ۇستىمىزدەگى جىلدىڭ 25 قاڭتارى قازاق ەلىنىڭ تاريحىنداعى ەڭ ايتۋلى كۇندەردىڭ ءبىرى بولدى. ءبىز سول كۇنى ەلباسىنىڭ بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى ۇندەۋىن تەلەديدار ارقىلى مۇقيات تىڭدادىق.
شىن مانىندە بۇل – ەل ومىرىندەگى ايرىقشا ەلەۋلى ماڭىزى بار وقيعا.
مەملەكەت باسشىسى ءوزىنىڭ قازاقستان حالقىنا ارنالعان ۇندەۋىندە: «مىقتى پرەزيدەنتتىك بيلىك مەملەكەتتىڭ قالىپتاسۋ كەزەڭىندە اۋىر بەلەستەردى وتكەرۋ ءۇشىن اسا قاجەت بولدى. ول ءوز ۋاقىتىندا ءوزىن ءوزى اقتادى. ءبىزدىڭ بارلىق جەتىستىكتەر وسى جۇيەنىڭ نەگىزىندە كەلدى», دەپ بيلىك تارماقتارىن ءبولۋ بارىسىندا 40-قا تارتا پرەزيدەنتتىك قۇزىرەتتىڭ پارلامەنت پەن ۇكىمەتكە بەرىلەتىنىن جاريا ەتتى.
نەگىزى, بۇل رەفورما باسقارۋ جۇيەسىنىڭ تيىمدىلىگىن ارتتىرۋعا باعىتتالعان. ول ەكى باعىت بويىنشا جۇزەگە اسىرىلاتىن بولادى. اتاپ ايتقاندا, پرەزيدەنتتىڭ الەۋمەتتىك-ەكونوميكالىق ۇدەرىستەردى رەتتەۋدەگى بىرقاتار وكىلەتتىكتەرى ۇكىمەتكە جانە باسقا دا اتقارۋشى ورگاندارعا بەرىلمەك. سوندا بۇل سالاعا ۇكىمەت, مينيسترلىكتەر جانە اكىمدىكتەر تولىقتاي جاۋاپ بەرەتىن بولادى. بۇل وزگەرىستەردى ۇكىمەت قازىرگى پارلامەنت سەسسياسىنىڭ اياعىنا دەيىن ەنگىزۋى ءتيىس. ەكىنشىدەن, ودان دا كۇردەلى مىندەت – بيلىك تارماقتارى اراسىنداعى قارىم-قاتىناستى كونستيتۋتسيالىق دەڭگەيدە تەڭگەرىمدى ەتۋ.
ەندىگى جەردە ۇكىمەت قۇرۋدا پارلامەنت ءرولىن, مينيسترلەردىڭ دەپۋتاتتار الدىنداعى جاۋاپكەرشىلىگىن كۇشەيتۋ اسا ماڭىزدى. پارلامەنتتىك سايلاۋدا جەڭىسكە جەتكەن پارتيا ۇكىمەت جاساقتاۋدا شەشىمدى تۇردە اسەر ەتە الادى. وسىعان بايلانىستى, ەندى ۇكىمەت وكىلەتتىگىن بۇرىنعىداي پرەزيدەنت الدىندا ەمەس, پارلامەنت الدىندا توقتاتۋى زاڭدى بولادى.
بىزدىڭشە, كونستيتۋتسيا مەن زاڭدارعا ءىشىنارا وزگەرىستەردىڭ ەنگىزىلۋى قوعام مەن مەملەكەتتىڭ الدىنداعى كوپتەگەن تۇيتكىلدى ماسەلەلەردىڭ وڭ شەشىلۋىنە دە ىقپال ەتپەك. مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋدى قاراستىرۋ ەل دامۋىنىڭ جۇيەلى جانە زاڭدى كەزەڭى ىسپەتتى. 25 جىلدا مەملەكەت بولدىق, تالاي جەتىستىكتەرگە جەتتىك. ەندى ەل دامۋىنىڭ الداعى كەزەڭدەرىن ويلاستىرعان ابزال. ۇكىمەت پەن مينيسترلىكتەر مەملەكەتتىك باعدارلامالاردىڭ ورىندالۋىنا جاۋاپتى بولسا, پارلامەنت پەن قوعام سونى قاداعالۋى ءتيىس. قازىرگى زامان تالابى وسى. جاڭا مەملەكەت, جاڭا قوعام, جاڭا ەكونوميكا وسىنى تالاپ ەتەدى. مۇنى ءبىز ەلىمىزدە دەموكراتيانىڭ تەرەڭدەتىلۋىنە باتىل قادام جاسالىنۋى, 5 ينستيتۋتتىق رەفورما, «100 ناقتى قادام» ۇلت جوسپارىنىڭ ناقتى ءىس جۇزىنە اسىرىلا باستاۋى دەپ قابىلدادىق. قالاي بولعاندا دا رەفورمالار اياقسىز قالماۋى ءتيىس.
جالپى, ەلباسى وكىلەتتىكتەرىن ءبولۋ ءىسىن ابدەن ءپىسىپ-جەتىلگەن ماسەلە دەپ سانايمىز. بۇل وزگەرىستەر مەملەكەتتىڭ كەلەشەگى ءۇشىن ماڭىزدى. وعان ءبىز بەك سەنىمدىمىز.
الماس مۇحتاروۆ,
«ەجەلگى تاراز ەسكەرتكىشتەرى»
تمقم-نىڭ ءبولىم باسشىسى
تاراز