«قاينار-اكب» كاسىپورنى ءوز ونىمدەرىن بەنين رەسپۋبليكاسىنا جەتكىزۋدى باستادى, دەپ جازادى palata.kz.
ەلىمىزدەگى اككۋمۋلياتور قۇراستىراتىن جالعىز كاسىپورىن – «قاينار-اكب» جاڭا كەزەڭگە اياق باستى. كومپانيا «BARS Asia» اككۋمۋلياتورلارىنىڭ العاشقى پارتياسىن افريكا قۇرلىعىنا جەتكىزدى. قازىر قازاقستاندىق اككۋمۋلياتورلاردى بەنين رەسپۋبليكاسىندا سىناقتان وتكىزىپ جاتىر. «قاينار-اكب» بەنيندەگى دۇكەندەر جەلىسىمەن سەرىكتەستىك ورناتقان, «BARS Asia» ماركاسىنىڭ باتارەيالارى وسى دۇكەندەر ارقىلى ساتىلماق.
«افريكا تۇرعىندارى قازاقستاندىق كاسىپورىن قۇراستىرعان اككۋمۋلياتورلاردىڭ ساپاسىن جوعارى باعالادى. «قاينار-اكب» ەندى افريكا نارىعىنا «تاستاي باتىپ, سۋداي ءسىڭۋدى» ماقسات ەتىپ وتىر», – دەيدى كومپانيانىڭ باقىلاۋشى كەڭەس توراعاسى قۋانىش اجماعانبەتوۆ.
وتكەن جىلى «قاينار-اكب» 1 ملن 884 مىڭ اككۋمۋلياتور قۇراستىرىپ, قازاقستان نارىعىنىڭ 90%-ىن وتاندىق اككۋمۋلياتورلارمەن قامتاماسىز ەتكەن. «Kainar» جانە «Bars» اككۋمۋلياتورلارىنا رەبرەندينگ جاسالىپ, ولار قىتايعا جەتكىزىلە باستادى. جاقىن ارادا كاسىپورىن ەۋروپا نارىعىنا شىعۋدى جوسپارلاپ وتىر. بۇعان دەيىن پولشا رەسپۋبليكاسىمەن ساۋدا كەلىسىمىن جاساعان بولاتىن. قازىرگى تاڭدا اككۋمۋلياتور زاۋىتى ونىمدەرىنىڭ كوپ بولىگى تمد مەن الىس-جاقىن ەلدەرگە ساتىلادى. «قاينار-اكب» ونىمدەرى ەۋروپالىق, رەسەيلىك, جاپونيالىق ستاندارتتارعا دا سايكەس كەلەدى.
ەستەرىڭىزگە سالا كەتەيىك, 2016 جىلى «قاينار-اكب» ەلىمىزدىڭ ۇزدىك ەكسپورتتاۋشىلارىنا بەرىلەتىن « ۇلى دالا ەلى» برەندىن جەڭىپ العان ەدى.