مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە سىبايلاس جەمقورلىققا قارسى ستراتەگيانى ىسكە اسىرۋ بويىنشا جاڭارتىلعان قۇرامداعى ارنايى مونيتورينگ توبىنىڭ العاشقى وتىرىسى ءوتتى.
ايتا كەتەيىك, اتالعان توپتىڭ جاڭارتىلعان قۇرامىنا ءماجىلىس دەپۋتاتتارى, ۇكىمەتتىك ەمەس ۇيىمداردىڭ, باس پروكۋراتۋرا, اقپارات جانە كوممۋنيكاتسيالار مينيسترلىگى مەن باق وكىلدەرى جانە الەۋمەتتىك جەلىنى بەلسەندى قولدانۋ ارقىلى قوعام اراسىندا كەڭىنەن تانىمال بولعان ازاماتتار قابىلدانعان بولاتىن.
كەڭەستىڭ كۇن تارتىبىندە ەلىمىزدىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسىن ىسكە اسىرۋ جونىندەگى 2015-2017 جىلداعى ءىس-شارالار جوسپارىنىڭ ورىندالۋى جايى تالقىلاندى. «قازاقستاننىڭ ازاماتتىق اليانسى» زتب پرەزيدەنتى ءارى ارنايى مونيتورينگ توبىنىڭ جەتەكشىسى ن.ەرىمبەتوۆ سىبايلاس جەمقورلىققا قارسى ستراتەگيانى ىسكە اسىرۋ جونىندەگى ءىس-شارالار جوسپارىن مەملەكەتتىك ورگاندارمەن ورىنداۋ پروتسەسى جىل سوڭىنا قاراي اياقتالاتىنىن اتاپ ءوتتى.
«بۇگىنگە دەيىن اتقارىلعان 40 ءىس-شارانىڭ ورىندالۋ مونيتورينگىمەن تانىسىپ شىققان تاۋەلسىز ساراپشىلار اگەنتتىكتىڭ ءىشكى باعالاۋىنا كەلىسىم ءبىلدىرىپ, ونىڭ وبەكتيۆتىلىگىنىڭ مويىندالاتىنىن ماقۇلداعانى ءجون سەكىلدى. ويتكەنى, جاقىن كۇندەرى جۇمىس توبىنىڭ سىرتقى باعالاۋ قورىتىندىلارى پرەمەر-ءمينيستردىڭ كەڭسەسىنە باعىتتالادى دەپ جوسپارلانعان», – دەدى ن.ەرىمبەتوۆ.
سونىمەن قاتار, جيىندا ونجىلدىققا ارنالعان سىبايلاس جەمقورلىققا قارسى ستراتەگيانى ىسكە اسىرۋ جونىندەگى 2015-2017 جىلدارعا ارنالعان ءىس-شارالار جوسپارىنىڭ تارماقتارىن باعالاۋ بويىنشا ۇسىنىلعان پوزيتسيالاردى ۇلتتىق ەكونوميكا مينيسترلىگى دەپارتامەنتى ديرەكتورىنىڭ ورىنباسارى ۆ.بۋسس تا وڭ باعالادى. ءسويتىپ, توپ مۇشەلەرى تالقىلاۋدان كەيىن وتكەن جىلى جوسپارلانعان 41 ءىس-شارانىڭ بىرەۋىنەن وزگەسى تولىق ورىندالدى دەگەن پىكىرگە توقتادى.
ال جيىندى قورىتىندىلاعان مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ا.شپەكباەۆ ەگەر ءىس-شارالاردىڭ دارەجە-دەڭگەيى ورىندالعان, ورىندالماعان نەمەسە جارتىلاي ورىندالعان بولىپ بەلگىلەنسە, مەملەكەتتىك ورگاندار 2017 جىلى مونيتورينگ توبىنا ءوز ەسەپتەرىن ۇسىناتىنىن ايتتى.
نۇرلىبەك دوسىباي,
«ەگەمەن قازاقستان»