بيىل قازاقستاندا ىسكە اسىرىلا باستايتىن «نۇرلى جەر» تۇرعىن ءۇي باعدارلاماسى اياسىندا الداعى 15 جىلدا 1,5 ميلليون وتباسىن باسپانامەن قامتاماسىز ەتىلەتىن بولادى.
بۇل تۋرالى ەلباسى نۇرسۇلتان نازارباەۆ حالىققا ارناعان جىل سايىنعى جولداۋىندا ايتتى.
پرەزيدەنتتىڭ ايتۋىنشا, ۋربانيزاتسيا ۇدەرىسى قۇرىلىس سەكتورىن دامىتۋ قاجەتتىگىن العا تارتىپ وتىر. ول وتاندىق ەكونوميكانىڭ تولىققاندى درايۆەرىنە اينالۋعا ءتيىس.
«جول, تۇرعىن ءۇي جانە باسقا دا ينفراقۇرىلىم قۇرىلىسىنا ينۆەستيتسيا سالا وتىرىپ, ءبىز قالالارىمىزدىڭ ۇزاق جىلدارعا دەيىن سىرتقى جانە تەحنولوگيالىق كەلبەتىن ايقىندايتىنىمىزدى ۇمىتپاعانىمىز ءجون. سوندىقتان قۇرىلىسقا دا, قۇرىلىس ماتەريالدارىن ءوندىرۋ سالاسىنا دا جاڭا تەحنولوگيالاردى ەنگىزۋ كەرەك. ول ءۇشىن بىزدە قازىر جاقسى مۇمكىندىكتەر بار.
مەنىڭ تاپسىرمام بويىنشا بيىل «نۇرلى جەر» تۇرعىن ءۇي باعدارلاماسى ىسكە اسىرىلا باستايدى. ول اسا ماڭىزدى مىندەتتى ورىنداۋعا – الداعى 15 جىلدا 1,5 ميلليون وتباسىن تۇرعىن ۇيمەن قامتاماسىز ەتۋگە باعىتتالعان.
باعدارلامادا تۇرعىن ءۇي نارىعىن دامىتۋدىڭ كەشەندى شارالارى كورىنىس تاپقان. سونىڭ ءبىرى – «دامۋ» اكتسيونەرلىك قوعامى ارقىلى مەملەكەتتىڭ سۋبسيديا بەرۋى ەسەبىنەن قۇرىلىس سالۋشىلار ءۇشىن بانك نەسيەسىن ارزانداتۋ. تۇرعىندار ءۇشىن «قازاقستان يپوتەكالىق كومپانياسى» اكتسيونەرلىك قوعامى ارقىلى بانكتەر بەرەتىن يپوتەكالىق نەسيەنى سۋبسيديالاۋ جۇزەگە اسىرىلادى.
«تۇرعىن ءۇي قۇرىلىس جيناق بانكى» سالىمشىلارى ءۇشىن اكىمدىكتەردىڭ نەسيەلىك تۇرعىن ءۇي سالۋى جالعاسادى. وعان ىلگەرىدە بولىنگەن قارجى «رەۆولۆەر» قاعيداتى بويىنشا قايتا پايدالانىلادى», – دەدى ول.
مەملەكەت باسشىسىنىڭ ايتۋىنشا, اكىمدىكتەر حالىقتىڭ الەۋمەتتىك ءالسىز توپتارىنا ساتىپ الۋ قۇقىعىنسىز ارەندالىق تۇرعىن ءۇيدى ءبولۋ ءىسىن دامىتا بەرەتىن بولادى. جاپپاي تۇرعىن ءۇي قۇرىلىسى ءۇشىن اكىمدەر ءتيىستى جەر تەلىمدەرىن بولۋگە ءتيىس.
«ءبىز قالالاردا جەكە تۇرعىن ۇيلەردىڭ بىرىڭعاي ساۋلەت ستيلىندە سالىنۋىنا ءمان بەرەتىن بولامىز. بۇل ءۇشىن مەملەكەت قاجەتتى ينفراقۇرىلىم تۇرعىسىنان كومەك كورسەتەدى. ۇكىمەت اكىمدەرمەن بىرلەسىپ, ۇلكەن قالالاردىڭ ىرگەلەس ورنالاسقان ەلدى مەكەندەرمەن كولىك بايلانىسىن دامىتۋ جونىندە شارالار قابىلداۋى قاجەت», – دەپ ءتۇيدى ن.نازارباەۆ.