قازاق كينو ونەرىنىڭ ءىرى تۇلعالارىنىڭ ءبىرى – ابدوللا قارساقباەۆ. ەگەر ول ءتىرى بولسا, ۇستىمىزدەگى جىلدىڭ كۇزىندە 85 جاسقا تولار ەدى. وكىنىشى كوپ ءومىردىڭ ەرتە سونگەن جارىق جۇلدىزدارىنىڭ ءبارى بىردەي ەسكە الىنا بەرمەيدى. ول «بوتاگوز», «قيلى كەزەڭ» فيلمدەرىنىڭ ەكىنشى رەجيسسەرى بولدى. ال «مەنىڭ اتىم قوجا», «التى جاسار الپامىس» سىندى فيلمدەرى قازاق كينو ونەرىنىڭ التىن قورىنا ەندى.
«مەنىڭ اتىم قوجا» فرانتسياداعى كانن فەستيۆالىنىڭ ديپلومىنا يە بولعانىن, «قازاقفيلمنىڭ» العاشقى حالىقارالىق دەڭگەيدە تانىلعان ءفيلمى ەكەنىن دە ۇمىتپايىق. ال «التى جاسار الپامىس» فيلمى بۇكىلوداقتىق ح كينوفەستيۆالدىڭ جۇلدەگەرى اتاندى.
بەلگىلى كينورەجيسسەردىڭ 60, 70, 75, 80 جىلدىق مەرەيتويلارى دا اتاۋسىز قالدى. سوندىقتان دا كسرو حالىق ءارتىسى بيبىگۇل تولەگەنوۆا, ەڭبەك جانە قوعام قايراتكەرى سۇلتان جيەنباەۆ, كسرو حالىق ءارتىسى اسانالى ءاشىموۆ, مەملەكەتتىك سىيلىقتىڭ لاۋرەاتى, قازاقستاننىڭ حالىق ءارتىسى ەسكەندىر حاسانعاليەۆ, كسرو حالىق ءارتىسى, قىرعىزستاندىق كينورەجيسسەر بولاتبەك شامشيەۆ; قازاقستان جازۋشىلار وداعىنىڭ توراعاسى, مەملەكەتتىك سىيلىقتىڭ لاۋرەاتى نۇرلان ورازالين, لەرمونتوۆ اتىنداعى ورىس دراما تەاترىنىڭ كوركەمدىك جەتەكشىسى, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى رۋبەن اندرياسيان, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, كينواكتەر نۇرجۇمان ىقتىمباەۆ, جازۋشى, «قۇرمەت» وردەنىنىڭ يەگەرى ناعاشىبەك قاپالبەك ۇلى سىندى قايراتكەرلەردىڭ اتاقتى اكتەردىڭ مەرەيتويىن اتاپ ءوتۋ جونىندە كوتەرگەن باستاما-ۇندەۋىن قولدايمىن. قارساقباەۆتىڭ قازاق مادەنيەتىنە قوسقان ۇلەسىن ەسكەرە وتىرىپ, ونىڭ 85 جىلدىق مەرەيتويىن اتاپ وتۋگە بايلانىستى ۇكىمەتتىك كوميسسيا قۇرىلىپ, ءتيىستى ۇيىمداستىرۋ شارالارى وتكىزىلۋى كەرەك دەپ ەسەپتەيمىن.
ءۋاليحان قاليجان, ءماجىلىس دەپۋتاتى.