قازاقستان پرەزيدەنتى ءوزىنىڭ جولداۋىندا اتاپ وتكەندەي, بۇگىندە ۇكىمەت الدىندا 2025 جىلعا قاراي شيكىزاتتىق ەمەس ەكسپورتتى 2 ەسە ۇلعايتۋ مىندەتى تۇر.
ال بۇل باعىتتاعى جۇمىستى جانداندىرۋ ءۇشىن ەلباسىنىڭ اتاپ وتۋىنشە, ەكسپورتتى دامىتۋ مەن ىلگەرىلەتۋ تەتىكتەرىن ءبىر ۆەدومستوۆاعا شوعىرلاندىرۋ قاجەت. ەكسپورتتاۋشىلارعا «ءبىر تەرەزە» قاعيداتى بويىنشا وڭىرلەردە دە قولداۋ كورسەتۋ كەرەك.
«ۇكىمەت جانىنان ەكسپورت ساياساتى جونىندەگى كەڭەس قۇرۋدى تاپسىرامىن. وعان بيزنەس قوعامداستىعىنىڭ وكىلدەرى كىرۋگە ءتيىس. بيىلعى 1 قىركۇيەككە دەيىن ۇكىمەت اكىمدەرمەن جانە بيزنەس وكىلدەرىمەن بىرلەسىپ, بىرىڭعاي ەكسپورت ستراتەگياسىن ازىرلەۋى كەرەك. قازاقستان شەتەل ينۆەستيتسيالارىن تارتۋ ىسىندەگى كوشباسشىلىعىن ساقتاپ قالۋى قاجەت. «استانا» حالىقارالىق قارجى ورتالىعى ەل ەكونوميكاسىنا قارجى رەسۋرستارىن تارتۋدا ماڭىزدى ءرول اتقارۋعا ءتيىس. ءبىز تاۋار ءوندىرۋ مەن وتكىزۋ, قىزمەت كورسەتۋ ءىسىن جاھاندىق جەلىگە بەيىمدەۋىمىز كەرەك. مۇنى, ەڭ الدىمەن, ترانسۇلتتىق كومپانيالاردى تارتۋ ارقىلى جاساعان ءجون», – دەدى ن.نازارباەۆ.
مەملەكەت باسشىسىنىڭ ايتۋىنشا, قازاقستاندا وندىرىستەر اشۋ جونىندەگى قىتايمەن بىرلەسكەن ينۆەستيتسيالىق باعدارلامانى ءتيىمدى جۇزەگە اسىرۋ كەرەك.
«قىتاي تاراپىمەن ۋاعدالاستىققا قول جەتكىزىلدى. نىساندار بەلگىلەندى. ناقتى جۇمىس ىستەۋ قاجەت. بۇل قازاقستاندىقتار ءۇشىن 20 مىڭ جاڭا جۇمىس ورنىن اشاتىن زاماناۋي ءوندىرىس بولماق. قازىر 6 جوبا جۇزەگە اسىرىلا باستادى, ال 2 جوبا ىسكە قوسىلدى. سونىڭ ءبىرى – گيبريدتىك جانە تولىقتاي ەلەكترلى JAC اۆتوموبيلدەرىن ءىرى قۇرىلعىلاردان قۇراستىراتىن زاۋىت. قاجەتتى ينفراقۇرىلىم قالىپتاستىرۋ جايىن ەسكەرىپ, ەكسپورتقا باعدارلانعان ەلەكتروموبيل ءوندىرىسىن ودان ءارى دامىتۋ ماسەلەسىن پىسىقتاۋدى تاپسىرامىن. تۇتاستاي العاندا, قازاقستاننىڭ ءوز ينۆەستيتسيالىق ستراتەگياسى بولۋعا ءتيىس. ۇكىمەت ونى بيىلعى 1 قىركۇيەككە دەيىن ازىرلەۋى كەرەك. حالىقارالىق ىنتىماقتاستىق اياسىندا ۇلتتىق ەكونوميكالىق مۇددەلەردى قورعاپ, ىلگەرىلەتۋ قاجەت. بۇل, ەڭ الدىمەن, ەاەو, شىۇ ىشىندە جىبەك جولى ەكونوميكالىق بەلدەۋىمەن ۇشتاساتىن جۇمىستارعا قاتىستى. ول ءۇشىن ەكونوميكالىق ديپلوماتيا جۇمىسىن قايتا قۇرىپ, جانداندىرا ءتۇسۋ قاجەت», – دەپ ءتۇيدى پرەزيدەنت.