«ناۋرىز مەيرامى» حالقىمىزدىڭ اسىعا كۇتەر ەرەكشە ءبىر مەرەكەسىنە اينالدى. بىرلىك پەن ىنتىماققا باستايتىن ايتۋلى مەرەكەنى قازىر جەر-جەردە تويلاۋ باستالىپ كەتتى. سونداي شارانىڭ ءبىرى كەشە پارلامەنت ماجىلىسىندە ءوتتى.
بىلتىردان باستاپ پارلامەنت تاراپىنان ءاز ناۋرىزدىڭ ءۇش كۇن دەمالىس كۇنى بولىپ بەلگىلەنۋىن قامتاماسىز ەتەتىن نورما قابىلدانىپ, بۇل شارا ايتۋلى مەرەكەنىڭ اجارىن اشا ءتۇستى. ال ءماجىلىس فويەسىندەگى ءاز ناۋرىز مەيرامىن اتاپ ءوتۋ دە وزىندىك جاراسىمىن تاپتى. ۇلكەن فويە ءار ءتۇرلى شارالارمەن كومكەرىلىپ, لەنتالارمەن بەزەندىرىلىپتى. وڭ جاق بەتىندە ۇلتتىق ۇلگىدەگى ەكى جارتىلاي كيىز ءۇيدىڭ ماكەتى كورىنەدى. ونداعى ءدوڭگەلەك ۇستەلدىڭ ۇستىنە قازاقتىڭ ۇلتتىق تاعامدارى مەن سارى قىمىزى قويىلعان. مالداس قۇرىپ وتىرۋ ءۇشىن جۇمساق كورپەلەر توسەلگەن.
كيىز ءۇي مەرەكەلىك بەلگىلەرمەن جانە ۇلتتىق ناقىشتارمەن ادەمى بەزەندىرىلىپتى. فويەگە جينالعان توپتىڭ اراسىندا قازاقتىڭ ۇلتتىق كيىمىن كيىنگەندەر دە جەتەرلىك. ءبىز سولاردىڭ اراسىنان دەپۋتاتتار زاعيپا باليەۆا, سۆەتلانا فەرحو مەن ناتاليا گەللەرتتى كوزىمىز شالىپ قالدى. مىنە, وسىنداي جاراسىمىن تاپقان توپتىڭ الدىنا شىققان پالاتا توراعاسى ورال مۇحامەدجانوۆ قىسقاشا ءسوز سويلەپ, كوپشىلىك قاۋىمعا ءوزىنىڭ ىزگى تىلەگىن جەتكىزدى.
– ەگەمەندى ەلىمىز تاعى دا ءبىر كەزەكتى ناۋرىز مەرەكەسىن تويلاپ وتىر. بۇل مەيرامنىڭ ماعىناسىن, ءمانىن, دارەجەسى مەن تاريحىن ەندى ءبىلىپ كەلە جاتىرمىز. ويتكەنى, كوپ جىلدار بويى بۇل ءبىزدىڭ ەلدە تويلانباي, تاۋەلسىزدىككە قول جەتكەلى عانا وسى مۇمكىندىككە شىن ءمانىندە يە بولدىق, – دەدى سپيكەر. – كۇن مەن ءتۇن تەڭەلىپ, جەر-انا التى اي قىستان شىعىپ, مۇز قۇرساۋدان بوسانىپ, جاڭارىپ تۇلەي باستايدى. ولاي بولسا, ارداقتى اعايىن, ءاز ناۋرىز قۇتتى بولسىن, اق مول بولسىن!
بۇدان كەيىن مەرەكەلىك شارا ءان مەن كۇيگە, مىڭ بۇرالعان بيگە ۇلاستى. «گۇلدەر-اي» فولكلورلىق بيشىلەر توبىنىڭ قىزدارى «شاتتىق» ءبيىن بيلەسە, پرەزيدەنت وركەسترىنىڭ ءانشىسى نۇربولات قۇسايىنوۆ ءوز ارناۋىن دومبىرامەن قۇيقىلجىتا جەتكىزدى. سونىمەن قاتار, حالىقارالىق بايقاۋلاردىڭ جۇلدەگەرى ساۋلە جەلدىباەۆا, «ناۋرىز» فولكلورلىق توبى, ءا.قاشاۋباەۆ بايقاۋىنىڭ جۇلدەگەرى گۇلميرا سارينا, «جاس قانات» ءان بايقاۋىنىڭ لاۋرەاتى مەرۋەرت ءابدىمومىن ءوز ونەرلەرىن ورتاعا سالدى.
اسقار تۇراپباي ۇلى.