جۋىردا الماتىدا قازاقستاننىڭ كوممۋنيستىك حالىقتىق پارتياسى اتىنان پرەزيدەنتتىككە كانديدات جامبىل احمەتبەكوۆ رەسەي فەدەراتسياسىنىڭ باق وكىلدەرىمەن كەزدەسۋ وتكىزدى.
كەزدەسۋ دوڭگەلەك ۇستەل ءتۇرىندە ۇيىمداستىرىلعاندىقتان, جۋرناليستەر ءوزدەرىن قىزىقتىرعان ساۋالدارىن قويۋعا مۇمكىندىك الدى. كانديداتپەن كەزدەسۋگە كەلگەن جۋرناليستەردىڭ اراسىندا «موسكوۆسكي كومسومولەتس», «كومسومولسكايا پراۆدا», «پارلامەنتسكايا گازەتا», «نوۆىە يزۆەستيا» گازەتتەرى مەن «پروفيل» جۋرنالىنىڭ, «گولوس روسسي» راديوسىنىڭ, سونداي-اق, «روسسيا-24» تەلەارناسى مەن ريا نوۆوستي, «مير» تەلەكومپانيالارىنىڭ وكىلدەرى بولدى.
ج.احمەتبەكوۆ باسقوسۋ بارىسىندا جينالعاندار الدىندا ءوزىنىڭ سايلاۋالدى تۇعىرناماسىن بايانداپ, «جامبىل احمەتبەكوۆتىڭ ءۇش باستاماسى» باعدارلاماسىنىڭ ءمان-ماڭىزىن ءتۇسىندىرىپ بەردى.
شارا اياسىندا رەسەيلىك جۋرناليستەر «نە سەبەپتى پرەزيدەنتتىك سايلاۋعا ءتۇستىڭىز جانە مۇنىمەن نەنى كوزدەپ وتىرسىز؟», «سايلاۋ كەزىندە حالىقتىڭ قاي الەۋەتتىك بولىگى سىزگە كوبىرەك داۋىس بەرەدى دەپ ويلايسىز؟», «سايلاۋعا ءتۇسۋ بارىسىندا ەل تۇرعىندارىنىڭ قانشا پايىز داۋىسىن الامىن دەپ وتىرسىز؟», «قازىرگى تاڭدا ءجۇرگىزىلىپ وتىرعان ساياساتتان قانداي كەمشىلىكتەردى ايتار ەدىڭىز؟», «ءسىز رەفەرەندۋمعا قانداي كوزقاراسپەن قارادىڭىز؟» دەگەن تۇرعىدا بىرقاتار ساۋالدار قويدى.
جامبىل احمەتبەكوۆ بيىلعى جىلدىڭ 14 اقپانىنداعى قازاقستاننىڭ كوممۋنيستىك حالىقتىق پارتياسىنىڭ سەزىندە ءوزىنىڭ پارتيا اتىنان سايلاۋعا تۇسكەنىن, الايدا, بۇل ۇلكەن جاۋاپكەرشىلىكتى جۇكتەيتىندىكتەن, اتالعان ساياسي ناۋقانعا بارلىق كۇش-ءجىگەرىن جۇمساپ وتىرعانىن جەتكىزدى. «ءبىزدىڭ سايلاۋالدى تۇعىرنامامىزدىڭ باستى ماقساتى – ەلدىڭ الەۋمەتتىك-ەكونوميكالىق الەۋەتىن كوتەرۋ», – دەدى كانديدات ءوز سوزىندە.
ال ءبىر ءجۋرناليستىڭ «سايلاۋ كەزىندە حالىقتىڭ قاي الەۋمەتتىك بولىگى سىزگە كوبىرەك داۋىس بەرەدى دەپ ويلايسىز؟» – دەگەن ساۋالىنا ج.احمەتبەكوۆ ءوزىنىڭ باعدارلاماسىنىڭ الەۋمەتتىك از قامتىلعان توپتارىنا, اتاپ ايتقاندا, زەينەتكەرلەرگە, مەملەكەتتىڭ قامقورلىعىنا ءزارۋ مۇگەدەك جاندارعا, جۇمىسسىزدار مەن ءوز ءىسىن دوڭگەلەتىپ جۇرگەن كاسىپكەرلەرگە ارنالعاندىعىن جەتكىزدى. «الدىن- الا ەشقانداي بولجام جاساعىم كەلمەيدى. مەن الماتى وبلىسى تۇرعىندارىنا دەيىن اقمولا جانە جامبىل وبلىسىنىڭ حالقىمەن كەزدەستىم. بۇل كەزدەسۋلەردىڭ ءناتيجەسى كوڭىلدەگىدەي بولادى دەپ ويلايمىن. ءبىزدىڭ باعدارلامامىز قوعامنىڭ الەۋمەتتىك جاعىنان از قامتىلعان توبىنا ارنالعانىن ايتتىم عوي. ال بۇگىندە ەلىمىزدەگى مۇنداي تۇرعىنداردىڭ جالپى سانى 2,7 ملن. ادامدى قۇرايدى. تاعى ءبىر اتاپ وتەرلىگى, وسىنشاما حالىقتىڭ 75 مىڭعا جۋىعى ءبىزدىڭ پارتياعا مۇشە. سوندىقتان, تومەنگى كورسەتكىشتەن ەمەس, كەرىسىنشە, جاقسى ناتيجەدەن ءۇمىتتىمىز», – دەدى بۇل تۋراسىندا ج.احمەتبەكوۆ.
كەزدەسۋ سوڭىندا پرەزيدەنتتىكتەن ۇمىتكەر رەسەيلىك باق جۋرناليستەرىنە سۇحبات بەردى. ولار ءوز كەزەكتەرىندە كانديداتقا الداعى سايلاۋ ناۋقانىندا ساتتىلىك تىلەدى.
باسقوسۋدان كەيىن ج.احمەتبەكوۆ شاڭىراق اۋىلى تۇرعىندارىمەن كەزدەسىپ, ولاردى تولعاندىرىپ وتىرعان ماسەلەلەر جونىندە پىكىر الماستى.
نازگۇل ماقاجان, ج.احمەتبەكوۆتىڭ سايلاۋالدى شتابىنىڭ قىزمەتكەرى.