تەمىرتاۋ قالاسىنىڭ تۋماسى شۋحرات حاكيموۆ يسپانيادا شاراپ ءوندىرىسى بويىنشا ءوز بيزنەسىن قۇرۋدا جانە ءوز شاراپتارىن قازاقستانعا ەكسپورتتاۋدى جولعا قويۋعا ارەكەتتەنىپ ءجۇر, دەپ جازدى قازاقپارات Astana Times سايتىنا سىلتەمە جاساپ.
باسىلىمنىڭ حابارلاۋىنشا, شۋحرات حاكيموۆ قازاقستاننان 21 جاسىندا كەتكەن جانە ول كەزدە بىردە-ءبىر شەت ءتىلىن بىلمەگەن. ول 2009 جىلى شاراپ جاساۋ ءىسىن مەڭگەرۋ ءۇشىن فرانتسيانىڭ انجە قالاسىنا اتتانعان.
ونىڭ ايتۋىنشا, باستاپقىدا ءوز شىعىندارىن وتەۋ ءۇشىن ول انا-اناسى مەن دوستارىنان 600 مىڭ تەڭگە قارىزعا الىپ, ستۋدەنتتىك نەسيە راسىمدەگەن. ستۋدەن كەزىندە ول كۇن كورۋ ءۇشىن داياشى, ساتۋشى جانە وزگە دە جۇمىستارعا جالدانعان. حاكيموۆ ءوزىنىڭ بولاشاق ايەلى گابريەلامەن فرانتسيادا تانىسقان. وقۋ اياقتالعان سوڭ ولار گابريەلانىڭ تۋعان ولكەسى اليكانتەگە (يسپانيا) كوشكەن.
بۇگىندە شۋحرات حاكيموۆ يسپانياداعى شاراپ ەكسپورتتايتىن «Winexfood» كومپانياسىنىڭ جەتەكشىسى جانە نەگىزىن قالاۋشى.
«مەن 2012 جىلى يسپانيالىق ينۆەستورلارمەن بىرگە كومپانيانىڭ نەگىزىن قالاعانداردىڭ ءبىرى بولدىم. العاشىندا يسپانيانىڭ ازىق-ت ۇلىك جانە اۋىلشارۋاشىلىق ونىمدەرىن ەكسپورتتاۋدى ويلاعانبىز, بىراق قازىر ورگانيكالىق يسپاندىق شاراپ جانە سپيرتتىك ىشىمدىكتەر ەكسپورتىنا دەن قويىپ وتىرمىز», – دەپ اتاپ ءوتتى حاكيموۆ.