اتلەتتەر قالاشىعىندا قازاقستان جانە قىتاي تۋلارىن كوتەرۋ سالتاناتى ءوتتى, دەپ حابارلايدى قازاقپارات.
سالتاناتقا ەكى ەلدىڭ رەسمي تۇلعالارى, سپورتشىلارى مەن دەلەگاتسيا وكىلدەرى قاتىستى. «سىزدەر ۋنيۆەرسياداعا جارىسۋ ءۇشىن, كىم مىقتى ەكەنىن دالەلدەۋ ءۇشىن كەلدىڭىزدەر, الايدا اتلەتتەر قالاشىعىندا سىزدەردى تەك قانا دوستىق قارىم-قاتىناس, جاڭا تانىستار كۇتۋدە. ءبىز اۋىزبىرشىلىگى جاراسقان كوپتەگەن ۇلت وكىلدەرى ءومىر سۇرەتىن قازاقستان سەكىلدى, اتلەتتەر قالاشىعى دا جەر بەتىندەگى ءارتۇرلى مادەنيەت وكىلدەرىنىڭ بەيبىتشىلىك پەن كەلىسىمدە ءومىر سۇرە الاتىنىن كورسەتەتىن ۇلگىگە اينالسا دەيمىز», – دەدى اتلەتتەر قالاشىعىنىڭ اكىمى, بوكستان وليمپيادا چەمپيونى سەرىك ساپيەۆ.
سالەمدەسۋ سوزىنەن كەيىن قازاقستان جانە قىتاي دەلەگاتسيا مۇشەلەرى اتلەتتەر قالاشىعىنىڭ اكىمىنە ەستەلىك سىيلىقتارى مەن كادەسىيلارىن تارتۋ ەتتى. ۋنيۆەرسياداعا قاتىساتىن ەلدەردىڭ تۋىن كوتەرۋ سالتاناتى اتلەتتەر قالاشىعىندا كۇندە وتكىزىلەدى. جارىستار كەزىندە مۇندا بارلىعى ەكى مىڭعا جۋىق سپورتشى تۇراتىن بولادى.