كەشە قازاقستان رەسپۋبليكاسىنىڭ سينگاپۋر رەسپۋبليكاسىنداعى ەلشىسى ۇسەن سۇلەيمەن سينگاپۋردىڭ سىرتقى ىستەر ءمينيسترى ۆيۆيان بالاكريشنامەن كەزدەستى, دەپ حابارلايدى egemen.kz سىرتقى ىستەر مينيسترلىگىنىڭ سايتىنا سىلتەمە جاساپ.
باسقوسۋ بارىسىندا سينگاپۋرلىق مينيستر قازاقستان رەسپۋبليكاسىن تاۋەلسىزدىكتىڭ 25 جىلدىعىمەن قۇتتىقتادى. كەزدەسۋ كەزىندە قازاقستان مەن سينگاپۋر اراسىنداعى ساياسي, ساۋدا-ەكونوميكالىق جانە ينۆەستيتسيالىق سالالارداعى ىنتىماقتاستىق ماسەلەلەرى تالقىلاندى.
سونداي-اق, تاراپتار سوڭعى ۋاقىتتا ەكى ەلدىڭ اراسىنداعى ىنتىماقتاستىقتىڭ جوعارى دەڭگەيگە شىققانىن ايتتى. ونىڭ سەبەپتەرىنىڭ ءبىرى رەتىندە 2016 جىلى قىركۇيەكتە سينگاپۋردىڭ بۇرىنعى پرەمەر-ءمينيسترى گو چوك تونگتىڭ استاناعا ساپار جاساعانىن اتادى. قازاقستان ەلشىسى سينگاپۋردىڭ سىرتقى ساياسي ۆەدومستۆوسىنىڭ باسشىسىن قازاقستاننىڭ نەگىزگى دامۋ باعىتتارى تۋرالى, سونىڭ ىشىندە «بەس ينستيتۋتسيونالدىق رەفورمالاردىڭ» جۇزەگە اسىرىلۋى, ينفراقۇرىلىمدىق جوبالار «نۇرلى جول» جاڭا ەكونوميكالىق ساياساتى, استانادا «ەكسپو-2017» كورمەسىنىڭ وتكىزىلۋى مەن «استانا» حالىقارالىق قارجى ورتالىعىنىڭ قۇرىلۋى تۋرالى حاباردار ەتتى.
كەزدەسۋ بارىسىندا كەلەسى جىلدىڭ ءبىرىنشى جارتىسىندا «قازاقستاننىڭ ينۆەستيتسيالىق كليماتى – سينگاپۋر مەن ازيا-تىنىق مۇحيت ايماعىنا جەتىلدىرىلمەگەن مۇمكىندىكتەرى» قازاقستان-سينگاپۋر بيزنەس فورۋمىنىڭ وتەتىندىگى, جاقىن ارادا سينگاپۋردا ورنالاساتىن «قازاقستان-ازيا-تىنىق مۇحيت ساۋدا-ينۆەستيتسيالىق پالاتاسىنىڭ» (Kazakhstan-Asia Pacific Trade & Investment Chamber (KAPTIC) قۇرىلاتىندىعىن حابارلاندى. سونداي-اق, ەلشى قازاقستان تاراپىنىڭ شەشىمىنە سايكەس 2015 جىلعى 16 شىلدەدەن باستاپ سينگاپۋرلىق ازاماتتار ەلىمىزدە 15 كۇنگە دەيىن ۆيزاسىز ساپار شەگە الاتىنىن ەسكە سالدى.
ءوز كەزەگىندە, سينگاپۋردىڭ سىرتقى ىستەر ءمينيسترى ەلىمىزدىڭ حالىقارالىق ساحناداعى جەتىستىكتەرىنە جانە مەملەكەت ىشىندەگى جۇرگىزىلىپ جاتقان رەفورمالارىنا جوعارى باعا بەرىپ, قازاقستان ورتالىق ازيا وڭىرىندەگى ەكونوميكالىق دامۋىنداعى كوشباسشىسى ەكەندىگىن اتاپ ءوتتى.