قازاقستانداعى ءۇي باعاسى ەڭ ارزان جانە ەڭ قىمبات قالالار

جاڭادان سالىنعان تۇرعىن ءۇي كەشەندەرىنىڭ ەڭ قىمبات قۇنى استانا, اتىراۋ مەن الماتى قالالارىندا تىركەلدى, دەپ حابارلايدى قازاقپارات. قر ستاتيستيكا اگەنتتىگىنىڭ مالىمەتتەرى بويىنشا, وتكەن ايدا استاناداعى ءبىر پاتەردىڭ ورتاشا قۇنى شارشى مەترىنە 338 مىڭ تەڭگەنى قۇراعان. بۇل جاڭا ۇيلەردىڭ جالپىۇلتتىق ورتاشا باعاسىنان 136,8%-عا جوعارى. اتىراۋدا – 326 مىڭ تەڭگە (131,9%-عا جوعارى), الماتىدا – 304 مىڭ تەڭگە (123,1%).ءوز كەزەگىندە استانادا ورتاشا جالاقى 207 مىڭ تەڭگە كولەمىندە تىركەلسە, اتىراۋدا – 279 مىڭ تەڭگە, الماتىدا – 174 مىڭ تەڭگە. جاڭادان سالىنعان ەڭ ارزان تۇرعىن ءۇيدى جەزقازعاندا جانە تالدىقورعاندا ساتىپ الۋعا بولادى, وندا شارشى مەترى 90 مىڭ تەڭگەدەن ساۋدالانۋدا, تارازدا – 116 مىڭ تەڭگە. اتالمىش باعالار «وڭىرلەردى دامىتۋ-2020» باعدارلاماسى اياسىندا سالىنىپ جاتقان پاتەرلەردىڭ باعاسى. ايتا كەتەيىك, قاراعاندا وبلىسىندا ورتاشا جالاقى – 123 مىڭ تەڭگە, الماتى وبلىسىندا – 102 مىڭ تەڭگە, جامبىل وبلىسىندا 94 مىڭ تەڭگەنى قۇرايدى. جالپى رەسپۋبليكا بويىنشا, 2016 جىلدىڭ جەلتوقسان ايىندا الدىنعى ايمەن سالىستىرعاندا پاتەر قۇنى 0,3 پايىزعا, 2015 جىلمەن سالىستىرعاندا 3,6 پايىزعا تومەندەگەن. باسپانا قۇنى شىمكەنتتە – 24 پايىزعا, اقتوبەدە – 13,7 پايىزعا, سەمەيدە – 11,9 پايىزعا, كوكشەتاۋدا – 11,8 پايىزعا كۇرت تۇسكەن.