2011
*1 مامىردا الماتىدا قازاقستان حالقى دوستىعىنىڭ فەستيۆالى باستالدى. تاۋەلسىزدىكتىڭ 10 جىلدىعى اياسىندا وتكەن بۇل شارانى ەلباسى نۇرسۇلتان نازارباەۆ اشىپ, بارشاعا بەرەكە, بىرلىك, تاتۋلىق تىلەدى. «1995 جىلدان مەملەكەتتىڭ مارتەبەلى مەرەكەسى بولىپ كەلە جاتقان 1 مامىر – بارشامىزدىڭ ىنتىماعىمىز بەن ءوزارا تۇسىنىستىگىمىزدى, دوستىعىمىز بەن باۋىرمالدىعىمىزدى جارقىراتىپ كورسەتەتىن كەمەل كۇنىمىز. قازاقستان – تاتۋلىعى جاراسقان شاڭىراق», دەدى مەملەكەت باسشىسى.
*6 مامىردا قازاق عارىشكەرى تالعات مۇساباەۆ باسقارعان «سويۋز-تم-32» كورابلى جەرگە قايتىپ ورالدى. تىكۇشاقپەن استانا اۋەجايىنا جەتكىزىلگەن ەكيپاج مۇشەلەرىمەن ەلباسى نۇرسۇلتان نازارباەۆ كەزدەستى. ەكيپاج قۇرامىندا بورت ينجەنەرى يۋري باتۋرين مەن تۇڭعىش عارىشكەر-تۋريست دەننيس تيتو بار بولاتىن.
*9 مامىردا استانادا «وتان قورعاۋشىلار» مەموريالدىق كەشەنى اشىلدى.
*11 مامىردا ەلوردادا قازاق حالقىنىڭ تاۋەلسىزدىگى جولىنداعى ۇلى كۇرەسكەر – كەنەسارى حاننىڭ ەسكەرتكىشى اشىلدى. بۇل تۋرالى «ەگەمەن قازاقستان» گازەتىنىڭ 12 مامىر كۇنگى نومىرىندە «قازاقتا كەنەكەمە ەر جەتپەگەن...» تاقىرىبىمەن ماقالا جاريالاندى.
*18 مامىردا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە كۇلتەگىن ەسكەرتكىشىنىڭ عىلىمي كوشىرمەسى ورناتىلىپ, قازاقستان تاۋەلسىزدىگىنىڭ 10 جىلدىعىنا ارنالعان «بايىرعى تۇركى وركەنيەتى: جازبا ەسكەرتكىشتەر» تاقىرىبى بويىنشا حالىقارالىق عىلىمي-تەوريالىق كونفەرەنتسيا ءوتتى. وعان ەلباسى قاتىسىپ, ءسوز سويلەدى.
*23 مامىردا پرەزيدەنت ن.ءا.نازارباەۆتىڭ ارمەنياعا رەسمي ساپارى باستالدى. ەرتەڭىندە ەرەۆان قالاسىندا ۇجىمدىق قاۋىپسىزدىك كەڭەسىنىڭ سەسسياسى وتكىزىلدى. ساپار بارىسىندا ەلباسى ارمەنيا پرەزيدەنتى ر.كوچاريانمەن كەلىسسوز جۇرگىزدى.
*31 مامىردا پرەزيدەنت نۇرسۇلتان نازارباەۆ ەۋرازيالىق ەكونوميكالىق قوعامداستىق مەملەكەتارالىق كەڭەسىنىڭ جانە تمد-عا مۇشە ەلدەر باسشىلارى كەڭەسىنىڭ ماجىلىستەرىنە قاتىسۋ ءۇشىن بەلارۋس استاناسىنا كەلدى. وندا نەگىزىنەن الدىن الا ماقۇلدانعان 18 قۇجات قارالدى. ەرتەڭىنە مينسكىدە ەۋرازەق-قا قاتىسۋشى مەملەكەتتەر باسشىلارىنىڭ ءماجىلىسى ءوتتى.
*5 ماۋسىمدا قازاقستاندا رەسەي فەدەراتسياسى مادەنيەتىنىڭ كۇندەرى باستالدى.
