كەشە قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ باشقۇرتستان رەسپۋبليكاسى قۇرىلتايى – مەملەكەتتىك جينالىسىنىڭ توراعاسى كونستانتين تولكاچەۆپەن كەزدەستى. وندا قازاقستان مەن رەسەي اراسىنداعى بايلانىس, پارلامەنتارالىق ىنتىماقتاستىق ماسەلەلەرى ءسوز بولدى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋ بارىسىندا تاريحى تەرەڭدە جاتقان تۋىستىق بايلانىستار, رۋحاني-مادەني ۇقساستىقتار ءجونىندە ايتىلدى. تاراپتار بۇگىنگى تاڭدا كەدەن وداعى شەڭبەرىندە ءجانە قۇرىلىپ جاتقان ءبىرتۇتاس ەكونوميكالىق كەڭىستىك اياسىندا ساۋدا-ەكونوميكالىق ىقپالداستىقتى دامىتۋ جايى تۋرالى پىكىر الماستى.
وسى كەلىسىمدەردىڭ ناتيجەسىندە ساۋدا اينالىمى ارتا تۇسەتىنى انىق. «برەستتەن ۆلاديۆوستوكقا دەيىنگى اۋماقتاعى 170 ملن.-داي تۇرعىندى قامتيتىن اۋقىمدى رىنوك الاڭى پايدا بولىپ وتىر», – دەدى ءماجىلىس ءتوراعاسى. سوندىقتان دا جاڭا قاتىناستاردى رەتتەۋ ءۇشىن زاڭنامالىق قامتاماسىز ەتۋ جونىندەگى ماسەلە ەرەكشە وزەكتى ەكەنىن بايقاۋعا بولادى.
ءماجىلىس توراعاسىنا كەزدەسۋ ءۇستىندە كونستانتين تولكاچەۆ: «باشقۇرتستان حالقى نۇرسۇلتان ءابىش ۇلى نازارباەۆتىڭ بىزگە كەلگەن ساپارىن ءالى كۇنگە ۇمىتقان جوق. بىزگە تاعى دا قوناققا كەلسە, وتە قۋانىشتى بولار ەدىك. وسى ءسالەمىمىزدى جەتكىزۋىڭىزدى سۇرايمىز», – دەدى.