«استانا» كلۋبىنىڭ جاتتىقتىرۋشىسى ستانيمير ستويلوۆ جارتىلاي قورعاۋشى روحەر كانياستىڭ كيپرلىك اپوەل كومانداسىنا اۋىسۋى جايلى ءوز پىكىرىن ءبىلدىردى. بۇل تۋرالى fca.kz حابارلادى.
«ءبىرىنشى كەزەكتە كانياستىڭ كومانداعا سىڭىرگەن ەڭبەگىن اتاپ وتكەن ءجون. ول ءبىز ءۇشىن وتە ماڭىزدى ويىنشىلاردىڭ ءبىرى بولاتىن. وزدەرىڭىز بىلەتىندەي, يۆان ميلەۆسكيمەن كەلىسىمشارتقا وتىردىق. باپكەرلەر القاسىنىڭ شەشىمىمەن ماۋسىمنىڭ العاشقى بولىگىندە كومانداعا تەز بەيىمدەلۋى ءۇشىن وسى ويىنشىعا باسىمدىق بەرۋدى ۇيعاردىق. ال كيپرلىكتەر روحەرگە كوپتەن بەرى كوز تىگىپ جۇرگەندىكتەن جانە كوماندا ەۆروپا ليگاسىنداعى جولىن جالعاستىرىپ, ءوز بىرىنشىلىكتەرىندە چەمپيوندىق اتتاققا تالاسىپ جاتقاندىقتان, بۇل شەشىم كلۋب ءۇشىن دە, ويىنشى ءۇشىن دە پايدالى بولادى دەپ شەشتىك. روحەر جازدا كلۋبىمىزعا كەلەدى», – دەيدى ستويلوۆ.
سونىمەن قاتار, بولگار مامانى «استانا» كومانداسىنىڭ وقۋ-جاتتىعۋ جيىندارى جايىندا دا ايتىپ ءوتتى.
«جاڭا جىلدان كەيىن كوماندا ءبىرىنشى رەت جاتتىعۋ جۇمىستارىن دۋبايدا وتكىزىپ جاتىر. بۇل جەردە ءبىز ءۇشىن وتە قولايلى جاعداي جاسالعان. جاتتىعۋ جۇمىستارى جوسپارعا ساي وتۋدە. ازىرگە بارلىعى كوڭىلىمنەن شىعۋدا», – دەيدى باپكەر.
ايتا كەتەيىك, 26-جاستاعى كولۋمبيالىق فۋتبولشى اپوەل ساپىنا 2017 جىلدىڭ 31 مامىرىنا دەيىن جالعا بەرىلگەن.