كەشە قازاقستان رەسپۋبليكاسى قورعانىس مينيسترلىگىندە شانحاي ىنتىماقتاستىق ۇيىمىنىڭ قۇرىلعانىنا 10 جىل تولۋى قارساڭىندا وسى ۇيىمعا مۇشە مەملەكەتتەر قورعانىس مينيسترلەرىنىڭ ءماجىلىسى ءوتتى.
قر قورعانىس ءمينيسترى ءادىلبەك جاقسىبەكوۆتىڭ توراعالىق ەتۋىمەن وتكەن ماجىلىستە قىتاي حالىق رەسپۋبليكاسىنىڭ ۇلتتىق قورعانىس ءمينيسترى ليان گۋانلە, قىرعىز رەسپۋبليكاسىنىڭ قورعانىس ءمينيسترى ءابيبوللا قۇدايبەرديەۆ, رەسەي فەدەراتسياسى قورعانىس ءمينيسترىنىڭ ورىنباسارى اناتولي انتونوۆ, تاجىكستان رەسپۋبليكاسىنىڭ قورعانىس ءمينيسترى شەرالي حايرۋللوەۆ پەن وزبەكستان رەسپۋبليكاسى قورعانىس ءمينيسترىنىڭ حالىقارالىق بايلانىس جونىندەگى ورىنباسارى رۋستام نيازوۆ قاتىستى.
ماجىلىستە شىۇ-عا مۇشە مەملەكەتتەر قورعانىس ۆەدومستۆولارى ىنتىماقتاستىعىنىڭ دامۋ بارىسى, حالىقارالىق جانە وڭىرلىك قاۋىپسىزدىككە بايلانىستى ماسەلەلەر قارالدى. سونىمەن بىرگە وندا ءوڭىردى تۇراقسىزداندىرۋعا باعىتتالعان كەز كەلگەن ءىس-قيمىلعا قارسى تۇرا الاتىن سەنىمدى مەحانيزمدى قۇرۋدىڭ ماڭىزدى ءارى ول كوپ جوسپارلى ءمىندەتتەردىڭ ءبىرى بولىپ سانالاتىنىنا, بۇل باعىتتاعى نەگىزى سۇيەنىش جاۋىنگەرلىك دايىندىقتىڭ دەڭگەيىن كوتەرۋ مەن اسكەري ءبىلىمدى جەتىلدىرۋ ەكەندىگىنە باسا ءمان بەرىلدى. وسى ماسەلەگە بايلانىستى قر قورعانىس ءمينيسترى قازاقستان شىۇ-عا مۇشە مەملەكەتتەردىڭ ءارتۇرلى سالالاردا قاۋىپسىزدىگىنىڭ قامتاماسىز ەتىلۋىنە, تۇراقتىلىعى مەن ءوزارا ءىس-قيمىلىنا نازار اۋداراتىنىن اتاپ ءوتتى. ال جيىنعا قاتىسقان باسقا ەلدەر مينيسترلەرى بولسا, شىۇ-عا مۇشە مەملەكەتتەردىڭ ىنتىماقتاستىعى زور الەۋەتكە يە, ول وڭىرلىك جانە حالىقارالىق قاۋىپسىزدىكتى ءتيىمدى تۇردە ىسكە اسىرۋعا, سونىمەن بىرگە قورعانىس سالاسىن رەفورمالاۋدا ءوزارا ءىس-قيمىل تانىتۋعا, اسكەري كادرلاردى ءازىرلەۋگە ەرەكشە ىقپال ەتەتىنىن ايتتى. ءماجىلىستە تاعى دا اسكەري سالاداعى سەنىم شاراسى مەن تۇراقتىلىقتى كۇشەيتۋ, وڭىردەگى قاۋىپسىزدىك پەن بەيبىتشىلىكتى نىعايتۋ, لاڭكەستىككە قارسى كۇرەستى جەتىلدىرۋ ماسەلەسى كوتەرىلدى. جيىن سوڭىندا شىۇ-عا ءمۇشە مەملەكەتتەر قورعانىس مينيسترلەرىنىڭ 2012-2013 جىلدارعا ارنالعان ىنتىماقتاستىق جوسپارى بەكىتىلدى.
ال كەشە جانە ارعى كۇنى قورعانىس ءمينيسترى ءا.جاقسىبەكوۆ قحر ۇلتتىق قورعانىس ءمينيسترى ليان گۋانلەمەن جانە قىرعىزستاندىق ءارىپتەسى ءابيبوللا قۇدايبەرديەۆپەن وتكىزگەن كەزدەسۋىندە شىۇ اياسىنداعى ەكى جاقتى ىنتىماقتاستىق ءماسەلەلەرىن تالقىلادى. قىتاي مينيسترىمەن كەزدەسۋدە قورعانىس ۆەدومستۆوسىنىڭ باسشىسى ەلىمىزدىڭ شىۇ اياسىندا قحر-مەن ىنتىماقتاستىققا بارىنشا ماڭىز بەرەتىنىن, سونىڭ شەڭبەرىندە تۇراقتى تۇردە لاڭكەستىككە قارسى بىرلەسكەن اسكەري جاتتىعۋلاردىڭ, حالىقارالىق جانە ءوڭىرلىك ساياساتتىڭ وزەكتى ماسەلەلەرى بويىنشا اقپارات الماسۋ مەن كەڭەسۋلەردىڭ وتكىزىلىپ جاتقانىن تىلگە تيەك ەتتى. ال قىتاي قورعانىس ءمينيسترى بىلتىر ءماتىبۇلاق پوليگونىندا ءوتكەن «بەيبىت ميسسيا – 2010» جاتتىعۋلارىن جوعارى باعالايتىنىن, وسى جاتتىعۋلار شىۇ قارۋلى كۇشتەرىنىڭ بىرىگىپ كەز كەلگەن قاۋىپكە تويتارىس بەرە الاتىنىن كورسەتكەنىن ايتتى. سونىمەن بىرگە ول قىتايدىڭ شىۇ اياسىندا بارلىق مەملەكەتتەرمەن تەرەزەسى تەڭ ساياسات ءجۇرگىزەتىن ءوزارا سىيلاستىق پەن ىنتىماقتاستىقتى نىعايتۋداعى ۇستانىمىن ءبىلدىردى. ال قىرعىزستان قورعانىس مينيسترىمەن وتكەن كەزدەسۋدە تاراپتار «قازاقستان رەسپۋبليكاسى ۇكىمەتى مەن قىرعىز رەسپۋبليكاسى ۇكىمەتى اراسىنداعى قايتارىمسىز ءاسكەري كومەك كورسەتۋ تۋرالى كەلىسىمگە» قول قويدى. وسى جەردە ۇقشۇ ءمۇشە مەملەكەتتەرگە اسكەري ماماندار دايارلاۋ جونىندەگى كەلىسىم اياسىندا وسىعان دەيىن 70-كە تارتا قىرعىز اسكەري قىزمەتشىلەرىنىڭ قايتارىمسىز نەگىزدە قازاقستان رەسپۋبليكاسى قورعانىس مينيسترلىگىنىڭ جوو-لارىندا ءبىلىم العانىن, ال قازىر كورشى ەلدىڭ 110 اسكەري قىزمەتشىسىنىڭ ەلىمىزدىڭ اسكەري وقۋ ورىندارىندا ءبىلىم الىپ جاتقانىن اتاپ وتكەن ءجون.
داستان كەنجالين.