قىستىڭ تاڭى كەش اتادى. ەلىمىزدەگى ەڭ ءدۇبىرلى وقيعا بولىپ وتىرعان ءححۇش دۇنيەجۇزىلىك قىسقى ۋنيۆەرسيادا الاۋىنىڭ وڭىرلىك ەستافەتاسىن وتكىزۋگە قوستانايلىقتار ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ الدىنا جينالعاندا كۇن كوكجيەكتەن ءالى كورىنبەپ ەدى. وبلىس اكىمى ارحيمەد مۇحامبەتوۆ ۋنيۆەرسيادا الاۋىن ۇستاۋشىلار مەن سپورتشىلارىمىزدىڭ جانكۇيەرلەرىن قۇتتىقتادى.
«ءبىزدىڭ ەلىمىز ۋنيۆەرسياداعا 1993 جىلدان باستاپ قاتىسىپ كەلەدى. وسى جىلدار ىشىندە ەلىمىزدىڭ 700 سپورتشىلارى الەمدىك سپورت دوداسىنان 125 مەدال قانجىعالاعان ەكەن. تمد ەلدەرى بويىنشا ءبىرىنشى ءبىزدىڭ ەلىمىزدە ءوتىپ وتىرعان ۋنيۆەرسيادادا ءوز وبلىسىمىزدان جانە ەلىمىزدەن قاتىساتىن سپورتشىلارعا جەڭىس تىلەيمىز» دەدى ارحيمەد بەگەجان ۇلى. ۋنيۆەرسيادا الاۋىنىڭ قوستاناي وڭىرلىك ەستافەتاسىنىڭ سالتاناتىنا قازاقستاننىڭ ەڭبەك ەرلەرى سايران بۇقانوۆ, بوريس كنيازەۆ جانە المات تۇرسىنوۆ شاقىرىلدى. ولار الاۋدى ۇستاۋ قۇرمەتىنە يە بولدى.
ۋنيۆەرسيادا الاۋىنىڭ قوستانايداعى وڭىرلىك شىراعىن اتى اڭىزعا اينالعان شاڭعىشى, 1976 جىلى ينسبرۋكتە وتكەن (اۆستريا) قىسقى وليمپيادانىڭ قولا جۇلدەگەرى, سپورت ارداگەرى يۆان گارانين تۇتاتتى. العاشقى الاۋ ەستافەتاسىن وبلىس اكىمى ارحيمەد مۇحامبەتوۆ الىپ, قوستانايدىڭ سپورت ماقتانىشىنىڭ ءبىرى, بوكستەن وليپيادانىڭ ەكى رەت قولا جۇلدەگەرى يۆان دىچكوعا تابىس ەتتى.
ۋنيۆەرسيادا الاۋىنىڭ وڭىرلىك ەستافەتاسىنا قوستاناي وبلىسىنداعى ەڭ ۇزدىك سپورتشى ستۋدەنتتەر, شىعارماشىلىقتا, كاسىپكەرلىكتە تابىسقا جەتكەن جاستار--بارلىعى 60 ادام قاتىسىپ, ولار الاۋدى 12 شاقىرىمعا جۇگىرىپ, الىپ ءوتتى.
قوستانايدان ۋنيۆەرسياداعا شورت-ترەكتەن اناستاسيا كرەستوۆا, كونكيمەن سىرعاناۋدان الەكساندر كلەنكو, شاڭعى جارىسىنان ۆيتالي پۋحكالو جانە شايبالى حوككەيدەن ماكسيم گريازنوۆ قاتىسادى. ولار قوستاناي مەملەكەتتىك ۋنيۆەسريتەتى مەن قوستاناي مەملەكەتتىك پەداگوگيكا ينستيتۋتىنىڭ ستۋدەنتتەرى. ۋنيۆەرسيادا الاۋىنىڭ وڭىرلىك ەستافەتاسىندا بەلگىلى وپەرا ءانشىسى سۇندەت بايعوجين جانە جەرگىلىكتى فيلارمونيا انشىلەرى اننەن شاشۋ شاشتى.
ءنازيرا جارىمبەتوۆا, «ەگەمەن قازاقستان»