*7 ماۋسىمدا قازاقستان سۋديالارىنىڭ سەزى ءوتتى. «ءبىزدىڭ ەلىمىزدىڭ سۋديالارى ەڭ باستى ماسەلەگە نەگىزدەلگەن جاڭا كوزقاراستاردى تالداپ جاسايدى دەگەن سەنىمدەمىن: ماسەلەنى ادامدار وزدەرىنىڭ قۇقىقتارىن قورعاۋ ءۇشىن شەنەۋنىكتەرگە ەمەس, اكىمدەرگە ەمەس, ۇكىمەتكە ەمەس, پرەزيدەنتكە ەمەس, سىزدەرگە كەلەتىندەي ەتىپ قويىڭىزدار», دەدى پرەزيدەنت سۋديالار الدىندا سويلەگەن سوزىندە.
*12 ماۋسىمدا قازاقستان پرەمەر-ءمينيسترى ق.توقاەۆ ازاماتتاردىڭ اقشانى جاريا ەتۋى جونىندەگى اكتسياعا بايلانىستى مالىمدەمە جاسادى. «راقىمشىلىق ناتيجەسىندە ازاماتتار ءۇشىن ەشقانداي كەلەڭسىز سالدار بولمايتىنىن مالىمدەيمىن. قۇقىق قورعاۋ ورگاندارى تەكسەرۋ, شۇعىل-ىزدەستىرۋ شارالارىن جۇرگىزۋ ءۇشىن اقشانى جاريا ەتۋ فاكتىلەرىن پايدالانبايتىن بولادى», دەدى ۇكىمەت باسشىسى.
*13 ماۋسىمدا ەلباسى ن.ءا.نازارباەۆ ەۋروپالىق قايتا قۇرۋ جانە دامۋ بانكىنىڭ پرەزيدەنتى ج.لەمەردى قابىلدادى. كەزدەسۋ بارىسىندا ەلىمىزدەگى ەكونوميكالىق رەفورمالار, قازاقستان مەن ەۋروپالىق قايتا قۇرۋ جانە دامۋ بانكى اراسىنداعى ىنتىماقتاستىق ماسەلەلەرى تالقىلاندى.
*14-15 ماۋسىمدا قىتايدا «شانحاي بەستىگى» ەلدەرىنىڭ التىنشى ءسامميتى ءوتتى. شانحاي قالاسىندا قازاقستان, قىتاي, قىرعىزستان, رەسەي, تاجىكستان مەن وزبەكستان مەملەكەتتەرىنىڭ پرەزيدەنتتەرى كەزدەسىپ, وندا ۇيىمنىڭ اتىن وزگەرتۋ كەلىسىلدى جانە مەملەكەتتەر باسشىلارى وزبەكستاندى «شانحاي ىنتىماقتاستىق ۇيىمىنا» قابىلداۋ تۋرالى بىرلەسكەن مالىمدەمەگە قول قويدى. وسىلايشا, وزبەكستاننىڭ مۇشە بولۋىنا بايلانىستى, ۇيىمدى «شانحاي ىنتىماقتاستىق ۇيىمى» رەتىندە قايتا قۇرۋ تۋرالى شەشىم قابىلداندى.
*19 ماۋسىمدا 184,5 شاقىرىمدىق «اقسۋ-دەگەلەڭ» تەمىر جولى ىسكە قوسىلدى. پرەزيدەنت نۇرسۇلتان نازارباەۆ جاڭا جولدىڭ اشىلۋىنا ارنايى قاتىسىپ, ءسوز سويلەدى. بۇل تۋرالى «ەگەمەن قازاقستان» گازەتىنىڭ 20 ماۋسىم كۇنگى نومىرىندە ەلباسى اتاپ كورسەتكەندەي, «اقسۋ-دەگەلەڭ» تەمىر جولىنىڭ ىسكە قوسىلۋى – تاۋەلسىزدىك تويىنا تاماشا تارتۋ» تاقىرىبىمەن ماقالا جاريالاندى.
