سەۋل سوتى ەل پرەزيدەنتى پاك كىن حە اينالاسىنداعى ءىرى جەمقورلىق داۋىنا بايلانىستى پاراقورلىق بويىنشا ايىپ تاعىلىپ وتىرعان Samsung كورپوراتسياسىنىڭ باسشىسى لي چجە ءيوندى تۇتقىنداۋعا وردەر بەردى, دەپ حابارلايدى قازاقپارات «ريا نوۆوستي» اگەنتتىگىنە سىلتەمە جاساپ.
ريونحاپ اگەنتتىگىنىڭ مالىمدەۋىنشە, ءىس بويىنشا سوت شەشىمى شىققانشا كورپوراتسيا باسشىسى ەل استاناسىنان 15 شاقىرىم جەردەگى يىۆان قالاسىنىڭ تۇرمەسىندە بولادى. ءىستى تەرگەۋ 28 اقپانعا دەيىن اياقتالۋى ءتيىس جانە وڭتۇستىك كورەيا پرەزيدەنتىنىڭ مىندەتىن اتقارۋشى پرەمەر-مينيستر حۆان گيو اننىڭ كەلىسىمىمەن ءبىر ايعا عانا ۇزارتىلا الادى.
جەمقورلىق داۋى 2016 جىلدىڭ قازان ايىندا تۇتانعان بولاتىن. باسىلىم بەتتەرىندە Samsung جانە وزگە دە وڭتۇستىككورەيلىك ءىرى كورپوراتسيالاردىڭ ۇكىمەتتەن جەڭىلدىك العانى, قايتارىم رەتىندە پرەزيدەنتتىڭ قۇربىسى تسوي سۋن سيل قۇرعان قورلارعا ءىرى كولەمدە قاراجات اۋدارعاندارى تۋرالى اقپارات جاريالاندى. حابارلانعانداي, ەشقانداي مەملەكەتتىك لاۋازىمدى يەلەنبەگەن ايەل ءوزىنىڭ جوعارى بايلانىستارىن پايدالانا وتىرىپ, پرەزيدەنت اكىمشىلىگى ىستەرىنە ارالاسقان جانە پايدا تاپقان.