ERG كومپانياسىنىڭ ءجوندەۋ مەن تالداۋ بلوگى جانە ستراتەگيالىق دامۋ ديرەكتوراتى ماماندارى جاساعان ساناتتىق ستراتەگيا شەڭبەرىندەگى سىنامالىق جاڭا جوبا ومىرگە جول تارتتى. جاڭا باستاما اياسىندا بۇرىنعى ر65 يمپورتتىق ماگيسترالدىق رەلستەرىن وتاندىق وندىرىستەن شىققان رپ65 ونەركاسىپتىك رەلستەرى الماستىرماق. قازىر ەۋرازيالىق توپ قۇرىلىمىنا ەنەتىن «سوكولوۆ-سارىباي» كەن-بايىتۋ وندىرىستىك بىرلەستىگى» اكتسيونەرلىك قوعامىندا شەكتەۋلى جۇك سالماعىن ەسكەرە وتىرىپ, ەڭ كۇردەلى گەولوگيالىق جاعدايلاردا رەلس سىناعىن وتكىزۋ جۇمىستارى ءجۇرىپ جاتىر.
سوكولوۆ-سارىباي كەن ءوندىرۋ ءبىرلەستىگىندەگى كەن تاسيتىن تۇراقتى جولداردىڭ جالپى ۇزىندىعى 507 شاقىرىمدى قۇرايدى. بارلىق جولدار رۋدنىي, قاشار ءوندىرىس الاڭدارىنىڭ كەڭەيتىلگەن بولىگىنە جانە قورجىنكول الاڭىنداعى بولىمدەرگە, ياعني بارلىعى ءتورت باعىتقا تارالادى. ولاردىڭ ارقايسىسىنداعى يمپورتتىق ماگيسترالدىق رەلستەردى «اقتوبە رەلس ارقالىق زاۋىتى» جاۋاپكەرشىلىگى شەكتەۋلى سەرىكتەستىگى جاساپ شىعارعان وتاندىق رەلستەرمەن الماستىرىپ جاتىر.
جول شارۋاشىلىعى مەن قۇرىلىمدارى باسقارماسىنداعى تەحنيكالىق ءبولىم باستىعى سەرگەي گوربۋنوۆتىڭ ءتۇسىندىرۋىنشە, ءبىرىنشى قازاقستاندىق رەلستەر پارتياسى وتكەن جىلى جەلتوقسان ايىنىڭ باسىندا سوكولوۆ كەنىشىندەگى ەكىنشى «يۋبيلەينىي»–«پرەدوتۆالنىي» بولىمىنە توسەلگەن ەدى. كەيىننەن قالعان بولىمدەر دە قامتىلدى. وندىرىستىك الاڭداعى اۋىستىرىلعان رەلستىڭ جالپى ۇزىندىعى 2 462 مەتر بولىپ وتىر. بۇگىنگە دەيىن سالماعى 320 توننانى قۇرايتىن وتاندىق
رەلس پايدالانۋعا بەرىلدى. ونىڭ ساپاسى جاعىنان تەحنيكالىق پارامەترى بۇرىنعى سىرتتان اكەلگەن رەلستەن كەم ەمەس, ەڭ باستىسى, وتاندىق ءونىم الدەقايدا ارزان.
قازاقستان رەلستەرى وسىلاي ىشكى نارىقتا قولدانىلا باستادى, سۇرانىسقا يە. «قازاقستان تەمىر جولى» ۇلتتىق كومپانياسىنىڭ نەگىزگى جول باعىتتارىنا وسى رەلستى توسەۋى وتاندىق ءونىم ساپاسىنىڭ جارقىن مىسالى دەۋگە بولادى.
– ءبىزدىڭ رەلستەر بۇكىلرەسەيلىك تەمىر جول كولىگى عىلىمي-زەرتتەۋ ينستيتۋتىندا سىناۋدان ءساتتى ءوتتى جانە بارلىق قاجەتتى سەرتيفيكاتتاردى الدى, – دەيدى اقتوبە رەلس ارقالىق زاۋىتىنىڭ كوممەرتسيالىق ديرەكتورى اندرەي شەرين. – جاقسى ساپالى بولاتتاردى قولدانۋ جانە بەكىتىلگەن ستاندارتتاردى ساقتاۋ زاۋىت ءوندىرىسىنىڭ ەرەكشە سيپاتى بولىپ تابىلادى. الەمگە اتى ءمالىم ERG كومپانياسىمەن بىرىگىپ جۇمىس جاساۋ – ءبىز ءۇشىن قۋانىش. كەن الىبى سوكولوۆ-سارىباي كەن ءوندىرۋ بىرلەستىگىنە رەلس جەتكىزىپ بەرۋ بىزگە ۇلكەن جاۋاپكەرشىلىك جۇكتەيدى. سىناق ناتيجەسىن تاعاتسىزدانا كۇتەمىز جانە الداعى ۋاقىتتا دا جۇمىستاردى بىرلەسىپ اتقارۋعا دايىنبىز.
ءوندىرىس جولىنا توسەلگەن رەلستى سىناۋ ۋاقىتى بىرنەشە ايعا سوزىلادى, سودان كەيىن وتاندىق ءونىمنىڭ ساپاسى تۋرالى ءتۇپكىلىكتى قورىتىندىلار جاسالادى. بىراق, قازىردىڭ وزىندە ر65 رەلسىن وتاندىق رپ65-كە الماستىرۋ ۇنەم جاعىنان ءتيىمدى ەكەنىن بايقاتتى.
ءنازيرا جارىمبەتوۆا,
«ەگەمەن قازاقستان»
رۋدنىي