23 ناۋرىز كۇنى اقوردادا مەملەكەت باسشىسى نۇرسۇلتان نازارباەۆ ەقىۇ/دياقب سايلاۋدى بايقاۋ جونىندەگى ميسسياسىنىڭ باسشىسى داان ەۆەرتستى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ باسپاسوز قىزمەتى.
اڭگىمەلەسۋ بارىسىندا قازاقستاندا وتەتىن الداعى پرەزيدەنتتىك سايلاۋ ماسەلەلەرى تالقىلاندى.
– بۇل ماڭىزدى كەزدەسۋ بولدى. مەن پرەزيدەنتتىككە كورنەكتى كانديدات نۇرسۇلتان نازارباەۆپەن كەزدەستىم. ءبىزدىڭ ميسسيامىزدىڭ مىندەتى – قازاقستانداعى سايلاۋ جۇيەسىن جاقسارتۋ جانە سايلاۋدى وتكىزۋ تاجىريبەسىن بايقاۋ. پرەزيدەنت الداعى سايلاۋدى اشىق, تازا جانە ءادىل باعالاۋعا كەڭەس بەردى, – دەدى جۋرناليستەرگە ارنالعان بريفينگتە د.ەۆەرتس.
بۇدان بۇرىن حابارلانعانىنداي, بيىلعى جىلعى 3 ناۋرىزدا «نۇر وتان» حدپ-نىڭ ورتالىق اپپاراتىندا بولعانىندا, پرەزيدەنت بەلسەندى سايلاۋالدى ۇگىت-ناسيحات جۇمىستارىن ءجۇرگىزبەيتىنىن, ال مەملەكەتتىك ساياساتتى ىسكە اسىرۋدا وزەكتى ماسەلەلەرمەن اينالىساتىنىن اتاپ كورسەتكەن بولاتىن. نۇرسۇلتان نازارباەۆ سونداي-اق سايلاۋالدى كەزەڭدە قولدانىستاعى زاڭنامانى قاتاڭ ساقتاۋ قاجەتتىگىن اتاپ وتكەن ەدى. مەملەكەت باسشىسى بارلىق دەڭگەيدەگى اكىمدەردىڭ نازارىن سايلاۋ زاڭناماسىن ساقتاۋ قاجەتتىگىنە اۋدارعان. بارلىق مەملەكەتتىك بيلىك ورگاندارى سايلاۋ ناۋقانىنىڭ بارىسىنا ارالاسپاي, تەك ءوز ىستەرىمەن شۇعىلدانۋلارى كەرەك. پرەزيدەنت باس پروكۋراتۋراعا زاڭنامانىڭ ساقتالۋىن قاداعالاۋدى قامتاماسىز ەتۋدى, سايلاۋ تۋرالى زاڭنامانىڭ بۇزىلعاندىعى جايلى شاعىمدار مەن وزگە وتىنىشتەر تۋرالى دەرەكتەرگە جەدەل نازار سالىپ, قانداي دا ءبىر قۇقىق بۇزشىلىق دەرەكتەرى ورىن العان جاعدايدا ونى تەز ارادا جويىپ, بۇل رەتتە پرينتسيپشىلدىك تانىتۋلارى قاجەتتىگى تۋرالى تاپسىرما بەرگەن. سونىمەن بىرگە, نۇرسۇلتان نازارباەۆ بايلانىس جانە اقپارات مينيسترلىگىنە سايلاۋالدى ۇگىت-ناسيحات كەزەڭىندە كانديداتتاردىڭ بۇقارالىق اقپارات قۇرالدارىنا تەڭ قولجەتىمدىلىگىن قامتاماسىز ەتۋدى تاپسىرعان. مەملەكەت باسشىسى سايلاۋعا بايقاۋ جۇرگىزۋدى جانە قوعامدىق بايقاۋدى قامتاماسىز ەتۋ قاجەتتىگىن اتاپ وتكەن.
سۋرەتتى تۇسىرگەندەر س.بوندارەنكو, ب.وتارباەۆ