*24 ماۋسىمدا استانا قالاسىنداعى «قازاقستان» سپورت كەشەنىندە قازاقستان رەسپۋبليكاسىنىڭ I سپارتاكياداسىنىڭ اشىلۋ سالتاناتى ءوتتى.
*29 ماۋسىمدا ەلباسى جارلىعىمەن 2007 جىلعا دەيىنگى كەزەڭگە «استانا – جاڭا قالا» ارنايى ەكونوميكالىق ايماعى قۇرىلدى.
*1 شىلدەدە ەلدە قوسىمشا قۇن سالىعى 20-دان 16 پايىزعا, الەۋمەتتىك سالىق 26-دان 21 پايىزعا تومەندەتىلدى. بۇل ەلىمىزدە ءجۇرىپ جاتقان رەفورمالاردىڭ جارقىن جەتىستىگى ەدى.
*5 شىلدەدە استاناعا ەكى كۇندىك رەسمي ساپارمەن تۇرىكمەنستان پرەزيدەنتى ساپارمۇرات نيازوۆ كەلدى. كەلىسسوزدەردەن كەيىن قازاقستان مەن تۇرىكمەنستان پرەزيدەنتتەرى مەملەكەتتىك شەكارانى ايقىنداپ الۋ ماسەلەلەرى تۋرالى كەلىسىمگە, باسقا دا قۇجاتتارعا قول قويدى.
*16 شىلدەدە پرەزيدەنت نۇرسۇلتان نازارباەۆ گرەكيا رەسپۋبليكاسىنا رەسمي ساپارمەن باردى. نۇرسۇلتان نازارباەۆ پەن گرەكيا پرەزيدەنتى كونستانتينوس ستەفاناپولۋستىڭ اڭگىمەلەسۋىندە, كەڭەيتىلگەن قۇرامدا وتكىزىلگەن كەلىسسوزدەردە ەكىجاقتى ىنتىماقتاستىقتىڭ ماڭىزدى ماسەلەلەرى تالقىلاندى. نۇرسۇلتان نازارباەۆ گرەك ەلىنىڭ ەڭ جوعارى ناگرادالارىنىڭ ءبىرى – قۇتقارۋشى وردەنىمەن ناگرادتالدى.
*18-19 شىلدە كۇندەرى پرەزيدەنت ن.ءا.نازارباەۆتىڭ حورۆاتيا رەسپۋبليكاسىنا تۇڭعىش رەت رەسمي ساپارى ءوتتى. ساپار بارىسىندا قازاقستان پرەزيدەنتى مەن حورۆاتيا باسشىسى ستەپان مەسيچ ەكى ەلدىڭ ءوزارا قارىم-قاتىناسىنىڭ پرينتسيپتەرى تۋرالى دەكلاراتسياعا قول قويدى. ال سىرتقى ىستەر مينيسترلەرى ىنتىماقتاستىق تۋرالى مەموراندۋم بەكىتتى.
*23 شىلدەدە پرەزيدەنت نۇرسۇلتان نازارباەۆتىڭ قىرعىز رەسپۋبليكاسىنا رەسمي ساپارى باستالدى. ەل باسشىلارى – نۇرسۇلتان نازارباەۆ پەن اسقار اقاەۆ ماڭىزدى ءۇش قۇجاتقا – ەكىجاقتى قارىم-قاتىناستى ودان ءارى دامىتۋعا باعىتتالعان بىرلەسكەن مالىمدەمەگە, 2001-2005 جىلدارداعى ەكونوميكالىق ىنتىماقتاستىق تۋرالى كەلىسىمگە, قازاقستان مەن قىرعىزستان اراسىنداعى شەكارانى دەليميتاتسيالاۋ تۋرالى كومميۋنيكەگە قول قويدى. وسى كۇنى بىشكەكتەگى ەمەن ساياباعىندا مەملەكەتتەر باسشىلارىنىڭ قاتىسۋىمەن مۇحتار اۋەزوۆكە ەسكەرتكىش اشىلدى.
*2 تامىزدا ەلباسى نۇرسۇلتان نازارباەۆ تمد ەلدەرى باسشىلارىنىڭ قارا تەڭىز بويىنداعى بەيرەسمي كەزدەسۋلەرىنە قاتىستى.