اقتاۋ پورتىنا رەسەي فەدەراتسياسى كاسپي فلوتيلياسىنىڭ كەمەلەرى مەن ەكيپاج مۇشەلەرى دوستىق ساپارمەن كەلدى. قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىنداعى دوستىق شاقىرتۋدى قابىل العان رەسەيلىك تەڭىزشىلەر اقتاۋ پورتىنا كاسپي ماڭى ەلدەرىنىڭ دوستىعىن نىعايتۋ ماقساتىندا شاقىرعان يران ەلىنەن جەتتى.
قازاقستان مەن رەسەي فلوتتارى اراسىنداعى ىنتىماقتاستىقتى تەرەڭدەتە ءتۇسۋ, ءوزارا تاجىريبە الماسۋ ماقساتىنداعى كەزدەسۋ اياسىندا 250 ەكيپاج مۇشەسى اقتاۋ قالاسىن ارالاپ, ءتۇرلى سپورتتىق سايىستارعا قاتىستى جانە «ماڭگىلىك الاۋ» كەشەنىنە گۇل شوقتارىن قويدى.
رەسەيلىك تەڭىزشىلەردى اقتاۋ پورتىنا «تاتارستان» زىمىران كەمەسى مەن «گراد سۆياجسك» شاعىن زىمىران جانە تەڭىز كەمەسى الىپ كەلدى. رەسەي فلوتيلياسىندا بۇل كەمەلەردىڭ الاتىن وزىندىك ورنى دا, وزىندىك تاريحى دا بار. رەسەيلىك سۋ ۇستىندەگى كەمەلەر بريگاداسىنىڭ كومانديرى سەرگەي بابسكوۆتىڭ ايتۋىنشا, وزگە فلوتتاردا مۇنداي كەمە جوق بولعاندىقتان, «تاتارستان» زىمىران كەمەسى بىرەگەي سانالسا, «گراد سۆياجسك» شاعىن كەمەسى جاقسى قارۋلاندىرىلعان. 1989 جىلى ا.گوركي اتىنداعى كەمە قۇراستىرۋ زاۋىتىندا جاسالىپ, 1993 جىلى سۋعا جىبەرىلگەن «تاتارستان» كەمەسى اراعا ون جىل سالىپ كاسپي فلوتيلياسى قۇرامىنا ەندى. تەڭىز ۇستىندە 260 شاقىرىم قاشىقتىقتا جۇمىس جاساي الاتىن «ۋران» راكەتالىق كەشەنى جانە شابۋىلعا قارسى ەكى گراناتومەتى بار كەمە قازىرگى تاڭدا اتالمىش فلوتيلياداعى نەگىزگى كەمەلەردىڭ ءبىرى. 2010 جىلى ا.گوركي اتىنداعى كەمە قۇراستىرۋ زاۋىتىندا جاسالعان «گراد سۆياجسك» شاعىن كورابلى سۋعا 2013 جىلى جىبەرىلىپ, ءبىر جىلدان سوڭ كاسپي فلوتيلياسى قۇرامىنا كىرگەن. زاماناۋي ارتيللەريالىق, راكەتالىق, شابۋىلعا قارسى, زەنيتتىك جانە راديوتەحنيكالىق قارۋلارمەن, سونداي-اق, تۇنگى مەزگىلدەردە, اۋا رايىنىڭ قولايسىز كەزدەرىندە دە الىس قاشىقتىققا جۇمىس جاساي الاتىن «كاليبر-نك» راكەتالىق كەشەنىمەن جابدىقتالعان بۇل كەمە وتكەن جىلدىڭ قازان ايىندا «يسلام مەملەكەتى» لاڭكەستەرىنە قارسى شابۋىل پوزيتسيالارىنا قاتىسقان. كاسپي تەڭىزى اكۆاتورياسىنان جاسالعان سوققى سنارياد, جارىلعىش قۇرىلعىلار وندىرەتىن ورىن مەن قارۋ-جاراق قويماسىن جارۋعا اتسالىسقان.
كورشى ەكى ەلدىڭ تەڭىزشىلەرىنىڭ قارىم-قاتىناسىنداعى بۇل العاشقى كەزدەسۋ ەمەس. اسكەري وقۋ-جاتتىعۋ نەمەسە دوستاستىق كەزدەسۋ ماقساتىندا ءجيى كەزدەسەتىن ەكى ەلدىڭ تەڭىزشىلەرى بۇدان بۇرىن 2014 جىلى اقتاۋدا ءبىرلەسكەن وقۋ-جاتتىعۋ وتكىزدى. ال قازاقستاندىق تەڭىزشىلەر ەكى جىل قاتارىنان داعىستاننىڭ كاسپي فلوتيلياسىنا بارىپ, ماحاچكالادا تەڭىز بياتلونىنان وتكەن جارىسقا قاتىسىپ قايتقان بولاتىن.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
سۋرەتتەردى تۇسىرگەن
تالانت قۇسايىن