قازاقستاننىڭ اسكەري-تەڭىز كۇشتەرى 2016 جىلى جاۋىنگەرلىك دايارلىقتىڭ قارقىندىلىعىن 25,5%-عا جانە اسكەري كورابلدەردىڭ ءجۇزىپ ءوتۋىن 35,4%-عا ۇلعايتتى, دەپ حابارلادى قر قورعانىس مينيسترلىگىنىڭ ءباسپاسوز قىزمەتى.
قر قك اسكەري-تەڭىز كۇشتەرى باس قولباسشىسىنىڭ اقپاراتى بويىنشا وتكەن جىلى بارلىعى 3 600-گە جۋىق كورابلدى وقۋ-جاتتىعۋ وتكىزىلدى. 2015 جىلى ولاردىڭ سانى 2600 قۇرادى. كورابلدەردىڭ جالپى ءجۇزىپ ءوتۋى 240-تان اسا تاۋلىكتى قۇرادى, ياعني, اسكەري تەڭىزشىلەر تەڭىزدە شامامەن 5800 ساعات وتكىزدى.
جالپى العاندا, 2016 جىلى اسكەري تەڭىزشىلەر 30 مىڭنان اسا ميليا ءجۇزىپ ءوتتى. بۇل 2015 جىلمەن سالىستىرعاندا 48,3 پايىزعا كوبىرەك بولىپ وتىر. جەدەل دايىندىق شەڭبەرىندە اسكەري-تەڭىز كۇشتەرى ءبىر جىل بويى ونىڭ ىشىندە, اقتاۋ اقتاۋ گارنيزونىنىڭ اسكەري بولىمدەرىن, سونداي-اق, وزگە دە اسكەر تۇرلەرى مەن اسكەر تەكتەرىنىڭ قۇرامىنان جەدەل توپتاردى تارتا وتىرىپ, جەدەل-تاكتيكالىق جيىندار, كوماندالىق-شتابتىق جاتتىقتىرۋلار, كوماندالىق-شتابتىق جانە تاكتيكالىق-ارنايى وقۋ-جاتتىعۋلار وتكىزدى. جاۋىنگەرلىك دايارلىقتا قارۋ-جاراق پەن اسكەري تەحنيكانى قولدانۋ داعدىلارىن جەتىلدىرۋگە, بولىمشەلەر مەن كورابلدەردىڭ ۇيلەسىمدىلىگىنە ءجىتى نازار اۋدارىلدى.
2016 جىل اسكەري-تەڭىز كۇشتەرىن ينفراقۇرىلىمىن دامىتۋدا ايرىقشا وقيعاعا تولى جىل بولعانىنان ايتا كەتكەن ءجون. اقتاۋدا اسكەري كورابلدەر مەن كەمەلەردىڭ تۇراقتاۋىنا ارنالعان العاشقى پيرس اشىلدى. ورالدا وتاندىق «زەنيت» زاۋىتىندا قۇراستىرىلعان ارنايى ماقساتتاعى بولىمشەلەرگە ارنالعان العاشقى ارنايى كاتەر سۋعا ءتۇسىرىلدى. بازا سۋ ايدىنى, كەمەجاي, كەمە جولى مەن كاسپيدىڭ جاعا ماڭىنداعى بولىگىندە ميناعا قارسى قورعانىستى قامتاماسىز ەتۋ ءۇشىن جاراقتاندىرۋعا «الاتاۋ» مينا-تارتقىش كورابلى كەلىپ ءتۇستى.
ال كاسپي تەڭىزىنىڭ سۋاستى سۋ ايدىنىن, سۇڭگۋىرلەردىڭ جاتتىقتىرۋ كەرەك-جاراعىن كۇزەتۋ ءۇشىن تۇڭعىش رەت اسكەري-تەڭىز كۇشتەرىنە «گيدروپريبور» عزي» اق قازاقستاندىق كاسىپورنىندا دايىندالعان ءموبيلدى سۇڭگۋىر كەشەنى جەتكىزىلدى. اتالمىش كەشەن كاماز اۆتوموبيلدەرىنىڭ بازاسىندا ورنالاستىرىلدى. ونىڭ قۇرامىنا سۇڭگۋىرلىك تۇسۋلەردى قامتاماسىز ەتۋ قۇرالدارى بار مودۋل, اشىق جانە تۇيىقتالعان ۇلگىدەگى تىنىس الۋ اپپاراتتارى جانە تەڭىزدە جۇمىس جاساۋعا ارنالعان جىلدام جۇزەتىن قايىقتار كىرەدى.