بوكستان قازاقستان قۇراماسىنىڭ وقۋ-جاتتىعۋ جيىندارىنىڭ سوڭعى كۇنىندە قازاق بوكسىنىڭ ارداگەرلەرى الماتىداعى AIBA اكادەمياسىنا بارىپ, بوكسشىلارعا اق باتاسىن بەردى. بۇل تۋرالى بوكس فەدەراتسياسىنىڭ ءباسپاسوز قىزمەتى حابارلادى.
قازاقستان قۇراماسىنىڭ باس باپكەرى مىرزاعالي ايتجانوۆتىڭ ايتۋى بويىنشا اقساقالدان اق باتا الۋ قۇرامانىڭ داستۇرىنە اينالعان ەكەن.
«ناقتىراق ايتار بولسام, 2010 جىلدان باستاپ جاتتىعۋ جيىندارىنا اقساقالداردى شاقىرۋ داستۇرگە اينالدى. ءبىزدىڭ بابالارىمىز ۇلى ءىستىڭ الدىندا قۇران وقىپ, باتا العان. ءبىز دە وسى ءداستۇر بويىنشا بايراقتى باسەكەلەردىڭ الدىندا اقساقالداردىڭ باتاسىن الامىز. بۇل جولى قازاقستان بوكس ارداگەرلەرىنىڭ توراعاسى ءمۇسلىم دايىربەكوۆ كەلىپ, باتاسىن بەردى», – دەيدى قۇرامانىڭ باس باپكەرى.
ايتا كەتەيىك, بىلتىر ريو وليمپياداسىنىڭ الدىندا ءمۇسلىم دايىربەكوۆ, ەرماحان ىبرايىموۆ, قازاقستان ۇلتتىق عىلىم اكادەمياسىنىڭ پرەزيدەنتى مۇرات ءجۇرىنوۆ وسى ءىس-شاراعا قاتىسىپ, سپورتشىلارىمىزعا اق جول تىلەگەن.