋ كەرەك, بۇل جيناق ورىس تىلىندە جارىق كورمەگەن, ياعني قازاقشاعا تىكەلەي تۇپنۇسقادان اۋدارىلادى.
الداعى ۋاقىتتا ونى 3000 دانامەن شىعارىپ, ەلىمىزدەگى بارلىق كىتاپحانا مەن وقۋ ورىندارىنا تاراتۋدى كوزدەپ وتىرمىز", دەدى مينيستر.
ونىڭ ايتۋىنشا, بولاشاقتا وسى ءىستى دەمەۋشىلەر ارقىلى جۇيەلى تۇردە جالعاستىرىپ, جىل سايىن بىرنەشە كىتاپتى اۋدارىپ وتىرۋ جوسپاردا بار. "بۇل ءوز كەزەگىندە, جاس جۋرناليستەرىمىزگە اقپارات سالاسىنداعى الەمدىك دامۋ تەندەنتسيالارىمەن كەڭىنەن تانىسۋعا مۇمكىندىك بەرىپ, وتاندىق جۋرناليستيكاعا وڭ وزگەرىستەر الىپ كەلەدى دەپ ويلايمىز.
سونىمەن قاتار, بۇل جوبانى مەملەكەتتىك ءتىلدىڭ ءورىسىن كەڭەيتۋگە باعىتتالعان ناقتى شارالاردىڭ ءبىرى دەپ ايتۋعا بولادى", دەدى اباەۆ.