قازاقستان پرەزيدەنتى نۇرسۇلتان نازارباەۆ يگور دودونعا مولدوۆا رەسپۋبليكاسىنىڭ پرەزيدەنتى بولىپ سايلانۋىنا بايلانىستى قۇتتىقتاۋ جەدەلحاتىن جولدادى. بۇل تۋرالى اقوردانىڭ ءباسپاسوز قىزمەتىنەن حابارلادى.
مەملەكەت باسشىسى ەكى ەلدىڭ ءداستۇرلى دوستىعى مەن ءوزارا ءتيىمدى ىنتىماقتاستىعىنىڭ تاريحى تەرەڭدە جاتقانىن اتاپ ءوتتى.
«ءسىزدىڭ جوعارى مەملەكەتتىك لاۋازىمداعى قىزمەتىڭىز قازاقستان مەن مولدوۆا قارىم-قاتىناسىن حالىقتارىمىزدىڭ يگىلىگى ءۇشىن ودان ءارى دامىتۋعا جانە نىعايتۋعا سەپتىگىن تيگىزەتىنىنە سەنىمدىمىن», - دەلىنگەن جەدەلحاتتا.
سونداي-اق, نۇرسۇلتان نازارباەۆ يگور دودونعا زور دەنساۋلىق, جاۋاپتى مەملەكەتتىك قىزمەتىنە تابىس, ال دوستاس مولدوۆا حالقىنا بىرلىك پەن باق-بەرەكە تىلەدى.