قازاقستاننىڭ بىرنەشە دۇركىن چەمپيونى, 22 جاستاعى كاسىپقوي بوكسشى, ازيا چەمپيوناتىنىڭ جۇلدەگەرى فيرۋزا ءشارىپوۆا رەسەيدىڭ جۋكوۆكا كەنتىندەگى فلويد مەيۋەزەر اتىنداعى بوكس اكادەمياسىندا شەبەرلىك ساباعىن وتكىزەدى, دەپ حابارلايدى قازاقپارات.
قازاقستاننىڭ بوكسشى قىزى اكادەميا ديرەكتورى ولەگ جادوبينمەن كەزدەسكەن كەزدە, ول فيرۋزا شارىپوۆاعا وسىنداي ۇسىنىس ايتقان ەكەن. شەبەرلىك ساباعى شامامەن 23 اقپان كۇنى وتەدى دەپ جوسپارلانعان.
«1 ساعات كولەمىندە وتەتىن ماستەر-كلاسسقا كەلەم دەۋشىلەرگە ەسىك اشىق, تەگىن وتەدى. شەبەرلىك ساباعىنا جاسىنا, سپورتتاعى مارتەبەسىنە, دايىندىق دەڭگەيىنە قاراماي, كەز كەلگەن ادام كەلە بەرۋىنە بولادى», – دەيدى فيرۋزا.
ايتا كەتەيىك, فيرۋزا ءشارىپوۆا تاراز قالاسىندا تۋعان. بۇگىنگە دەيىن كاسىپقوي رينگتە ءۇش كەزدەسۋ وتكىزگەن. العاشىندا رەسەيلىك سوفيا وچيگاۆاعا ەسە جىبەرسە, قالعان ەكى قارسىلاسىنان باسىم تۇسكەن. ال بيىل كوكتەمدە تيتۋلدى ايقاسىن وتكىزۋدى جوسپارلاپ وتىر.